Jonah 1;1-17
1 Ndien uyo Jehovah esịm Jonah+ eyen Amittai, ete:
2 “Daha ke enyọn̄, ka Nineveh,+ akwa obio, katan̄a ban̄a enye ete ke idiọkn̄kpọ mmọ ọmọdọk edi ke iso mi.”+
3 Ndien Jonah adaha ke enyọn̄ ete ifehe ika Tarshish+ ikpọn̄ iso Jehovah;+ ndien ke akpatre enye osụhọde edisịm Joppa+ onyụn̄ okụt nsụn̄ikan̄ emi akade Tarshish. Ntre enye ekpe okụk onyụn̄ osụhọde odụk ke esịt, man asan̄a ye mmọ aka Tarshish onyụn̄ ọkpọn̄ iso Jehovah.
4 Ndien Jehovah anam ọkpọsọn̄ ofụm efịme ke inyan̄,+ akamba oyobio+ onyụn̄ ọwọrọ ke inyan̄; ndien nsụn̄ikan̄ oro ekpere ndiwụre.
5 Ntre ndịk anam mme awat-inyan̄, mmọ kiet kiet ẹnyụn̄ ẹfiori ẹkot mme abasi+ mmọ ẹyom un̄wam. Mmọ ẹnyụn̄ ẹsion̄o n̄kpoduoho ke nsụn̄ikan̄ ẹduọn̄ọ ke inyan̄, man nsụn̄ikan̄ ekpefere.+ Edi Jonah ama osụhọde odụk ata esịt esịt nsụn̄ikan̄ akana do ede ọkpọsọn̄ idap.+
6 Ekem etubom nsụn̄ikan̄ oro asan̄a ekpere enye onyụn̄ ọdọhọ enye ete: “Ekpe idap, afo edede nso? Daha ke enyọn̄ fiori kot abasi fo!+ M̀mê ata Abasi eyekere aban̄a nnyịn, mbak nnyịn iditak.”+
7 Ndien mmọ ẹdọhọ kiet eken ẹte: “Mbufo ẹdi nnyịn isịn afia,+ man ifiọk m̀mê anie edi ntak emi afanikọn̄ emi esịmde nnyịn.”+ Ntre mmọ ẹsịn afia, ndien ke akpatre afia etịp Jonah.+
8 Ntre mmọ ẹdọhọ enye ẹte: “Mbọk, sian nnyịn, anie anam afanikọn̄ emi esịm nnyịn?+ Nso idi ubọkutom fo, afo onyụn̄ oto m̀mọ̀n̄? Idụt mbufo edi ewe, afo onyụn̄ edi owo ewe orụk?”
9 Ntre enye ọbọrọ mmọ ete: “Ami ndi eyen Hebrew,+ nnyụn̄ mbak+ Jehovah Abasi enyọn̄,+ kpa Enye emi akanamde inyan̄ ye obot.”+
10 Ndien ndịk anam mbon oro etieti, mmọ ẹnyụn̄ ẹbụp enye ẹte: “Nso ke afo anam emi?”+ Koro mbon oro ẹma ẹdifiọk ẹte ke enye ekefehe ọkpọn̄ iso Jehovah, koro enye ama asian mmọ.
11 Ke akpatre mmọ ẹbụp enye ẹte: “Nnyịn inam fi+ didie man inyan̄ emi odobo ọnọ nnyịn?” Koro inyan̄ ọdiọn̄de-diọn̄ adama idat.
12 Ntre enye ọbọrọ mmọ ete: “Mbufo ẹmen mi ẹtop ẹsịn ke inyan̄, ndien inyan̄ oyodobo ọnọ mbufo; koro mmọfiọk nte ke akamba oyobio emi esịm mbufo ke ntak mi.”+
13 Edi mbon oro ẹdomo ndiwat mfiak edem n̄kadian ke obot; edi mmọ ikemeke, koro inyan̄ ọdiọn̄de-diọn̄ adama idat.+
14 Ndien mmọ ẹfiori ẹkot Jehovah, ẹte:+ “O Jehovah, mbọk, kûyak nnyịn itak ke ntak ukpọn̄ owo emi! Kûnyụn̄ uda iyịp owo eke mîduehe udori nnyịn,+ koro afo O Jehovah anamde kpa nte amade!”+
15 Ekem mmọ ẹmen Jonah ẹtop ẹsịn ke inyan̄; ndien inyan̄ odobo inyụn̄ idamake aba.+
16 Ndien mbon oro ẹbak Jehovah etieti,+ mmọ ẹnyụn̄ ẹwa uwa ẹnọ Jehovah+ ẹnyụn̄ ẹkan̄a akan̄a.+
17 Ndien Jehovah emek akamba iyak kiet ete emen Jonah emen,+ ntre Jonah odu ke idịbi iyak oro uwemeyo ita ye okoneyo ita.+
