Leviticus 10;1-20
10 Ekem nditọiren Aaron, Nadab ye Abihu,+ ẹda n̄kpọ ufọp incense+ mmọ ẹdi, ẹsịn ikan̄ ke esịt ẹnyụn̄ ẹdori incense,+ ndien mmọ ẹda esen ikan̄+ ẹdi ke iso Jehovah, emi enye mîkowụkke mmọ ite ẹnam.
2 Ntem ikan̄ oto iso Jehovah osụhọde edita mmọ,+ ntre mmọ ẹkpan̄a ke iso Jehovah.+
3 Ekem Moses ọdọhọ Aaron ete: “Ntem ke Jehovah ọdọhọ ete, ‘Yak mmọ eke ẹkperede mi+ ẹda mi ke edisana,+ ẹnyụn̄ ẹnọ mi ubọn̄+ ke iso kpukpru owo.’” Ndien Aaron isioroke uyo.
4 Ntre Moses okot Mishael ye Elzaphan, nditọiren Uzziel,+ eyeneka ete Aaron, onyụn̄ ọdọhọ mmọ ete: “Ẹsan̄a ẹkpere, ẹmen nditọete mbufo ẹsio ke iso edisana ebiet ẹka edem itienna.”+
5 Ntre mmọ ẹsan̄a ẹkpere ẹdimen mmọ ye ewụra ke idem ẹwọn̄ọ ẹka edem itienna, kpa nte Moses eketemede.
6 Ekem Moses ọdọhọ Aaron ye Eleazar ye Ithamar, nditọiren esie eken, ete: “Ẹkûyak idet asuahade mbufo ke ibuot,+ ẹkûnyụn̄ ẹwai ọfọn̄idem mbufo, mbak mbufo ẹdikpan̄a, enye edinyụn̄ ayat esịt ye ofụri esop;+ edi nditọete mbufo, kpa ofụri ufọk Israel, ẹdituan̄a ẹban̄a nsobo emi Jehovah adade ikan̄ osobo.
7 Edi mbufo ẹkûsan̄a ke enyịnusụn̄ tent usopidem ẹwọn̄ọ mbak mbufo ẹdikpan̄a,+ koro edisana aran* Jehovah eyerede mbufo ke idem.”+ Ntre mmọ ẹnam ke uyo Moses.
8 Ndien Jehovah ọdọhọ Aaron ete:
9 “Kûn̄wọn̄ wine m̀mê ọkpọsọn̄ mmịn,+ afo ye nditọiren fo emi ẹdude ye afo, ke ini mbufo ẹdụkde tent usopidem, mbak mbufo ẹdikpan̄a. Emi edi nsinsi ewụhọ ke ofụri emana mbufo,
10 man ẹnam ukpụhọde odu ke ufọt edisana n̄kpọ ye n̄kpọ emi ẹsabarede ye ke ufọt se idehede ye se isanade,+
11 man ẹnyụn̄ ẹkpep nditọ Israel+ kpukpru mme ewụhọ oro Jehovah akadade Moses owụk mmọ.”
12 Ekem Moses ọdọhọ Aaron ye Eleazar ye Ithamar, nditọiren esie emi ẹsụhọde, ete: “Ẹmen uwa n̄kpasịp+ emi okosụhọde ke mme uwa Jehovah emi ẹfọpde ke ikan̄ ẹta ke n̄kan̄ itieuwa, ẹkûsịn leaven, koro enye edide ata edisana n̄kpọ.+
13 Ndien mbufo ẹnyene ndita enye ke edisana ebiet,+ koro enye edide udeme fo ye udeme nditọiren fo ke uwa emi ẹfọpde ke ikan̄ ẹnọ Jehovah; koro ntem ke ẹkewụk mi.
14 Ndien mbufo ẹdita ikọn̄esịt edifụn̄ uwa+ ye ukot edisana udeme+ ke edisana ebiet, afo ye nditọiren fo ye nditọiban fo emi ẹdude ye afo,+ koro ẹsiode emi ke mme uwa ebuana nditọ Israel ẹnọ nte udeme fo ye eke nditọiren fo.
15 Mmọ ẹyeda ukot edisana udeme ye ikọn̄esịt edifụn̄ uwa+ ọkọrọ ye mbak emi ẹnyenede isek ke mme uwa emi ẹfọpde ke ikan̄ ẹdi, man ẹfụn̄ enye ẹka iso ẹfiak edem nte edifụn̄ uwa ke iso Jehovah; ndien enye eyedi udeme+ fo ye eke nditọiren fo emi ẹtienede fi, kpa nte Jehovah okowụkde.”
16 Ndien Moses etịm oyom ebot uwa idiọkn̄kpọ,+ ndien, sese! ẹma ẹfọfọp enye ẹma. Ndien enye ayat esịt ye Eleazar ye Ithamar, nditọiren Aaron emi ẹsụhọde, onyụn̄ ọdọhọ ete:
17 “Ntak emi mbufo mîkataha uwa idiọkn̄kpọ ke ebiet emi asanade,+ sia enye edide ata edisana n̄kpọ, enye onyụn̄ ayakde ọnọ mbufo ete mbufo ẹbiom ndudue ofụri esop man ẹsio isop ẹnọ mmọ ke iso Jehovah?+
18 Sese! Owo ikadaha iyịp esie idụk esịt edisana ebiet.+ Akpakana mbufo ẹta enye ke edisana ebiet, kpa nte ẹkewụkde mi.”+
19 Ntem Aaron ọdọhọ Moses ete: “Sese! Mmọ ẹmeda uwa idiọkn̄kpọ mmọ ye edifọp uwa mmọ ẹdi ke iso Jehovah+ mfịn emi, ke adan̄aemi utọ n̄kpọ emi ọwọrọde mi; ndien edieke n̄kpatade uwa idiọkn̄kpọ mfịn emi, nte emi ọkpọfọn Jehovah ke enyịn?”+
20 Ke ini Moses okopde n̄kpọ oro, n̄kpọ oro ọfọn enye ke enyịn.
Mme Ikọ Idakisọn̄
^ Oro edi, aran oro ẹdade ẹyet owo emi ẹmekde ẹsịn ke itieutom.
