Judges 3;1-31
3 Mmọ emi ẹdi mme idụt+ oro Jehovah akayakde ẹdu man akpada mmọ odomo+ Israel ese, oro edi, kpukpru mbon oro mîkekwe ekọn̄ ndomokiet ke otu ekọn̄ oro ẹken̄wanade ke Canaan;+
2 ẹkenam emi man mme emana nditọ Israel ẹnyene ifiọk ekọn̄, man ẹkpep mmọ ekọn̄, oro edi, kpukpru mbon oro mîkenyeneke ifiọk iban̄a ekọn̄:
3 Mbọn̄+ Philistia+ ition oro ẹdianade kiet, ye kpukpru mbon Canaan,+ idem ye mbon Sidon+ ye mme Hivite+ emi ẹdụn̄de ke Obot Lebanon,+ ọtọn̄ọde ke Obot Baal-hermon+ tutu esịm ebiet emi ẹtode ẹdụk Hamath.+
4 Ndien ẹda mmọ ẹdomo+ Israel man ẹfiọk m̀mê mmọ ẹyenịm mme ewụhọ Jehovah oro enye akadade Moses owụk mme ete ete mmọ.+
5 Ndien nditọ Israel ẹdụn̄ ke otu mbon Canaan,+ mme Hittite ye mme Amorite ye mme Perizzite ye mme Hivite ye mbon Jebus.+
6 Ndien mmọ ẹda nditọiban mmọ ẹdọ,+ ẹnyụn̄ ẹda nditọiban mmọ ẹnọ nditọiren mmọ ke ndọ,+ ẹnyụn̄ ẹnam n̄kpọ ẹnọ mme abasi mmọ.+
7 Ntem ke nditọ Israel ẹkenam se idiọkde ke enyịn Jehovah, ẹnyụn̄ ẹfre Jehovah Abasi+ mmọ ẹnyụn̄ ẹka ẹkenam n̄kpọ ẹnọ Baal+ ye mme eto utuakibuot.+
8 Ndien Jehovah enen̄ede ayat esịt ye Israel,+ ndien enye ayak+ mmọ esịn ke ubọk Cushan-rishathaim edidem Mesopotamia,+ ndien nditọ Israel ẹnam n̄kpọ ẹnọ Cushan-rishathaim ke isua itiaita.
9 Ekem nditọ Israel ẹseme ẹkot Jehovah ẹyom un̄wam.+ Ndien Jehovah anam andinyan̄a+ adaha ada ke otu nditọ Israel man anyan̄a mmọ, oro edi, Othniel+ eyen Kenaz,+ kpa ekpri eyenete Caleb.+
10 Edikem spirit+ Jehovah odoro enye ke idem, ndien enye akabade edi ebiereikpe ke Israel. Ke ini enye ọwọrọde aka ekọn̄, Jehovah ada Cushan-rishathaim, kpa edidem Syria esịn enye ke ubọk, enye onyụn̄ akan+ Cushan-rishathaim.
11 Ke oro ebede, isọn̄ oro ana sụn̄ ke isua aba. Ekem Othniel eyen Kenaz akpa.
12 Ndien nditọ Israel ẹtọn̄ọ ntak ẹnam se idiọkde ke enyịn Jehovah.+ Ntem ke Jehovah anam Eglon kpa edidem Moab+ ọsọn̄ ubọk akan Israel,+ koro mmọ ẹkenamde se idiọkde ke enyịn Jehovah.+
13 N̄ko-n̄ko, enye anam nditọ Ammon+ ye Amalek+ ẹsop idem ndin̄wana ye mmọ. Ntem ke mmọ ẹka ẹken̄wana ye nditọ Israel ẹnyụn̄ ẹda obio eyop+ ẹnyene.
14 Ndien nditọ Israel ẹka iso ẹnam n̄kpọ ẹnọ Eglon kpa edidem Moab ke isua efịteta.+
15 Ekem nditọ Israel ẹseme ẹkot Jehovah ẹyom un̄wam.+ Ntre ke Jehovah anam andinyan̄a adaha ada ọnọ mmọ, kpa Ehud+ eyen Gera, eyen Benjamin,+ emi edide ufien.+ Edikem nditọ Israel ẹnọ enye utomo ada ọsọk Eglon kpa edidem Moab.
16 Ndien Ehud anam akan̄kan̄ ọnọ idemesie, ndien akan̄kan̄ oro enyene iso iba,+ uniọn̄ esie edi cubit kiet. Ndien enye ọbọbọ enye ke ifụhi+ nnasia esie ke idak ọfọn̄idem esie.
17 Ndien enye ayak utomo oro ọnọ Eglon kpa edidem Moab.+ Eglon okonyụn̄ edi owo emi okponde ubom etieti.
18 Edikem ke ini enye ama ọkọnọ utomo+ oro, enye osio mme andibiom utomo oro unyọn̄ iwiwa.
19 Ndien enye afiak edem ke itie usọi itiat ke Gilgal,+ onyụn̄ aka ọkọdọhọ ete: “O edidem, mmenyene ndịbe ikọ ndisian fi.” Ndien enye ọdọhọ ete: “Ẹtre uyom!” Ntre kpukpru mbon oro ẹkedude ye enye ẹwọn̄ọ ẹkpọn̄ enye.+
20 Ndien nte enye etiede ke mbịtmbịt ubet enyọn̄ ufọk oro enye enịmde ọnọ idemesie, Ehud odụk etiene enye. Ehud onyụn̄ ọdọhọ enye ete: “Mmenyene ikọ emi otode Abasi ndisian fi.” Ndien enye adaha ada ke ebekpo esie.
21 Ntem Ehud ada ubọk ufien esie afahade akan̄kan̄ ke ifụhi nnasia esie onyụn̄ onụk esịn enye ke idịbi.
22 Ito etiene mbubara n̄ko odụk tutu ikpọn̄ ofụk mbubara oro, enye inyụn̄ idụrike akan̄kan̄ oro isio enye ke idịbi, tutu ifuọ ọtọn̄ọ ndiwọrọ.
23 Ekem Ehud oto usụn̄ ofụm ọwọrọ, onyụn̄ eberi mme usụn̄ ubet enyọn̄ ufọk oro abaha enye onyụn̄ ọkọbi mmọ.
24 Enye ke idemesie ọwọrọ.+
Ekem mme asan̄autom esie ẹdi ẹdise, ndien ẹma ẹkọbi mme usụn̄ ubet enyọn̄ ufọk oro. Ntre mmọ ẹdọhọ ẹte: “Enye eken̄ idem+ ke mbịtmbịt esịt ubet.”
25 Ndien mmọ ẹbet tutu bụt anam mmọ, ndien, sese! idụhe baba owo kiet eke ebererede mme usụn̄ ubet enyọn̄ ufọk oro. Ekem mmọ ẹda ukpọhọde ẹkpọhọde usụn̄, ndien, sese! ọbọn̄ mmọ ama ọduọ ke isọn̄ akpa!
26 Amaedi Ehud, enye ama efehe ke adan̄aemi mmọ ẹkesụk ẹbetde, ndien asan̄a itie usọi itiat+ oro ebe onyụn̄ efehe aka Seirah.
27 Edikem ke enye ama ekesịm do enye efri nnụk+ ke obot obot ikpehe Ephraim;+ ndien nditọ Israel ẹto ke obot obot ikpehe oro ẹtiene enye ẹsụhọde, enye onyụn̄ ebe iso.
28 Ekem enye ọdọhọ mmọ ete: “Mbufo ẹtiene mi,+ koro Jehovah amada mme asua mbufo, kpa mbon Moab, esịn mbufo ke ubọk.”+ Ndien mmọ ẹtiene enye ẹnyụn̄ ẹkeda ke mme ebiet ube mmọn̄+ ke Jordan man ẹbiọn̄ọ mbon Moab, inyụn̄ iyakke owo ekededi ebe.
29 Ndien adan̄aoro ke mmọ ẹkewot mbon Moab, n̄kpọ nte owo tọsịn duop,+ kpukpru mmọ ẹdi mbon ubom,+ mbon uko; ndien baba owo kiet ifeheke ibọhọ.+
30 Israel onyụn̄ akan Moab ke usen oro; ndien isọn̄ oro ana sụn̄ ke isua anan̄.+
31 Shamgar+ eyen Anath eketiene enye edem, enye onyụn̄ ada n̄kpọ ukịm enan̄ owot mbon Philistia,+ owo ikie itiokiet; enye n̄ko ama onyụn̄ anyan̄a Israel.+
