John 10;1-42
10 “Ke ata akpanikọ ke ndọhọ mbufo, Owo eke mîsan̄ake enyịnusụn̄+ ibe idụk ufọkerọn̄, edi otode ebiet efen ọdọk odụk, edi inọ ye owo n̄wo.+
2 Edi owo eke asan̄ade enyịnusụn̄+ ebe odụk edi ekpemerọn̄.+
3 Ekpeme-usụn̄+ eberede usụn̄ ọnọ enye, erọn̄+ ẹnyụn̄ ẹkop uyo esie, ndien enye okot erọn̄ esiemmọ ke enyịn̄ onyụn̄ ada mmọ ọwọrọ.
4 Ke enye ama akatan̄ kpukpru se inyenede enye ọwọrọ, enye ebem mmọ iso, mme erọn̄ ẹnyụn̄ ẹtiene+ enye, koro mmọ ẹfiọkde uyo esie.+
5 Mmọ iditieneke esenowo tutu amama, utu ke oro ẹdifefehe+ enye, koro mmọ mîfiọkke uyo isenowo.”+
6 Jesus ekemen uwụtn̄kpọ emi etịn̄ ọnọ mmọ; edi mmọ ifiọkke se mme n̄kpọ emi enye eketịn̄de ọnọ mmọ ẹwọrọde.+
7 Ndien Jesus ọtọn̄ọ ntak ọdọhọ ete: “Ke ata akpanikọ ke ndọhọ mbufo, Ami ndi enyịnusụn̄+ nnọ mme erọn̄.
8 Kpukpru mbon oro ẹdide ẹdidọhọ ke mmimọ idi mi ẹdi mme inọ ye mbon n̄wo;+ edi mme erọn̄ ikopke uyo mmọ.+
9 Ami ndi enyịnusụn̄;+ ẹyenyan̄a owo ekededi eke edibede ke ami idụk, enye eyebe odụk onyụn̄ ebe ọwọrọ oyonyụn̄ okụt se adiade.+
10 Inọ+ idịghe ke mîbọhọke man eyịp onyụn̄ owot onyụn̄ osobo.+ Ami ndi man mmọ ẹkpenyene nsinsi uwem.
11 Ami ndi eti ekpemerọn̄;+ eti ekpemerọn̄ ayak ukpọn̄ esie ọnọ kaban̄a mme erọn̄.+
12 Owo emi ẹkpede-kpe,+ oro mîdịghe ekpemerọn̄, emi mme erọn̄ mînyụn̄ inyeneke enye, okụt wolf nte edide ndien ọkpọn̄ mme erọn̄ efehe—ndien wolf omụm mmọ onyụn̄ asuan mmọ+—
13 koro enye edi owo emi ẹkpede-kpe+ inyụn̄ ikereke iban̄a mme erọn̄.+
14 Ami ndi eti ekpemerọn̄, mmonyụn̄ mfiọk mme erọn̄ mi,+ mme erọn̄ mi ẹnyụn̄ ẹfiọk mi,+
15 kpa nte Ete mi ọfiọkde mi ami nnyụn̄ mfiọkde Ete;+ mmonyụn̄ nyak ukpọn̄ mi nnọ kaban̄a mme erọn̄.+
16 “Mmonyụn̄ nnyene mme erọn̄ en̄wen,+ emi mîtoho ke ufọkerọn̄ emi;+ ana nda mmọ oro n̄ko ndi, ndien mmọ ẹyekop uyo mi,+ mmọ ẹyenyụn̄ ẹkabade ẹdi otuerọn̄ kiet, ekpemerọn̄ kiet oyonyụn̄ odu.+
17 Ntak edi oro Ete amade mi,+ koro nyakde ukpọn̄ mi nnọ,+ man n̄kpọtọn̄ọ ntak mbọ.
18 Idịghe baba owo kiet ọbọ mi, edi ami nyak enye nnọ ke idemmi. Mmenyene odudu ndiyak enye nnọ, mmonyụn̄ nnyene odudu nditọn̄ọ ntak mbọ.+ Ami n̄kọbọ Ete mi ewụhọ+ aban̄ade emi.”
19 Ubahade+ ọtọn̄ọ ntak asiaha ke otu mme Jew kaban̄a ikọ emi.
20 Ediwak ke otu mmọ ẹdọhọ ẹte: “Enye enyene demon+ onyụn̄ adama idat. Nso inam ẹkpan̄de utọn̄ ẹnọ enye?”
21 Mmọ eken ẹdọhọ ẹte: “Emi idịghe ikọ owo emi enyenede demon. Nte demon ekeme nditat nnan enyịn?”
22 Usọrọ ediyak nnọ akada itie ini oro ke Jerusalem. Ekedi ini etuep,
23 ndien Jesus adaha asan̄a ke temple ke etehe Solomon.+
24 Ndien mme Jew ẹkan enye ẹkụk ẹnyụn̄ ẹbụp enye ẹte: “Adan̄a didie ke afo edinam ukpọn̄ nnyịn odu ke eyịghe? Edieke afo edide Christ,+ tịn̄ nọ nnyịn in̄wan̄-in̄wan̄.”+
25 Jesus ọbọrọ mmọ ete: “Mma ntịn̄ nnọ mbufo, edi mbufo inịmke ke akpanikọ. Mme utom eke ami ndade enyịn̄ Ete mi nnam, mmọ emi ẹtie ntiense ẹban̄a mi.+
26 Edi mbufo inịmke ke akpanikọ, koro mbufo mîdịghe erọn̄ mi.+
27 Mme erọn̄ mi+ ẹkop uyo mi, ami mmonyụn̄ mfiọk mmọ, ndien mmọ ẹtiene mi.+
28 Ami nnyụn̄ nnọ mmọ nsinsi uwem,+ ndien owo idisoboke mmọ tutu amama,+ baba owo kiet idinyụn̄ iwamakede mmọ isio mi ke ubọk.+
29 Se Ete mi+ ọnọde mi okpon akan kpukpru n̄kpọ eken,+ ndien baba owo kiet ikemeke ndiwamade mmọ nsio Ete mi ke ubọk.+
30 Ami ye Ete idi kiet.”+
31 Mme Jew ẹtọn̄ọ ntak ẹtan̄ itiat ẹyom nditọn̄ọ enye.+
32 Jesus ọbọrọ mmọ ete: “Mma n̄wụt mbufo ediwak nti utom emi ẹtode Ete. Ewe ke otu mme utom emi ke mbufo ẹtọn̄ọ mi ke itiat?”
33 Mme Jew ẹbọrọ enye ẹte: “Idịghe ke ntak eti utom ke nnyịn itọn̄ọ fi ke itiat, edi itọn̄ọ fi ke ntak emi osụn̄ide Abasi,+ koro afo emi akam edide owo, enịm idem ke abasi.”+
34 Jesus ọbọrọ mmọ ete: “Nte owo ikewetke ke Ibet+ mbufo ite, ‘Ami ndọhọ nte: “Mbufo ẹdi mme abasi”’?+
35 Edieke enye okokotde mbon oro ikọ Abasi okobiomde ikpe ‘mme abasi,’+ edi kpa ye oro N̄wed Abasi ikemeke ndikpu,+
36 nte mbufo ẹdọhọ mi emi Ete akanamde asana onyụn̄ osiode ọdọn̄ ke ererimbot ẹte, ‘Afo omosụn̄i Abasi,’ koro ndọhọde nte, Ami ndi Eyen Abasi?+
37 Edieke ami mmenamke utom+ Ete mi, ẹkûnịm mi ke akpanikọ.
38 Edi edieke ami nnamde mmọ, idem ọkpọkọm mbufo inịmke mi ke akpanikọ, ẹnịm utom+ oro ke akpanikọ, man mbufo ẹkpedi ẹdifiọk ẹnyụn̄ ẹka iso ẹfiọk ẹte ke Ete abuana n̄kpọ ye ami, ami nnyụn̄ mbuana n̄kpọ ye Ete.”+
39 Ntre mmọ ẹtọn̄ọ ntak ẹdomo ndifịk enye mmụm;+ edi enye efehe ọbọhọ mmọ.+
40 Ntre enye afiak ebe aka edem Jordan oko emi John ekebemde iso enịm owo baptism,+ onyụn̄ okodu do.
41 Ndien ediwak owo ẹtiene enye, mmọ ẹnyụn̄ ẹdọhọ ẹte: “Ke akpanikọ John ikanamke baba idiọn̄ọ kiet, edi adan̄a ediwak n̄kpọ emi John eketịn̄de aban̄a owo emi ẹkedi akpanikọ.”+
42 Ndien ediwak owo ẹbuọt idem ye enye do.+
