Jeremiah 8;1-22
8 “Ke ini oro,” uyo Jehovah edi emi, “mme owo ẹyesion̄o n̄ko mme ọkpọ ndidem Judah ye mme ọkpọ mbọn̄ esie ye mme ọkpọ mme oku ye mme ọkpọ mme prọfet ye mme ọkpọ mme andidụn̄ Jerusalem ẹfep ke mme udi mmọ.+
2 Ndien mmọ ẹyesuan mmọ ẹbon ẹnọ utịn ye ọfiọn̄ ye ofụri udịm enyọn̄ oro mmọ ẹmade ẹnyụn̄ ẹnamde n̄kpọ ẹnọ ẹnyụn̄ ẹtienede+ ẹnyụn̄ ẹyomde ẹnyụn̄ ẹnụhọde ẹnọ.+ Owo iditan̄ke mmọ, idinyụn̄ ibụkke mmọ. Mmọ ẹyekabade ẹtie nte ifụm ke iso isọn̄.”+
3 “Ndien kpukpru mbon oro ẹsụhọde ke idiọk idụt emi, ke kpukpru ebiet emi ami ndibịnde mmọ ndọn̄,+ ẹyemek n̄kpa utu ke uwem,”+ uyo Jehovah mme udịm edi emi.
4 “Ndien afo enyene ndidọhọ mmọ ete, ‘Ntem ke Jehovah ọdọhọ ete: “Nte mmọ ẹyeduọn̄ọ ndien idahake aba ida?+ Edieke owo afiakde edem, nte owo enye eken idifiakke edem n̄ko?+
5 Ntak emi mbio emi, Jerusalem, ẹsụk ẹkade iso ke unana edinam akpanikọ? Mmọ ẹsọn̄ọ ẹmụm abian̄a ẹkama;+ mmọ ẹmesịn ndifiak edem.+
6 Ami mmakpan̄ utọn̄+ nnyụn̄ n̄kop.+ Nte mmọ ẹketịn̄de ikọ ikọfọnke. Baba owo kiet ikatuaha n̄kpọfiọk ke idiọkn̄kpọ+ esie inyụn̄ idọhọ ite, ‘Nso ke nnam emi?’ Owo kiet kiet afiak okodụk ọsọ usụn̄,+ nte enan̄-mbakara emi obụmerede aka ekọn̄.
7 Inuen inyan̄ ke enyọn̄ etịm ọfiọk edikem ini esie;+ ndien mbomon̄kuku+ ye akadan̄abasi ye ekụran̄ ẹtịm ẹfiọk ini emi mmọ kiet kiet ẹdidụkde ẹdi. Edi amaedi ikọt mi, mmọ ifiọkke ubiereikpe Jehovah.”’+
8 “‘Mbufo ẹkeme didie ndidọhọ ẹte: “Nnyịn idi mbon ọniọn̄, ibet Jehovah onyụn̄ odu ye nnyịn”?+ Ke akpanikọ, nsunsu eton̄wed+ mme ewetn̄wed anam utom ke nsu.
9 Mbon ọniọn̄ ẹmedia bụt.+ Idem emenyek mmọ ndien ẹyemụm mmọ. Sese! Mmọ ẹmesịn ikọ Jehovah, ndien nso ọniọn̄ ke mmọ ẹnyene?+
10 Mmọdo nyada ibanndọ mmọ nnọ irenowo en̄wen, nda in̄wan̄ mmọ nnọ mbon oro ẹdade mmọ ẹnyene;+ koro, ọtọn̄ọde ke n̄kpri-n̄kan tutu esịm n̄kponn̄kan, kpukpru mmọ ke ẹdia idiọk udori;+ ọtọn̄ọde ke prọfet tutu esịm oku, kpukpru mmọ ke ẹnam n̄kpọ ke abian̄a.+
11 Ndien mmọ ẹdomo ndikọk unan eyenan̄wan ikọt mi enyọn̄ enyọn̄,+ ẹte: “Emem! Emem!” ke ini emem mîdụhe.+
12 Nte bụt ama anam mmọ ke ntak emi mmọ ẹkenamde mbubiam n̄kpọ?+ N̄kpọ kiet edi, bụt ikanamke mmọ ndomo esisịt; n̄kpọ efen edi, mmọ ikakam ifiọkke se idide esuene.+
“‘Mmọdo mmọ ẹyeduọn̄ọ ke otu mbon oro ẹduọn̄ọde. Mmọ ẹyetuak ukot ẹduọn̄ọ ke ini emi ẹdiwọn̄ọrede enyịn ẹse mmọ,’+ Jehovah ọdọhọ.+
13 “‘Ke ini ẹtetde n̄kpọ, nyanam mmọ ẹsịm utịt,’ uyo Jehovah edi emi.+ ‘Baba grape kiet ididụhe ke vine,+ baba fig kiet ididụhe ke eto fig, ikọn̄ oyonyụn̄ eyemede. Ndien mme n̄kpọ oro nnọde mmọ ẹyebe mmọ.’”
14 “Ntak emi nnyịn idopde itie? Ẹsop idem mbufo ọtọkiet, ẹnyụn̄ ẹyak nnyịn idụk mme obio ibibene+ inyụn̄ idu ke ndobo do. Koro Jehovah Abasi nnyịn amanam nnyịn idu ke ndobo,+ enye omonyụn̄ ọnọ nnyịn mmọn̄ emi ẹsịnde ibọkn̄kpa ete in̄wọn̄,+ koro nnyịn imanam idiọkn̄kpọ idue Jehovah.
15 Nnyịn ikodori enyịn ke emem, edi eti n̄kpọ idụhe;+ idori enyịn ke ini ukọk unan, edi, sese! akwa ndịk!+
16 Ẹmekop mme enan̄-mbakara esie ẹfiaride ke ibuo ke Dan.+ Ofụri isọn̄ emenyek ke ntak uyom nyara enan̄-mbakara esie.+ Ndien mmọ ẹdụk ẹdi ẹdidia isọn̄ ye se iyọhọde ke esịt, obio ye mme andidụn̄ ke esịt.”
17 “Koro sese, ami mmọn̄ ndọn̄ mme urụkikọt utom ke ọtọ mbufo, ndiọi urụkikọt,+ emi nduọhọ mîkomke,+ ndien mmọ iditreke ndidom mbufo,” uyo Jehovah edi emi.
18 Mfụhọ oro mînyeneke usọbọ emesịm mi.+ Esịt mi ọdọn̄ọ.
19 Kop uyo eyet eyenan̄wan ikọt mi emi enye atuade ke anyan idụt oyom un̄wam, ete:+ “Nte Jehovah idụhe ke Zion?+ Mîdịghe nte edidem esie idụhe ke esịt esie?”+
“Ntak emi mmọ ẹdade ndisọi mbiet mmọ ye ikpîkpu isen abasi mmọ ẹyat mi esịt?”+
20 “Ini ukpen̄e emebe, ndaeyo emesịm utịt; edi owo inyan̄ake nnyịn!”+
21 Unan+ eyenan̄wan ikọt mi emem mi idem.+ Mmokop mfụhọ. Idem akpa mi etieti.+
22 Nte balsam idụhe ke Gilead?+ Mîdịghe nte ọkọkudọn̄ọ idụhe do?+ Ntak emi usọbọ mîdụhe+ inọ eyenan̄wan ikọt mi ndifiak n̄kop nsọn̄idem?+
