Jeremiah 5;1-31
5 Ẹka ẹkesan̄a ẹkanade mme efak Jerusalem ẹnyụn̄ ẹse ke emi, ẹnyụn̄ ẹfiọk, ẹnyụn̄ ẹyom ke mme an̄wa obio esie m̀mê mbufo ẹmekeme ndikụt owo,+ m̀mê odu owo eke ekpede unenikpe,+ owo eke oyomde akpanikọ,+ ndien ami nyefen enye.
2 Idem ọkpọkọm mmọ ẹdọhọ ẹte: “Ma uwem Jehovah!” mmọ ẹditomo ke nsu.+
3 O Jehovah, nte enyịn fo isehe akpanikọ?+ Afo ama amia mmọ,+ edi mmọ ikọdọn̄ọke.+ Afo ama osobo mmọ.+ Mmọ ẹma ẹsịn ndibọ ntụnọ.+ Mmọ ẹma ẹnam iso mmọ ọsọn̄ akan itiat.+ Mmọ ẹma ẹsịn ndifiak edem.+
4 Ami mma ndọhọ nte: “Ke akpanikọ mmọ ẹdi mme usụhọde owo. Mmọ ẹmenam ndisịme, koro mmọ ẹmefụmi usụn̄ Jehovah, kpa ubiereikpe Abasi mmọ.+
5 Ami nyaka mbịne ikpọ owo n̄ketịn̄ ikọ ye mmọ;+ koro mmọ ẹmefiọk usụn̄ Jehovah, kpa ubiereikpe Abasi mmọ.+ Ke akpanikọ kpukpru mmọ ẹbụn̄ ọkpọnọ; mmọ ẹkịbi ubọpn̄kpọ.”+
6 Ntak edi oro ekpe ọwọrọde ke akai edin̄wana ye mmọ, wolf unaisọn̄ desat obụme mmọ,+ anawụri ekpe onyụn̄ ana ebet ke mme obio mmọ.+ Ẹwai kpukpru owo eke ẹwọrọde ke esịt mmọ mbai mbai. Koro ubiatibet mmọ ẹmewak; mme n̄kpọ oro mmọ mînamke akpanikọ ẹmenyụn̄ ẹwak.+
7 N̄keme didie ndifen fi ke n̄kpọ emi? Nditọ fo ẹmekpọn̄ mi, mmọ ẹmenyụn̄ ẹtomo+ se mîdịghe Abasi.+ Ami mma nnyụn̄ nnam mmọ ẹkop uyụhọ,+ edi mmọ ẹma ẹka iso ẹsịn efịbe,+ ẹnyụn̄ ẹsan̄a ke udịm ẹdụk ufọk n̄wan akpara.
8 Mmọ ẹmekabade ẹdi mme enan̄-mbakara eke ẹnyenede ọkpọsọn̄ udọn̄ idan̄, emi ẹnyenede nsen ekpọrọ eke ẹsọn̄ide. Owo mmọ kiet kiet osioro uyo nte enan̄-mbakara okot n̄wan nsan̄a esie.+
9 “Nte n̄kpokotke mmọ ẹdinam ibat ẹban̄a mme n̄kpọ emi?” uyo Jehovah edi emi.+ “Mîdịghe nte ukpọn̄ mi ikposioho idụt eke etiede ntem usiene?”+
10 “Mbufo ẹdọk ẹdidụk mme udịm vine esie ẹnyụn̄ ẹbiat,+ edi ẹkûsobo enye fapfap.+ Ẹsịbe mme nsehe n̄kọk esie ẹfep, koro mmọ inyeneke Jehovah.+
11 Koro ufọk Israel ye ufọk Judah ẹmenen̄ede ẹnam n̄kpọ ye ami ke abian̄a,” uyo Jehovah edi emi.+
12 “Mmọ ẹmekan̄ Jehovah, ẹnyụn̄ ẹdọhọ ẹte, ‘Enye idụhe.+ Baba afanikọn̄ kiet idisịmke nnyịn, nnyịn idinyụn̄ ikwe akan̄kan̄ m̀mê akan̄.’+
13 Ndien mme prọfet ẹmekabade ofụm, ikọ inyụn̄ idụhe ye mmọ.+ Ntem ke ẹdinam ye mmọ.”
14 Mmọdo ntem ke Jehovah, Abasi mme udịm, ọdọhọ ete: “Ke ntak emi mbufo ẹtịn̄de n̄kpọ emi, sese ami mmọn̄ nnam ikọ mi ke inua fo edi ikan̄,+ ndien mbon emi ẹyekabade ẹdi mbak ifia, enye oyonyụn̄ ata mmọ.”+
15 “Sese ami mmọn̄ nda idụt emi odude ke anyan ebiet ntiene mbufo,+ O ufọk Israel,” uyo Jehovah edi emi. “Enye edi idụt emi odude ebịghi.+ Enye edi idụt emi okodude toto ke eset, idụt emi mbufo mîfiọkke usem esie, mînyụn̄ ikemeke ndikop se mmọ ẹtịn̄de.
16 Odịp-idan̄ mmọ etie nte ana-in̄wan̄ udi; kpukpru mmọ ẹdi n̄kpọsọn̄ owo.+
17 Mmọ ẹyedia idọk fo ẹnyụn̄ ẹta uyo fo.+ Mbon oro ẹyeta nditọiren fo ye nditọiban fo. Mmọ ẹyeta mme erọn̄ fo ye mme enan̄ fo. Mmọ ẹyeta eto vine fo ye eto fig fo.+ Mmọ ẹyeda akan̄kan̄ ẹwụri mme obio ibibene fo emi afo ọbuọtde idem.”
18 “Ndien idem ke mme usen oro,” uyo Jehovah edi emi, “ami ndisoboke mbufo mfep.+
19 Ndien ama ekem, mbufo ẹyedọhọ ẹte, ‘Nso inam Jehovah Abasi nnyịn anam nnyịn kpukpru n̄kpọ emi?’+ Ndien afo ọyọdọhọ mmọ ete, ‘Kpa nte mbufo ẹkpọn̄de mi ẹnyụn̄ ẹkade ẹkenam n̄kpọ isen abasi ke isọn̄ mbufo, ntre ke mbufo ẹdinam n̄kpọ ẹnọ isenowo ke isọn̄ emi mîdịghe eke mbufo.’”+
20 Ẹtịn̄ emi ke ufọk Jacob, ẹnyụn̄ ẹkwọrọ enye ke Judah, ẹte:
21 “Ẹkop ke emi, O mbufo mme anana-ibuot owo emi mînyeneke esịt:+ Mmọ ẹmenyene enyịn, edi ikemeke ndikụt usụn̄;+ mmọ ẹmenyene utọn̄, edi ikemeke ndikop n̄kpọ.+
22 ‘Nte mbufo ikam ifeheke mi,’+ uyo Jehovah edi emi, ‘mîdịghe nte mbufo ikopke ọkpọsọn̄ ubiak ke ntak mi,+ emi nnịmde ntan nte adan̄a nnọ inyan̄, nsinsi ewụhọ emi enye mîkemeke ndibe? Okposụkedi mbufụt esie okpotde, kpa ye oro mmọ ikemeke ndikan; ndien okposụkedi mmọ ẹyomode, mmọ isụk ikemeke ndibe enye.+
23 Edi mbon emi ẹmekabade ẹnyene esịt ntụtutọn̄ ye eke nsọn̄ibuot; mmọ ẹmewaha ẹkpọn̄ usụn̄ ẹnyụn̄ ẹsan̄a ke usụn̄ idemmọ.+
24 Edi mmọ idọhọke ke esịt mmọ ite: “Ẹyak nnyịn ke emi ibak Jehovah Abasi nnyịn,+ Enye emi anamde edịm edep onyụn̄ anamde edịm ini idọk ye edịm ini utọ edep ke ini esie,+ Enye emi akam ekpemede mme urua oro ẹdoride ẹnọ idọk, ọnọ nnyịn.”+
25 Mme ndudue mbufo ẹmetan̄ mme n̄kpọ emi ẹfep, mme idiọkn̄kpọ mbufo inyụn̄ iyakke se ifọnde esịm mbufo.+
26 “‘Koro ẹmekụt mme idiọkowo ke otu ikọt mi.+ Mmọ ẹsụk ẹsese, nte ke ini emi mme omụm inuen ẹkûbọde ke isọn̄.+ Mmọ ẹmekọk afia nsobo. Mmọ ẹmụm owo.
27 Kpa nte mme edibotn̄kpọ emi ẹfede ẹyọhọde akpasa, ntre ke abian̄a ọyọhọ mme ufọk mmọ.+ Oro edi ntak emi mmọ ẹkabarede ẹkponi ẹnyụn̄ ẹnyenede n̄kpọ.+
28 Mmọ ẹmekpon ubom;+ mmọ ẹmekabade ẹsem. Ndiọi n̄kpọ ẹmeyọhọ mmọ idem n̄ko. Mmọ ibiereke baba ikpe kiet,+ ikam ibiereke ikpe eyenakpa,+ man mmọ ẹkpekụt unen;+ mmọ inyụn̄ ikpehe ikpe mme ubuene.’”
29 “Nte n̄kpokotke mmọ ẹdinam ibat ẹban̄a mme n̄kpọ emi,” uyo Jehovah edi emi, “mîdịghe nte ukpọn̄ mi ikposioho idụt eke etiede ntem usiene?+
30 Ẹmenam idaha oro akpade owo idem ye oburobụt n̄kpọ ẹdu ke isọn̄:+
31 Mme prọfet ẹmetịn̄ ntịn̄nnịm ikọ ke nsu;+ ndien amaedi mme oku, mmọ ẹmewọrọ ẹkekan nte odudu mmọ edide.+ Ndien ikọt mi ẹma ntre;+ mbufo ẹdinyụn̄ ẹnam didie ke utịt esie?”+
