Judges 21;1-25
21 Ndien irenowo Israel ẹma ẹn̄wọn̄ọ ke Mizpah,+ ẹte: “Baba owo nnyịn kiet idinọhọ owo Benjamin eyen esie an̄wan ọdọ.”+
2 Mmọdo kpukpru owo ẹdi Bethel,+ ẹditie do ke iso ata Abasi+ tutu esịm mbubreyo, ẹnyụn̄ ẹmenede uyo ẹtua eyet+ etieti.
3 Ndien mmọ ẹseme ẹte: “O Jehovah Abasi Israel, ntak emi utọ n̄kpọ emi etịbede ke Israel, emi esien kiet osopde ke Israel+ mfịn emi?”
4 Edikem ke ndan̄nsiere, mmọ ẹbak ẹdemede ke usenubọk ẹbọp itieuwa do ẹnyụn̄ ẹwa edifọp uwa+ ye uwa ebuana.+
5 Ekem nditọ Israel ẹdọhọ ẹte: “Anie osụhọ ke otu mme esien nditọ Israel emi mîdọkke idi esop itiene Jehovah, koro ẹma ẹda akwa un̄wọn̄ọ+ ẹban̄a owo eke mîdọkke itiene Jehovah ke Mizpah, ẹte, ‘Enye iditreke ndikpa.’+
6 Ndien mbọm anam nditọ Israel aban̄a Benjamin eyenete mmọ. Mmọ ẹnyụn̄ ẹdọhọ ẹte: “Ẹmesịbe esien kiet ẹfep mfịn emi ke Israel.
7 Nso ke nnyịn idinam iban̄a mbon emi ẹsụhọde emi mînyeneke ibanndọ, ke emi nnyịn ke idem nnyịn ima ikada Jehovah in̄wọn̄ọ+ ite ke nnyịn idinọhọ mmọ nditọiban nnyịn ke ndọ?”+
8 Ekem mmọ ẹdọhọ ẹte: “Ewe ke otu esien Israel mîdọkke itiene Jehovah ke Mizpah?”+ Ndien, sese! baba owo kiet itoho ke Jabesh-gilead+ idi esop ke itienna.
9 Ke ini ẹbatde owo, sese! baba andidụn̄ Jabesh-gilead kiet ikodụhe.
10 Ntem esop oro ọdọn̄ ata mbon uko tọsịn duopeba ete ẹka do, onyụn̄ ọnọ mmọ uyo ete: “Mbufo ẹka ẹkewot mme andidụn̄ Jabesh-gilead ke iso akan̄kan̄, ọkọrọ ye iban ye nditọwọn̄.+
11 Ndien se mbufo ẹdinamde edi emi: Mbufo ẹsobo+ kpukpru irenowo, ye kpukpru iban emi ẹma ẹkenyene ebuana ye erenowo.”
12 Ndien, mmọ ẹkụt nditọiban ikie inan̄ ke Jabesh-gilead,+ emi mîfiọkke erenowo,+ emi akanam mînyeneke ebuana ye erenowo. Ntre mmọ ẹda mmọ ẹwọrọ ẹdi itienna ke Shiloh,+ emi odude ke isọn̄ Canaan.
13 Ndien ofụri esop ẹdọn̄ utom ẹnọ nditọ Benjamin emi ẹdude ke aba akwa itiat Rimmon+ ẹnyụn̄ ẹdọhọ mmọ ẹte ẹdi inam emem.
14 Ekem nditọ Benjamin ẹfiak ẹnyọn̄ ẹdi. Ndien mmọ ẹda iban oro mmọ ẹkenịmde uwem ke otu iban Jabesh-gilead+ ẹnọ mmọ; edi mmọ ikwe iban ekem mmọ.+
15 Mbọm onyụn̄ anam kpukpru owo aban̄a Benjamin+ koro Jehovah esịnde utọk ke ufọt mme esien Israel.
16 Mmọdo mbiowo esop ẹbụp ẹte: “M̀mọ̀n̄ ke nnyịn idikụt iban inọ irenowo emi ẹsụhọde, koro ẹmesobo iban ẹfep ke Benjamin?”
17 Ndien mmọ ẹbọrọ ẹte: “Ẹkpenyene ndida udeme isọn̄ nnọ mbon oro ẹbọhọde ke Benjamin,+ man ẹkûsọhi esien kiet ke Israel ẹfep.
18 Edi, owo inyịmeke nnyịn ida nditọiban nnyịn inọ mmọ ke ndọ, koro nditọ Israel ẹken̄wọn̄ọde ẹte, ‘Ọdọdiọk ọnọ owo eke adade n̄wan ọnọ owo Benjamin.’”+
19 Ke akpatre mmọ ẹdọhọ ẹte: “Sese! Usọrọ Jehovah esidu kpukpru isua ke Shiloh,+ emi odude ke edem edere Bethel, ke n̄kan̄ edem usiahautịn ọkpọusụn̄ oro otode Bethel aka Shechem+ onyụn̄ akade edem usụk Lebonah.”
20 Ntre mmọ ẹdọhọ nditọ Benjamin ẹte: “Mbufo ẹka ẹkedịbe ke in̄wan̄ vine ẹbet.
21 Mbufo ẹnyụn̄ ẹse, ke adan̄aemi nditọiban Shiloh ẹwọn̄ọde ẹdi ndinek+ unek,* mbufo owo kiet kiet ẹwọrọ ẹmụm n̄wan ẹnọ idem mbufo ke otu nditọiban Shiloh, ẹnyụn̄ ẹnyọn̄ ẹka isọn̄ Benjamin.
22 Ndien edieke mme ete mmọ m̀mê nditọete mmọ ẹdide ndinam ikọ ye nnyịn, nnyịn n̄ko iyọdọhọ mmọ ite, ‘Mbọk ẹtua mmọ mbọm ke ntak nnyịn, koro nnyịn mîkadaha iban ke ekọn̄+ isọk mmọ owo kiet kiet, koro idịghe mbufo ẹda iban ẹnọ mmọ emi akpanamde ikpe obiom+ mbufo.’”
23 Ndien nditọ Benjamin ẹnam kpasụk ntre, ẹnyụn̄ ẹda iban oro ẹkemde ye ibat+ mmọ ke otu iban emi ẹnekde unek+ ẹkanade, emi mmọ ẹkemụmde; ekem mmọ ẹdaha ẹnyọn̄ ẹka mme udeme isọn̄ mmọ, ẹkebọp+ mme obio oro ẹnyụn̄ ẹdụn̄ ke esịt.
24 Ekem nditọ Israel ẹdaha ẹkpọn̄ do, ẹnyọn̄ọ esien mmọ ye ubon mmọ kiet kiet; ẹnyụn̄ ẹnyọn̄ ẹka udeme+ isọn̄ mmọ.
25 Ke eyo oro edidem ndomokiet ikodụhe ke Israel.+ Kpukpru owo ẹkenam se ededi oro enende mmọ ke enyịn.+
Mme Ikọ Idakisọn̄
^ M̀mê, “edinek unek n̄kanade.”
