Jeremiah 49;1-39
49 Ntem ke Jehovah ọdọhọ aban̄a nditọ Ammon+ ete: “Nte Israel inyeneke nditọiren, mîdịghe nte enye inyeneke adiakpa? Ntak emi Malcam+ adade Gad+ enyene, ikọt esie ẹnyụn̄ ẹkade ẹkedụn̄ ke mme obio Israel?”+
2 “‘Mmọdo, sese! mme usen ke ẹdi,’ uyo Jehovah edi emi, ‘ami nyonyụn̄ nnam ẹkop n̄kpo ekọn̄+ eke ẹfioride ẹban̄a Rabbah+ nditọ Ammon; ndien enye ayakabade ibombom oro anade ndon,+ ẹyenyụn̄ ẹkịm ikan̄+ ke n̄kpri obio+ esie.’
“‘Ndien Israel ayada mbon oro ẹkedade enye ẹnyene, enyene,’+ Jehovah ọdọhọ.
3 “‘O Heshbon+ fiori,+ koro ẹmebụme Ai! O mbufo n̄kpri obio Rabbah ẹfiori. Ẹsịne ọfọn̄ ntuan̄a ke idem.+ Ẹseme, ẹnyụn̄ ẹsan̄a ẹkanade mme itienna ufene emi ẹsịnde ọkọ itiat ẹkanade, koro Malcam ayakam aka ntan̄mfep,+ ọkọrọ ye kpukpru mme oku esie ye mbọn̄ esie.+
4 Ntak emi afo anamde inua aban̄a mme unaisọn̄, unaisọn̄ fo emi mmọn̄ ọfiọrọde,+ O eyenan̄wan emi mînamke akpanikọ, afo emi ọbuọtde idem ke mme n̄kpọuto fo,+ onyụn̄ ọdọhọde ete: “Anie edidi ebịne mi?”’”+
5 “‘Sese ami mmọn̄ nnam n̄kpọndịk+ oto kpukpru mbon oro ẹkande fi ẹkụk esịm fi,’ uyo Akakan Ọbọn̄ Andikara,+ Jehovah mme udịm, edi emi. ‘Ndien ẹyesuan mbufo, owo mbufo kiet kiet ẹdọn̄ ke afan̄ mmọ,+ ndien idụhe owo eke editan̄de mbon oro ẹfehede obon ọtọkiet.’”
6 “‘Edi ke oro ebede, ami nyatan̄ nditọ Ammon+ oro ẹkemụmde nte mbuotekọn̄ mbon ọtọkiet,’ uyo Jehovah edi emi.”
7 Ntem ke Jehovah mme udịm ọdọhọ aban̄a Edom ete: “Nte ọniọn̄+ idụhe aba ke Teman?+ Nte item amatak ke otu mbon oro ẹnyenede ifiọk? Nte ọniọn̄ mmọ omobu?+
8 Ẹfen̄e!+ Ẹfiak edem! Ẹsụhọde ẹdụk ẹkedụn̄,+ O mbufo mme andidụn̄ Dedan!+ Koro nyada afanikọn̄ Esau ntiene enye, kpa ini emi ndiwọn̄ọrede enyịn nse enye.+
9 Edieke mbon oro ẹtetde grape ẹkpedide ẹbịne fi, nte mmọ ikpayakke ndusụk ẹsụhọ? Edieke mme inọ ẹkpedụkde ẹdi ke okoneyo, mmọ ẹkpebiat sụk se mmọ ẹyomde.+
10 Edi amaedi ami, nyofụhọde Esau nnịm iferi.+ Nyayarade mme ebiet udịbe+ esie, ndien owo idikemeke ndidịbe.+ Ẹyebụme nditọ esie ye nditọeka esie iren ye mme mbọhọidụn̄ esie,+ enye idinyụn̄ idụhe aba.+
11 Daha kpọn̄ nditọakpa+ fo. Ami nyenịm mmọ uwem, mme ebeakpa fo ẹyekam ẹbuọt idem ye ami.”+
12 Koro ntem ke Jehovah ọdọhọ ete: “Sese! Okposụkedi emi mîdịghe ido mmọ ndin̄wọn̄ cup emi, mmọ iditreke ndin̄wọn̄ enye.+ Ndien amaedi afo, ndi ẹyetre ndinọ fi ufen? Owo iditreke ndinọ fi ufen, koro afo mûdutreke ndin̄wọn̄.”+
13 “Koro mmotomo idemmi,”+ uyo Jehovah edi emi, “nte ke Bozrah+ ayakabade edi n̄kpọ n̄kpaidem,+ n̄kpọ esuene, n̄kpọ nsobo ye n̄kpọ isụn̄i; ndien kpukpru mme obio esie ẹyekabade ẹdi n̄wụre ebiet ke nsinsi.”+
14 Mmokop etop emi otode Jehovah, ẹmenyụn̄ ẹdọn̄ isụn̄utom aka ke otu mme idụt, ọkọdọhọ ete: “Ẹsop idem ọtọkiet ẹdi ẹbịne enye, ẹnyụn̄ ẹdaha ke enyọn̄ ẹka ekọn̄.”+
15 “Koro, sese! mmanam fi ekpri ke otu mme idụt, ẹmenyụn̄ ẹse fi ke ndek ke otu ubonowo.+
16 Nnyekidem oro afo anamde mme owo ẹkop amabian̄a fi, kpa iseri esịt fo,+ O afo emi odụn̄de ke mme aba akwa itiat, emi adade enyọn̄ obot enyene. Okposụkedi emi afo ọbọpde efọk fo ke enyọn̄ nte ntrukpom,+ ami nyada fi nto do nsụhọde,”+ uyo Jehovah edi emi.
17 “Ndien Edom ayakabade edi n̄kpọ n̄kpaidem.+ Kpukpru owo eke ẹsan̄ade ẹbe enye ẹyese enye ke n̄kpaidem ẹnyụn̄ ẹfri inụk ke ntak kpukpru mme ufen esie.+
18 Kpa nte ẹkesobode Sodom ye Gomorrah ye mme obio oro ẹkedude ẹkpere enye,”+ Jehovah ọdọhọ, “baba owo kiet ididụn̄ke do, eyen owo idinyụn̄ idụn̄ke ke esịt esie nte esenowo.+
19 “Sese! Owo ọyọdọk edi kpa nte ekpe+ emi ọwọrọde ke ọtọwọk ikọt oro aban̄de ke mben Jordan, aka ebietidụn̄ emi ebịghide,+ edi ke ediyịp enyịn ami nyanam enye efehe ọkpọn̄ enye.+ Nyonyụn̄ nnịm owo emi ẹmekde nte ese aban̄a enye. Koro anie ebiet mi,+ anie edinyụn̄ odomo idem ye ami,+ anie ndien edi ekpemerọn̄ emi ekemede ndida mi ke iso?+
20 Mmọdo, mbufo ẹkop uduak emi Jehovah aduakde aban̄a Edom,+ ye mme ekikere esie emi enye ekerede aban̄a mme andidụn̄ Teman:+ Ke akpanikọ ẹyedụri nditọerọn̄ ẹsan̄a. Ke akpanikọ, enye ayanam ebietidụn̄ mmọ akabade ndon ke ntak mmọ.+
21 Isọn̄ emenyek ke ntak uyom iduọ mmọ.+ Mfiori odu!+ Ẹmekop uyom esie idem ke Ididuot Inyan̄.+
22 Sese! Owo eyefehe ọdọk onyụn̄ ọduọ ofụk nte ntrukpom,+ ndien enye ayatat mba esie ofụk Bozrah;+ ndien ke usen oro, esịt n̄kpọsọn̄ owo Edom ayakabade etie nte esịt n̄wanndọ emi okopde ubiak uman.”+
23 Aban̄a Damascus:+ “Bụt amanam Hamath+ ye Arpad,+ koro mmọ ẹkopde idiọk etop. Idem emeyemede mmọ.+ Ndutịme omodu ke inyan̄; enye ikemeke ndina sụn̄.+
24 Damascus ọmọduọk uko. Enye ọmọwọn̄ọde edem man efehe, ndien idem enen̄ede enyek enye.+ Nnanenyịn ye ubiak uman ẹmesịm enye, nte n̄wan eke oyomde ndiman eyen.+
25 Anam didie owo mîwọrọke ikpọn̄ obio itoro, kpa obio idara?+
26 “Mmọdo n̄kparawa esie ẹyeduọn̄ọ ke mme an̄wa obio esie, ẹyenyụn̄ ẹnam kpukpru mbonekọn̄ esie ẹdu ke ndobo ke usen oro,”+ uyo Jehovah mme udịm edi emi.
27 “Ndien ami nyekịm ikan̄ ke ibibene Damascus, enye oyonyụn̄ ata mme tọwa ufọkidụn̄ Ben-hadad.”+
28 Ntem ke Jehovah ọdọhọ aban̄a Kedar+ ye mme obio ubọn̄ Hazor,+ emi Nebuchadrezzar edidem Babylon okosobode,+ ete: “Mbufo ẹdaha ke enyọn̄, ẹnyụn̄ ẹka Kedar ẹkebụme nditọ Edem Usiahautịn.+
29 Ẹyetan̄ mme tent+ mmọ ye otuerọn̄+ mmọ, ye mme ọfọn̄ tent+ mmọ ye kpukpru n̄kpoduoho mmọ. Ẹyenyụn̄ ẹbọ mmọ mme camel+ mmọ. Ndien mmọ ẹyefiori ẹkot mmọ ẹte, ‘Ndịk odu akan okụk!’”+
30 “O mbufo mme andidụn̄ Hazor,+ ẹfen̄e, ẹfen̄e usụn̄ oyom; ẹsụhọde ẹdụk ẹkedụn̄,” uyo Jehovah edi emi. “Koro Nebuchadrezzar edidem Babylon+ aduakde uduak aban̄a mbufo onyụn̄ ekerede ekikere aban̄a mbufo.”
31 “Mbufo ẹdaha ke enyọn̄, ẹka ẹken̄wana ye idụt oro odude ke emem,+ onyụn̄ odụn̄de ke ifụre!”+ uyo Jehovah edi emi.
“Enye inyeneke usụn̄ inyụn̄ inyeneke eto usịn-usụn̄. Mmọ ẹdụn̄ ikpọn̄.+
32 Ndien mme camel+ mmọ ẹyedi n̄kpọ mbụme, ediwak ufene mmọ ẹyenyụn̄ ẹdi n̄kpọ mbụme. Nyonyụn̄ nsuan mmọ, kpa mmọ oro ẹfatde idet etak mban̄+ mmọ, ndọn̄ ke kpukpru ofụm;+ nyonyụn̄ nda afanikọn̄ ke kpukpru ikpehe oro ẹkperede enye ntiene mmọ,” uyo Jehovah edi emi.
33 “Ndien Hazor+ ayakabade edi itieidụn̄ mme jackal,+ ye ndon ke nsinsi. Baba owo kiet ididụn̄ke do, eyen owo idinyụn̄ idụn̄ke ke esịt esie nte esenowo.”+
34 Uyo Jehovah emi ekesịm prọfet Jeremiah aban̄a Elam,+ ke ini Zedekiah+ edidem Judah ọtọn̄ọde ndikara nte edidem, ete:
35 “Ntem ke Jehovah mme udịm ọdọhọ ete, ‘Sese ami mmọn̄ mbụn̄ utịgha Elam,+ kpa ntọn̄ọ odudu mmọ.
36 Ndien ami nyada ofụm mbinan̄ ke utịt ikpaenyọn̄ mbinan̄+ ntiene Elam. Ami nyonyụn̄ nsuan mmọ ndọn̄ ke kpukpru ofụm emi,+ ndien idụhe idụt emi mbon Elam oro ẹsuande+ mîdisịmke.’”
37 “Ndien nyasuan mbon Elam ke iso mme asua mmọ ye ke iso mbon oro ẹyomde ukpọn̄ mmọ; ndien ami nyada afanikọn̄, ikan̄-ikan̄ iyatesịt+ mi, ntiene mmọ,” uyo Jehovah edi emi. “Ami nyonyụn̄ ndọn̄ akan̄kan̄ etiene mmọ tutu nsobo mmọ mfep.”+
38 “Ndien nyowụk ebekpo mi ke Elam,+ nyonyụn̄ nsobo edidem ye mbọn̄ mfep do,” uyo Jehovah edi emi.
39 “Ndien ama ekem ke mme akpatre usen,+ ami nyatan̄ mbon Elam+ oro ẹkemụmde nte mbuotekọn̄ mbon ọtọkiet,” uyo Jehovah edi emi.
