Jeremiah 43;1-13
43 Edikem ke ndondo oro Jeremiah okụrede ndisian kpukpru owo kpukpru ikọ Jehovah Abasi mmọ, emi Jehovah Abasi mmọ ọkọdọn̄de enye ete edisian mmọ, kpa kpukpru ikọ emi,+
2 Azariah eyen Hoshaiah+ ye Johanan+ eyen Kareah ye kpukpru mbon iseri+ ẹdọhọ Jeremiah ẹte: “Afo ososu.+ Jehovah Abasi nnyịn idọn̄ke fi edidọhọ, ete, ‘Ẹkûdụk Egypt ẹkedụn̄ do nte isenowo.’+
3 Edi Baruch+ eyen Neriah onụk fi ete editịn̄ n̄kpọ emi man ada nnyịn esịn ke ubọk mbon Chaldea, man ẹwot nnyịn mîdịghe ẹtan̄ nnyịn ẹka ntan̄mfep ke Babylon.”+
4 Ndien Johanan eyen Kareah ye kpukpru mme etubom udịmekọn̄ ye kpukpru owo ikopke uyo Jehovah,+ emi ọkọdọhọde ete mmọ ẹdụn̄ ke isọn̄ Judah.+
5 Ntre Johanan eyen Kareah ye kpukpru mme etubom udịmekọn̄ ẹda kpukpru nsụhọ mbon Judah emi ẹtode kpukpru mme idụt oro ẹkesuande mmọ ẹdọn̄ ẹnyọn̄ ẹdi, man ẹdidụn̄ ke ndusụk ini ke isọn̄ Judah,+
6 idem ye mme okopidem irenowo ye iban mmọ ye n̄kpri nditọ ye nditọiban edidem+ ye kpukpru ukpọn̄ oro Nebuzaradan+ etubom mbon ukpeme akayakde ẹdu ye Gedaliah+ eyen Ahikam+ eyen Shaphan,+ ye prọfet Jeremiah ye Baruch+ eyen Neriah.
7 Ndien ke akpatre mmọ ẹdisịm isọn̄ Egypt,+ koro mmọ mîkokopke uyo Jehovah; ndien mmọ ẹsan̄a tutu ẹdisịm Tahpanhes.+
8 Edikem uyo Jehovah esịm Jeremiah ke Tahpanhes, ete:
9 “Tan̄ ikpọ itiat ke ubọk fo, nyụn̄ dịp mmọ ke mbat ukọkufọk ke udịghiukot kọrikọri oro odude ke enyịnusụn̄ ufọk Pharaoh ke Tahpanhes, ke iso irenowo Jew.+
10 Afo nyụn̄ dọhọ mmọ ete, ‘Ntem ke Jehovah mme udịm, Abasi Israel, ọdọhọ ete: “Sese ami mmọn̄ ndọn̄ ẹkekot Nebuchadrezzar edidem Babylon,+ asan̄autom mi,+ nyonyụn̄ nda enye nnyụn̄ ndori ebekpo esie ke enyọn̄ itiat emi ami ndịpde mi, enye oyonyụn̄ atat akwa tent esie ofụk mmọ.
11 Ndien enye oyodụk edimia isọn̄ Egypt.+ Owo ekededi eke anade akpa ke udọn̄ọ n̄kpa ayakpa ke udọn̄ọ n̄kpa, owo ekededi eke anade aka ntan̄mfep ayaka ntan̄mfep, owo ekededi eke onyụn̄ anade akpa ke akan̄kan̄ ayakpa ke akan̄kan̄.+
12 Ndien nyekịm ikan̄ ke ufọk mme abasi Egypt;+ enye oyonyụn̄ ata mmọ onyụn̄ omụm mmọ nte mbuotekọn̄ onyụn̄ emen isọn̄ Egypt awan̄ ke idem, kpa nte ekpemerọn̄ emende ọfọn̄ esie awan̄ ke idem,+ ndien enye ọyọwọrọ do ke emem.
13 Ndien enye oyobụn̄ mme adaha Beth-shemesh emi ẹdude ke isọn̄ Egypt, mbio mbio; enye oyonyụn̄ ọfọp ufọk mme abasi Egypt ke ikan̄.”’”
