Leviticus 13;1-59
13 Ndien Jehovah ọdọhọ Moses ye Aaron ete:
2 “Edieke n̄kpọ obụpde owo ke idem m̀mê n̄kikan+ m̀mê n̄kem odude, ndien oro akabade edi udọn̄ọ akpamfia+ ke ikpaidem esie, yak ẹda enye ẹsọk Aaron oku m̀mê kiet ke otu nditọiren esie emi ẹdide mme oku.+
3 Ndien yak oku ese udọn̄ọ oro ke ikpaidem.+ Ke ini idet emi etịbede ke itie udọn̄ọ oro afiade, nde udọn̄ọ oro onyụn̄ odụkde enye ikpaidem, enye edi udọn̄ọ akpamfia. Ndien oku enyene ndise nde oro nnyụn̄ ndọhọ ke enye edehe.
4 Edi edieke n̄kem oro edide afia ke ikpaidem esie ndien udọn̄ọ oro mîdụkke enye idem, idet esie mînyụn̄ ifiaha, oku enyene ndinam owo oro odu nsannsan+ ke usen itiaba.
5 Ndien oku enyene ndise owo oro ke ọyọhọ usen itiaba, ndien edieke etiede nte ke udọn̄ọ oro etre inyụn̄ itarake isuana ke ikpaidem, oku enyene ndinam owo oro odu nsannsan+ ke usen itiaba efen.
6 “Ndien oku enyene nditọn̄ọ ntak nse owo oro ke ọyọhọ usen itiaba, ndien edieke nde udọn̄ọ oro etiede ntọn̄ntọn̄ mînyụn̄ itarake iyọhọ enye ikpaidem, oku enyene ndidọhọ ke enye asana. Ekedi n̄kikan. Ndien enye enyene ndiyet ọfọn̄ esie ndien enye ayasana.
7 Edi edieke n̄kikan oro, nte eyịghe mîdụhe, atarade ọyọhọ enye ikpaidem ke enye ama okowụt oku idem man ese m̀mê enye asana, enye enyene nditọn̄ọ ntak n̄kowụt oku idem,+
8 ndien oku enyene ndise; ndien edieke n̄kikan oro atarade ọyọhọ enye ikpaidem, yak oku ọdọhọ ke enye edehe. Akpamfia edi oro.+
9 “Edieke udọn̄ọ akpamfia ọtọn̄ọde owo ke idem, yak ẹda owo oro ẹsọk oku.
10 Ndien oku enyene ndise;+ ndien edieke itie emi obụpde enye ke ikpaidem afiade onyụn̄ anamde idet itie oro akabade afia, unan+ onyụn̄ odude ke itie oro obụpde,
11 emi edi ata idiọk akpamfia+ ke ikpaidem esie; ndien oku enyene ndidọhọ ke enye edehe. Enye idinamke enye odu nsannsan,+ koro enye edehe.
12 Edi edieke akpamfia oro, nte eyịghe mîdụhe, ọtọn̄ọde ke ikpaidem, akpamfia oro onyụn̄ atarade ọyọhọ owo udọn̄ọ oro ofụri idem, ọtọn̄ọde ke ibuot esie tutu esịm ikpat, oku onyụn̄ okụtde;
13 ndien oku ese, ndien sese, akpamfia oro ọyọhọ enye ofụri idem, enye enyene ndidọhọ ke udọn̄ọ oro asana.* Ofụri idem esie akabade edi afia. Enye asana.
14 Edi ke usen eke unan odude enye ke idem, enye eyedehe.
15 Ndien oku+ enyene ndise unan oro, nnyụn̄ ndọhọ ke enye edehe. Unan oro edehe. Akpamfia edi oro.+
16 Mîdịghe edieke unan oro akpade onyụn̄ akabarede afia, enye enyene ndika mbịne oku.
17 Ndien oku enyene ndise enye,+ ndien edieke udọn̄ọ oro akabarede afia, oku enyene ndidọhọ ke owo udọn̄ọ oro asana. Enye asana.
18 “Edi edieke mbufụt+ ofụtde owo ke idem ndien ekem okụre,
19 ndien afia idem m̀mê n̄kem emi eyịbede omụhọde ọwọrọ ke itie mbufụt oro, enye enyene ndiwụt oku idem.
20 Ndien oku eyese,+ ndien edieke nde udọn̄ọ oro odụkde enye idem, idet itie oro onyụn̄ akabade afia, oku enyene ndidọhọ ke enye edehe. Udọn̄ọ akpamfia edi oro. Enye ọwọrọ oto mbufụt oro.
21 Edi edieke oku esede, ndien sese, afia idet idụhe, udọn̄ọ oro inyụn̄ idụkke enye idem edi etie ntọn̄ntọn̄, oku enyene ndinam enye odu nsannsan+ ke usen itiaba.
22 Ndien edieke enye, nte eyịghe mîdụhe, atarade ọyọhọ enye idem, oku enyene ndidọhọ ke enye edehe. Udọn̄ọ edi oro.
23 Edi edieke n̄kem oro adade ke itie esie, mînyụn̄ itarake, enye edi mbufụt emi obụpde;+ ndien oku enyene ndidọhọ ke enye asana.+
24 “Mîdịghe edieke mbọn ikan̄ odude owo ke ikpaidem, obụk itie oro onyụn̄ akabarede edi n̄kem emi eyịbede m̀mê afiade,
25 oku enyene ndise; ndien edieke idet itie n̄kem oro akabarede afia onyụn̄ odụkde idem, akpamfia edi oro. Enye ọwọrọ oto mbọn ikan̄ oro, ndien yak oku ọdọhọ ke enye edehe. Udọn̄ọ akpamfia edi oro.
26 Edi edieke oku esede, ndien sese, afia idet mîdụhe ke itie n̄kem oro, enye mînyụn̄ idụkke idem edi etiede ntọn̄ntọn̄, oku enyene ndinam enye odu nsannsan ke usen itiaba.
27 Ndien oku eyese enye ke ọyọhọ usen itiaba. Edieke udọn̄ọ emi, nte eyịghe mîdụhe, atarade ọyọhọ enye idem, yak oku ọdọhọ ke enye edehe. Udọn̄ọ akpamfia edi oro.
28 Edieke n̄kem oro adade ke itie esie, mînyụn̄ itarake iyọhọ enye idem edi etiede ntọn̄ntọn̄, mbọn ikan̄ emi obụpde edi oro; oku enyene ndidọhọ ke enye asana, koro enye edide mbọn ikan̄ emi obụpde.
29 “Edieke eren m̀mê n̄wan enyenede udọn̄ọ ke ibuot m̀mê ke ebek,
30 oku+ enyene ndise udọn̄ọ oro; ndien edieke odụkde enye idem, idet itie oro onyụn̄ etiede utouto onyụn̄ ebehede, oku enyene ndidọhọ ke owo oro edehe. Udọn̄ọ anam idet oro ebehe.+ Enye edi akpamfia ibuot m̀mê eke ebek.
31 Edi edieke oku okụtde udọn̄ọ oro anamde idet ebehe, ndien sese! udọn̄ọ oro idụkke enye idem, obubịt idet inyụn̄ itịbeke ke itie oro, oku enyene ndinam owo udọn̄ọ emi idet ebehede odu nsannsan+ ke usen itiaba.+
32 Ndien oku enyene ndise udọn̄ọ oro ke ọyọhọ usen itiaba; ndien edieke udọn̄ọ oro anamde idet ebehe mîtarake, idet itie oro mînyụn̄ itiehe utouto, udọn̄ọ oro anamde idet ebehe+ mînyụn̄ idụkke idem,
33 enye enyene ndikporo idet esie, edi enye idikporoke+ idet itie oro ebehede; oku enyene ndinam owo oro udọn̄ọ anamde idet ebehe odu nsannsan ke usen itiaba efen.
34 “Ndien oku enyene ndise udọn̄ọ oro anamde idet ebehe ke ọyọhọ usen itiaba; ndien edieke udọn̄ọ oro anamde idet ebehe mîtarake, mînyụn̄ idụkke idem, oku enyene ndidọhọ ke owo oro asana,+ ndien enye enyene ndiyet mme ọfọn̄ esie nnyụn̄ nsana.
35 Edi edieke udọn̄ọ oro anamde idet ebehe, nte eyịghe mîdụhe, atarade ke ẹma ẹkedọhọ ke enye asana,
36 oku+ enyene ndise enye; ndien edieke udọn̄ọ oro anamde idet ebehe atarade, yak oku okûkpa ndiyom utouto idet; owo oro edehe.
37 Edi edieke etiede nte ke udọn̄ọ oro anamde idet ebehe itarake, obubịt idet onyụn̄ etịbede, udọn̄ọ oro anamde idet ebehe omokụre. Enye asana, ndien oku enyene ndidọhọ ke enye asana.+
38 “Edieke n̄kem,+ oro edi, afia n̄kem odude eren m̀mê n̄wan ke ikpaidem,
39 oku+ enyene ndise; ndien edieke n̄kem emi odude ke ikpaidem mmọ etiede ntọn̄ntọn̄, enye idịghe idiọk udọn̄ọ. Enye ọwọrọ ke ikpaidem. Enye asana.
40 “Edieke idet okụrede owo ke ibuot, ibọ+ edi oro. Enye asana.
41 Ndien edieke idet okụrede ke ekoiso esie, enye edi ibọ ọkpọiso. Enye asana.
42 Edi edieke nde udọn̄ọ eke eyịbede odude ke ibọ etịn̄ibuot m̀mê eke ọkpọiso, akpamfia ọtọn̄ọ enye oro ke ibọ etịn̄ibuot m̀mê eke ọkpọiso.
43 Ndien oku+ enyene ndise enye; ndien edieke udọn̄ọ eke eyịbede obụpde ibọ etịn̄ibuot esie m̀mê ọkpọiso esie onyụn̄ ebietde akpamfia ke ikpaidem esie,
44 enye edi owo akpamfia. Enye edehe. Oku enyene ndidọhọ ke enye edehe. Udọn̄ọ esie odu enye ke ibuot.
45 Amaedi owo akpamfia emi udọn̄ọ oro anamde enye, enye enyene ndiwak ọfọn̄ esie,+ nnyụn̄ nsuahade idet ke ibuot,+ enye onyụn̄ enyene ndifụk n̄kaminua+ esie nnyụn̄ mfiori ete, ‘Edidehe, edidehe!’+
46 Enye eyedehe ke ofụri usen eke udọn̄ọ oro anamde enye. Enye edehe. Enye enyene ndidu nsannsan. Yak enye okodụn̄ ke edem itienna.+
47 “Edieke udọn̄ọ akpamfia odude ke ọfọn̄, edide ọfọn̄ idet erọn̄ m̀mê ọfọn̄ linen,
48 m̀mê ke ndidi+ m̀mê ke urụk-ọfọn̄ linen ye eke idet erọn̄, m̀mê ke ikpa m̀mê ke n̄kpọ ekededi eke ẹnamde ke ikpa,+
49 ndien udọn̄ọ oro edide awawa ye utouto m̀mê emi eyịbede odu ke ọfọn̄ m̀mê ke ikpa m̀mê ke ndidi m̀mê ke urụk-ọfọn̄ m̀mê ke n̄kpọ ekededi eke ẹnamde ke ikpa, udọn̄ọ akpamfia edi oro, ẹnyụn̄ ẹnyene ndimen enye n̄wụt oku.
50 Ndien oku+ enyene ndise n̄kpọ oro udọn̄ọ oro odude, onyụn̄ anam enye odu nsannsan+ ke usen itiaba.
51 Ke ini enye esede n̄kpọ oro udọn̄ọ oro odude ke ọyọhọ usen itiaba, onyụn̄ okụtde ete udọn̄ọ oro atara ọyọhọ ọfọn̄ m̀mê ndidi m̀mê urụk-ọfọn̄+ m̀mê ikpa m̀mê n̄kpọ ekededi eke ẹnamde ke ikpa, udọn̄ọ oro edi ata idiọk akpamfia.+ Enye edehe.
52 Ndien enye enyene ndifọp ọfọn̄ oro m̀mê ndidi m̀mê urụk-ọfọn̄ idet erọn̄ m̀mê eke linen,+ m̀mê n̄kpọ ekededi eke ẹnamde ke ikpa emi udọn̄ọ oro odude ke esịt, koro enye edi ata idiọk+ akpamfia. Ẹnyene ndifọp n̄kpọ emi ke ikan̄.
53 “Edi edieke oku esede, ndien sese, udọn̄ọ oro itarake iyọhọ ọfọn̄ m̀mê ndidi m̀mê urụk-ọfọn̄ m̀mê n̄kpọ ekededi eke ẹnamde ke ikpa,+
54 oku enyene ndidọhọ ẹyet se udọn̄ọ oro odude ke esịt, onyụn̄ anam enye odu nsannsan ke usen itiaba efen.
55 Ndien oku enyene ndise udọn̄ọ oro ke ẹma ẹkeyet n̄kpọ emi enye okodude ke esịt, ndien edieke nte udọn̄ọ oro etiede mîkpụhọkede, udọn̄ọ oro mînyụn̄ itarake, enye edehe. Fọp n̄kpọ emi ke ikan̄. Enye edi udọn̄ọ oro atade etịbi ndudu ke esịt m̀mê ke edem.
56 “Edi edieke oku esede, ndien sese, udọn̄ọ oro etie ntọn̄ntọn̄ ke ẹma ẹkeyet enye ẹma, yak enye awak enye osio ke ọfọn̄ oro m̀mê ke ikpa m̀mê ke ndidi m̀mê ke urụk-ọfọn̄.
57 Edi, edieke ẹtọn̄ọde ntak ẹkụt enye ke ọfọn̄ oro m̀mê ke ndidi m̀mê ke urụk-ọfọn̄+ m̀mê ke n̄kpọ ekededi eke ẹnamde ke ikpa, udọn̄ọ oro atara. Men se ededi emi udọn̄ọ oro odude ke esịt fọp+ ke ikan̄.
58 Amaedi ọfọn̄ m̀mê ndidi m̀mê urụk-ọfọn̄ m̀mê n̄kpọ ekededi eke ẹnamde ke ikpa oro afo ediyetde, ke ini udọn̄ọ oro ama okokụre ke esịt, ẹnyene nditọn̄ọ ntak nyet enye; ndien enye ayasana.
59 “Emi edi ibet emi aban̄ade udọn̄ọ akpamfia emi odụkde ọfọn̄ idet erọn̄ m̀mê linen,+ m̀mê ndidi m̀mê urụk-ọfọn̄, m̀mê n̄kpọ ekededi eke ẹnamde ke ikpa, man ẹkeme ndidọhọ ke n̄kpọ oro asana m̀mê edehe.”
Mme Ikọ Idakisọn̄
^ M̀mê, “ibehe owo.”
