Judges 14;1-20
14 Ndien Samson osụhọde aka Timnah+ okokụt n̄wan kiet ke otu nditọiban Philistia ke Timnah.
2 Ntre enye ọdọk edidọhọ ete ye eka esie ete: “Odu n̄wan kiet emi n̄kụtde ke otu nditọiban Philistia ke Timnah, mbufo ẹdọ enye ẹnọ mi.”+
3 Ndien ete ye eka esie ẹbụp enye ẹte: “Nte afo ukwe n̄wan+ ndomokiet ke otu nditọiban nditọete fo ye ke orụk nnyịn, emi anamde fi aka ndida n̄wan ke otu mbon Philistia+ edụt emi?” Edi Samson osụk ọdọhọ ete esie ete: “Dọ kpa enye oro nọ mi, koro enye ikpọn̄ ọfọn mi ke enyịn.”
4 Edi ete ye eka esie ikọfiọkke ite ke n̄kpọ emi oto Jehovah,+ nte ke enye okoyom ifet ndida n̄n̄wana ye mbon Philistia, koro mbon Philistia ẹkekarade Israel+ adan̄aoro.
5 Ntem Samson asan̄a ye ete ye eka esie ẹsụhọde ẹka Timnah.+ Ke ini enye esịmde in̄wan̄ vine Timnah, sese! abak ayara ekpe ọbiọn̄ọde enye ke iso okụni.
6 Ndien spirit Jehovah edidoro enye ke idem,+ enye onyụn̄ awak ekpe oro mbak iba, kpa nte owo awakde abak okpo ebot, inyụn̄ ikamake n̄kpọ ndomokiet ke ubọk. Enye inyụn̄ itịn̄ke inọ ete ye eka esie se enye akanamde.
7 Ndien enye osụhọde aka eketịn̄ ikọ ye n̄wan oro; ndien enye osụk ọfọn Samson ke enyịn.+
8 Ekem enye edifiak aka ndida enye nnyọn̄ ufọk.+ Enye onyụn̄ awaha ete ise okpo ekpe oro, ndien sese, otu ọkwọk ye aranọkwọk+ ẹyọhọ okpo ekpe oro.
9 Ntre enye ọkọrọde ọdọn̄ ke ekaubọk esie adaha, asan̄a adia.+ Ke ini enye edide edisobo ye ete ye eka esie, enye ọnọ mmọ ndusụk, mmọ ẹnyụn̄ ẹdia. Enye inyụn̄ itịn̄ke inọ mmọ ite ke imọ ikọkọrọde aranọkwọk oro ke okpo ekpe.
10 Ndien ete esie osụhọde ekesịm n̄wan oro, Samson onyụn̄ enịm usọrọ do;+ koro ntem ke n̄kparawa ẹkam ẹsinam.
11 Edikem ke ndondo oro mmọ ẹkụtde enye, mmọ ẹda mbet ebendọ edịp ye duop ẹte ẹdu ye enye.
12 Ndien Samson ọdọhọ mmọ ete: “Mbọk, yak ntop n̄ke kiet ise nnọ mbufo.+ Edieke mbufo ẹdisiakde enye ẹnọ mi ke ini usọrọ usen itiaba+ emi, ẹnyụn̄ ẹnam enye an̄wan̄a, nyọnọ mbufo ọfọn̄ idakidem edịp ye duop ye edisịnen̄kpọ edịp ye duop.+
13 Edi edieke mbufo mîdikemeke ndisiak enye nnọ mi, mbufo ẹyenọ mi ọfọn̄ idakidem edịp ye duop ye edisịnen̄kpọ edịp ye duop.” Ndien mmọ ẹdọhọ enye ẹte: “Ọfọn, top n̄ke fo ise nnyịn ikop.”
14 Ntre enye ọdọhọ mmọ ete:
“Se ẹdiade ọkọwọrọ oto andita,+Inịn̄e okonyụn̄ ọwọrọ+ oto se idide ọkpọsọn̄.”
Ndien mmọ ikemeke ndisiak n̄ke oro ke usen ita.
15 Edikem ke ọyọhọ usen inan̄ mmọ ẹdọhọ n̄wan Samson ẹte: “Tap ebe fo man enye asiak n̄ke oro ọnọ nnyịn.+ Mîdịghe ntre nnyịn iyọfọp fi, inyụn̄ ifọp ufọk usọ ke ikan̄.+ Ndi mbufo ẹkekot nnyịn idi mi man mbufo ẹdida inyene+ nnyịn?”
16 Mmọdo n̄wan Samson atua ọnọ ebe esie+ ete: “Afo asasua mi, unyụn̄ umaha mi.+ Afo ama otop n̄ke ọnọ nditọ orụk mi+ edi usiakke enye unọ mi.” Ntem enye ọdọhọ enye ete: “Akamedi ete ye eka mi nsiakke nnọ,+ nte ndisiak nnọ fi ndien?”
17 Edi n̄wan esie eyịre atua ọnọ enye ke ofụri usen usọrọ itiaba oro, edikem ke ọyọhọ usen itiaba enye asiak ndien ọnọ enye, koro enye ekeyịrede ebe esie.+ Ndien n̄wan emi aka akasiak n̄ke oro ọnọ nditọ orụk esie.+
18 Ndien ke ọyọhọ usen itiaba, mbemiso enye odụkde esịt ubet,+ mbio obio ẹka ẹkedọhọ enye ẹte:“Nso n̄kpọ inịn̄e ikan aranọkwọk,Nso ikponyụn̄ idi ọkpọsọn̄ ikan ekpe?”+Ntre enye ọdọhọ mmọ ete:“Ke mbufo mîkpadaha eyen enan̄ mi ifụn̄ isọn̄,+Mbufo ikpasiakke n̄ke mi.”+
19 Ndien spirit Jehovah edidoro enye ke idem,+ enye onyụn̄ osụhọde aka Ashkelon+ okowot owo edịp ye duop ke otu mmọ onyụn̄ osion̄o mmọ se mmọ ẹkesịnede, ada edisịnen̄kpọ mmọ ọsọk mme andisiak n̄ke+ oro. Esịt onyụn̄ ọdọdiọn̄ ayat enye, ndien enye ebe ọnyọn̄ ufọk ete esie.
20 Ndien kiet ke otu mbet+ ebendọ emi ekesisan̄ade ye Samson ada n̄wan+ esie oro ọdọ.
