Job 30;1-31
30 “Ndien, ke emi, mmọ ẹmesak mi,+Kpa mbon emi nsọn̄ọde ke emana,+Emi n̄kpesịnde ndida mme ete mmọNnịm ye mme ebua emi ẹkpemede ufene mi.
2 Odudu ubọk mmọ—enyene nso ufọn ọnọ mi?
Odudu okụre mmọ ke idem.+
3 Ke ntak unana ye biọn̄, uwem idụhe mmọ aba ke idem,Mmọ ẹkwek edisat ebiet,+Emi ekedide ebiet oyobio ye nsobo n̄kpọn̄ emi ekebede.
4 Mmọ ẹketet ikọn̄ unụn̄ ke ikọt,Orụn̄ eto ndiyan̄ ẹkenyụn̄ ẹdi udia mmọ.
5 Ẹyebịn mmọ ẹsion̄o ke obio;+Mme owo ẹyeyomo mmọ nte ẹyomode inọ.
6 Mmọ ẹyedụn̄ ke ebeden̄ itịghede mmọn̄,Ke mme obube ntan ye ke mme aba ikpọ itiat.
7 Mmọ ẹyefiori ke ọwọk ikọt;Mmọ ẹyeboho ọtọkiet ke idak ntán.
8 Nditọ anana-ibuot+ owo, ye nditọ owo emi mînyeneke enyịn̄,Ẹmebịn mmọ ẹfep ke obio.
9 Ndien, ke emi, ndikabade ndi ikwọ+ mmọ,Ndinyụn̄ ndi ufiet+ mmọ.
10 Mmọ ẹmesua mi, ẹmeda nsannsan ẹkpọn̄ mi;+Mmọ inyụn̄ itreke ndifiari mi etap+ ke iso.
11 Koro enye atatde urụk utịgha mi onyụn̄ osụhọrede mi enịm,Mmọ ẹnyụn̄ ẹtat n̄kpahainua enan̄ ke ntak mi.
12 Mmọ ẹdaha ẹda ke ubọk nnasia mi nte nditọ unam;Mmọ ẹmesana ikpat mi ẹyak,Edi mmọ ẹbon enyene-ndịk n̄kpọ ubiọn̄ọ ke iso mi.+
13 Mmọ ẹmebiat ọkpọusụn̄ mi;N̄kukụre ufọn mmọ ẹdi ndinọ mi afanikọn̄,+Mmọ inyeneke andin̄wam ndomokiet.
14 Mmọ ẹbe ẹdi nte n̄kpọ eke ẹsan̄ade ke akamba ufan̄ ẹbe;Mmọ ẹkpot ẹdi ke oyobio.
15 Mbabuat n̄kpọndịk emesịm mi;Ẹbịn ubọn̄ mi ẹfep nte ofụm,Edinyan̄a mi omonyụn̄ ebe efep nte idiọk enyọn̄.
16 Ndien, ke emi, ẹn̄wan̄a ukpọn̄ mi ẹduọk;+Mme usen ukụt+ ẹsịm mi.
17 Ẹmetịbi mme ọkpọ+ mi ke okoneyo, mmọ ẹnyụn̄ ẹton̄ode mi ke idem,Ubiak emi n̄kopde inyeneke nduọkodudu.+
18 Akwa odudu anam ọfọn̄idem mi okpụhọde;Enye ọbọp mi nte itọn̄ ewụra mi.
19 Enye omosụhọde mi enịm ke mbat,Tutu ndikabade ntie nte ntan ye ntọn̄.
20 Ami nseme n̄kot fi nyom un̄wam, edi afo uyereke mi;+Mmadaha ndada man afo ọnọ mi ntịn̄enyịn.
21 Afo omokpụhọde akabade anam mi ibak;+Afo amada ofụri odudu ubọk fo asua mi.
22 Afo ememen mi otop esịn ke ofụm, onyụn̄ anam mi ndoro ke esịt n̄wat;Ekem afo anam mi nsuana ke oyobio.
23 Koro mmetịm mfiọk nte ke afo ayanam mi mfiak edem ke n̄kpa,+Nnyụn̄ n̄ka ke ufọk emi kpukpru mme odu-uwem ẹsopde idem.
24 N̄kukụre edi nte ke idụhe owo eke osiode ubọk ọtọ ibombom n̄wụre,+M̀mê ndiseme nyom un̄wam nnọ owo eke ataharede ke ini afanikọn̄.
25 Ke akpanikọ ami mmatua mban̄a owo eke usen esie ọdiọkde;+Ukpọn̄ mi omofụhọ aban̄a ubuene.+
26 Okposụkedi emi n̄ketiede mbet se ifọnde, idiọk akabade edi;+Nnyụn̄ ntiede mbet un̄wana, ekịm edi.
27 Nsia oyomo mi inyụn̄ idoboke;Mme usen ukụt ẹsịm mi.
28 Nsan̄a ke mfụhọ+ n̄kanade ke ini un̄wana utịn mîdụhe;Ndaha ke enyọn̄ ke esop, ntua nyom un̄wam.
29 Mmakabade ndi eyeneka jackal,Nnyụn̄ ndi nsan̄a nditọ ostrich.+
30 Ikpaidem mi akabade ebre+ onyụn̄ ọfọrọde mi ke idem,Mme ọkpọ mi ẹnyụn̄ ẹkabade ẹfiop sia ẹsatde.
31 Ndien harp mi akabade edi n̄kpọ mfụhọ,Ifiom mi onyụn̄ akabade edi uyo ọnọ mbon ntuan̄a.
