Joshua 8;1-35
8 Ndien Jehovah ọdọhọ Joshua ete: “Kûfehe ndịk, kûnyụn̄ uyak idem enyek fi.+ Da kpukpru mbonekọn̄, ẹnyụn̄ ẹdaha ke enyọn̄, ẹdọk ẹka Ai. Sese, mmada edidem Ai ye ikọt esie ye obio esie ye isọn̄+ esie nsịn fi ke ubọk.
2 Ndien afo ayanam Ai ye edidem esie kpa nte akanamde Jericho ye edidem esie.+ Edi mbufo ẹmekeme ndida mme n̄kpọ mbụme ye mme ufene esie ke idem mbufo.+ Nịm mbon udịbe mbufo ke edem obio.”+
3 Ntem ke Joshua ye kpukpru mbonekọn̄+ ẹdaha ke enyọn̄ ẹka Ai, ndien Joshua emek owo tọsịn edịp ye duop, n̄kpọsọn̄ mbon uko,+ onyụn̄ ọdọn̄ mmọ ẹka ke okoneyo.
4 Enye onyụn̄ owụk mmọ ete: “Sese, mbufo ẹyedịbe+ ke edem obio ẹbet. Ẹkûnen̄ede ẹka anyan ẹkpọn̄ obio, ndien kpukpru mbufo ẹdu ke mben̄eidem.
5 Ami ye kpukpru mbon emi ẹdude ye ami iyasan̄a ikpere obio oro. Ndien ama ekem, edieke mmọ ẹdiwọrọde ẹbịne nnyịn nte ẹkenamde ke akpa,+ nnyịn iyefen̄e ke iso mmọ.
6 Ndien mmọ ẹyewọrọ ẹbịne nnyịn tutu nnyịn inam mmọ ẹwọrọ ẹkpọn̄ obio, koro mmọ ẹdidọhọde ẹte, ‘Mmọ ẹfen̄e ke iso nnyịn kpa nte ẹkefen̄ede ke akpa.’+ Ndien nnyịn iyefen̄e ke iso mmọ.
7 Ekem mbufo ẹyewọn̄ọ ke itie udịbe, ẹnyụn̄ ẹda obio oro ẹnyene; ndien Jehovah Abasi mbufo iditreke-tre ndida enye nsịn mbufo ke ubọk.+
8 Ndien ama ekem ke ndondo oro mbufo ẹdade obio oro ẹnyene, mbufo ẹnyene ndifọp obio oro ke ikan̄.+ Mbufo ẹdinam kpa nte Jehovah eketemede mbufo. Sese, mmowụk mbufo.”+
9 Ke oro ama ekebe, Joshua osio mmọ ọdọn̄ ndien mmọ ẹka ẹkedịbe ke itie udịbe ke ufọt Bethel ye Ai ke edem usoputịn Ai, ke adan̄aemi Joshua odude ye mbon eken ke okoneyo oro.
10 Ekem Joshua abak adaha ke enyọn̄ ke usenubọk+ onyụn̄ asan̄a ese kpukpru owo, ndien enye ye kpukpru mbiowo Israel, ẹbem kpukpru owo iso ẹdọk ẹka Ai.
11 Ndien kpukpru mbonekọn̄+ emi ẹdude ye enye ẹdọk ẹka, man mmọ ẹkpesan̄a ẹkeda ke iso obio oro, mmọ ẹnyụn̄ ẹnam nna ke edem edere Ai, itịghede onyụn̄ odu ke ufọt mmọ ye Ai.
12 Ndien enye osio owo tọsịn ition enịm ke itie udịbe+ ke ufọt Bethel+ ye Ai, ke edem usoputịn obio oro.
13 Ntre kpukpru owo ẹnam akpan itienna ke edem edere obio+ oro, ndien utịt utịt edem obio+ oro okodu ke edem usoputịn, Joshua onyụn̄ osụhọde ekesịm ufọt unaisọn̄ itịghede oro ke okoneyo.
14 Ndien edikem ke ndondo oro edidem Ai okụtde emi, mbio obio ẹbak ẹdaha ke enyọn̄, enye ye kpukpru ikọt esie, ẹnyụn̄ ẹsọsọp ẹwọrọ ẹka ekọn̄ ye Israel, ke ini oro ẹkenịmde mbemiso ẹsịmde unaisọn̄ desat. Edi enye ifiọkke ke mbon udịbe ẹma ẹdịbe ẹbet imọ ke edem obio.+
15 Ke ini etiede nte ke mmọ ẹkan,+ Joshua ye ofụri Israel ẹsan̄a usụn̄ wilderness ẹfen̄e.+
16 Ndien mmọ ẹfiori ẹkot kpukpru mbon emi ẹkedude ke obio ẹte ẹbịne mmọ, ndien mmọ ẹbịne Joshua tutu ẹwọrọ ẹkpọn̄ obio.+
17 Ndien baba owo kiet ikosụhọke ke Ai ye Bethel eke mîkọwọrọke ibịne Israel, tutu mmọ ẹyak obio ẹnịm in̄wan̄ ẹnyụn̄ ẹbịne Israel.
18 Ndien Jehovah ọdọhọ Joshua ete: “Sio eduat emi afo akamade ke ubọk nyan ke Ai,+ koro mmọn̄ nda enye nsịn fi ke ubọk.”+ Ntem ke Joshua osio eduat emi enye akamade ke ubọk anyan ke obio oro.
19 Ndien mbon udịbe oro ẹdaha ke itie mmọ iwiwa, ẹnyụn̄ ẹmen itọk ke ndondo oro enye osiode ubọk esie anyan, ndien mmọ ẹdụk obio ẹnyụn̄ ẹkan enye.+ Ekem mmọ ẹsọsọp ẹfọp obio oro ke ikan̄.+
20 Ndien mbon Ai ẹwọn̄ọde ẹse edem, ndien sese, nsụn̄ikan̄ ke ọwọrọ ke obio oro ọdọk enyọn̄, mmọ inyụn̄ ikemeke ndifehe n̄ka ebiet ekededi. Ndien nditọ Israel emi ẹkefen̄ede ẹka wilderness ẹkabade ẹbịne mbon oro ẹkebịnede mmọ.
21 Edikem ke adan̄aemi Joshua ye ofụri Israel ẹkụtde ke mbon udịbe+ ẹda obio ẹnyene, ye nte ke nsụn̄ikan̄ ke ọwọrọ ke obio ọdọk, mmọ ẹwọn̄ọde ẹda ẹwot mbon Ai.
22 Ndien mbon udịbe ẹto ke obio ẹdisobo ye mmọ, tutu Israel ẹkụk mbon Ai ẹsịn ke ufọt, mbon emi ẹda ke n̄kan̄ emi ndien mbon eken ẹda ke n̄kan̄ eken, ẹnyụn̄ ẹwot mmọ tutu baba owo mmọ kiet ifeheke ibọhọ.+
23 Ndien mmọ ẹmụm edidem+ Ai ye uwem ẹda ẹsọk Joshua.
24 Edikem ke adan̄aemi Israel okụrede ndiwot kpukpru mbon Ai oro ẹdude ke an̄wa, ke wilderness emi ẹkebịnede mmọ ẹka, kpukpru mmọ ẹduọn̄ọ ke iso akan̄kan̄ tutu ẹwot mmọ ẹma. Ekem ofụri Israel ẹfiak ẹka Ai ẹnyụn̄ ẹkesobo enye ke iso akan̄kan̄.
25 Ndien kpukpru mbon oro ẹkewotde ke usen oro, ọtọn̄ọde ke erenowo tutu esịm n̄wan, ẹkedi owo tọsịn duopeba, kpa kpukpru mbon Ai.
26 Ndien Joshua ikosụkke ubọk oro enye okosiode eduat anyan+ tutu enye osobo kpukpru mme andidụn̄ Ai ama.+
27 Edi mme ufene ye mme n̄kpọ mbụme obio oro kpọt ke Israel ẹkeda ke idemmọ, kpa nte Jehovah okowụkde Joshua.+
28 Ndien Joshua ọfọp Ai onyụn̄ anam enye akabade edi ibombom ke nsinsi,+ enye onyụn̄ ana n̄wụre tutu esịm mfịn emi.
29 Ndien enye eyịri edidem Ai+ ke eto tutu esịm mbubreyo;+ ndien ke ini utịn osụhọrede, Joshua ọnọ uyo, ndien ẹkọn̄ọde okpo+ esie ẹkeduọk ke inuaotop obio oro ẹnyụn̄ ẹkịbi enye akamba ebok itiat ke idem tutu esịm mfịn emi.
30 Adan̄aoro ke Joshua akanam itieuwa+ ọnọ Jehovah Abasi Israel, ke Obot Ebal,+
31 kpa nte Moses asan̄autom Jehovah okowụkde nditọ Israel, nte ẹwetde ke n̄wed ibet+ Moses, ẹte: “Itieuwa emi ẹdade itiat oro owo mîsiakke ẹnam, emi owo mîkamake n̄kpọutom ukwak inam”;+ ndien mmọ ẹfọp edifọp uwa ke itie emi ẹnọ Jehovah ẹnyụn̄ ẹwa uwa ebuana do.+
32 Ndien enye osion̄o+ ibet oro Moses ekewetde ke iso nditọ Israel,+ ewet ke itiat oro.
33 Ndien ofụri Israel ye mbiowo+ mmọ ye ikpọ owo ye mme ebiereikpe mmọ ẹda ke n̄kan̄ Ekebe emi ye ke n̄kan̄ eken ke iso mme oku,+ kpa nditọ Levi emi ẹbiomde ekebe ediomi Jehovah,+ isenowo ye mme amanaisọn̄,+ ubak mmọ ẹda ke iso Obot Gerizim+ ndien ubak eken ẹda ke iso Obot Ebal,+ (kpa nte Moses asan̄autom Jehovah okowụkde,)+ ete ẹbem iso ẹdiọn̄+ mbon Israel.
34 Ekem enye okot kpukpru ikọ ibet+ oro uyo ọwọrọ, edidiọn̄+ ye isụn̄i,+ nte ekemde ye ofụri se ẹwetde ke n̄wed ibet oro.
35 Ndien idụhe baba ikọ kiet emi Moses okowụkde oro Joshua mîkokotke uyo ọwọrọ ke iso ofụri esop Israel,+ ọkọrọ ye iban+ ye nditọwọn̄+ ye isenowo+ emi ẹkedude ke otu mmọ.
