Leviticus 12;1-8
12 Ndien Jehovah ọdọhọ Moses ete:
2 “Dọhọ nditọ Israel ete, ‘Edieke n̄wan oyomode+ onyụn̄ amande eyeneren, enye eyedehe ke usen itiaba; nte akam esidide ke mme usen emi enye odude ke ndek itieisọn̄ ke enye edidehe.+
3 Ndien ke ọyọhọ usen itiaita ẹyesịbe eyen oro edụt.+
4 Enye oyosụk odu ke ufọk ke usen edịp ye duopeta adian do man asana ke iyịp uman. Enye inyeneke nditụk baba edisana n̄kpọ kiet, enye inyụn̄ inyeneke ndidụk edisana ebiet tutu ekem usen eke ẹnamde enye asana.+
5 “‘Edi edieke enye amande eyenan̄wan, enye eyedehe ke usen duopenan̄, nte akam esidide ke ini emi enye odude ke itieisọn̄. Enye oyosụk odu ke ufọk ke usen ata ye itiokiet adian do man asana ke iyịp uman.
6 Ndien ke ekemde usen eke ẹnamde enye asana, edide kaban̄a eyeneren m̀mê eyenan̄wan, enye ayada abak okukịm erọn̄ eke mîbehe isua kiet edi nte edifọp uwa+ ye eyen ibiom m̀mê mbomon̄kuku+ nte uwa idiọkn̄kpọ edinọ oku ke enyịnusụn̄ tent usopidem.
7 Ndien oku ayada uwa oro edinọ ke iso Jehovah onyụn̄ osio isop ọnọ n̄wan emi, ndien enye ayasana ke iyịp oro ọkọwọrọde enye.+ Emi edi ibet emi ẹnọde n̄wan emi amande eyeneren m̀mê eyenan̄wan.
8 Edi edieke enye mîkemeke ndinọ erọn̄, yak enye ada mbomon̄kuku iba m̀mê nditọ ibiom+ iba edi, kiet ke edifọp uwa ndien enye eken ke uwa idiọkn̄kpọ, ndien oku oyosio isop+ ọnọ enye, enye oyonyụn̄ asana.’”
