Leviticus 14;1-57
14 Ndien Jehovah ọdọhọ Moses ete:
2 “Emi edidi ibet emi aban̄ade owo akpamfia+ ke usen emi ẹnamde enye asana, ke ini emi ẹdade enye ẹsọk oku.+
3 Ndien yak oku ọwọrọ aka edem itienna, onyụn̄ ekese; ndien edieke udọn̄ọ akpamfia okụrede+ owo akpamfia oro,
4 oku ndien enyene ndinọ uyo; ndien owo oro enyene ndida ndisana odu-uwem inuen+ iba ye eto cedar+ ye ididuot ndidi+ ye hyssop+ nnọ ẹda ẹnam enye asana.
5 Ndien oku enyene ndinọ uyo, ndien ẹyewot inuen kiet ke esombat ke enyọn̄ mmọn̄ idịm.+
6 Ndien yak enye ada odu-uwem inuen ye eto cedar ye ididuot ndidi ye hyssop, onyụn̄ edebi mmọ ye odu-uwem inuen oro ke iyịp inuen oro ẹkewotde ke enyọn̄ mmọn̄ idịm oro.
7 Ekem yak enye ada esịme+ owo oro ẹyomde ndinam asana ọbọhọ akpamfia mi utịm ikatiaba+ onyụn̄ ọdọhọ ke enye asana,+ ndien enye ayayak odu-uwem inuen oro efe ọnyọn̄ ikọt.+
8 “Ndien owo emi anamde idem asana mi enyene ndiyet ọfọn̄+ esie nnyụn̄ n̄kporo kpukpru idet esie nnyụn̄ nyere+ mmọn̄ man asana, ndien ekem enye ekeme ndidụk ndi itienna. Ndien enye enyene ndidụn̄ ke edem tent esie ke usen itiaba.+
9 Ndien ama ekem ke ọyọhọ usen itiaba enye enyene ndikporo kpukpru idet ke ibuot+ esie ye ke ebek esie nnyụn̄ n̄kwat nditanenyịn esie. Ih, enye enyene ndikporo kpukpru idet esie, nnyụn̄ nyet ọfọn̄ esie nnyụn̄ nyere mmọn̄; ndien enye ayasana.
10 “Ndien ke ọyọhọ usen itiaita+ enye ayada abak okukịm erọn̄ iba ye uman eyenerọn̄+ kiet emi ẹyede idem mînyụn̄ ibehe isua kiet, ye mbahade eti ndomuyo ephah ita ke itie duop nte uwa n̄kpasịp+ emi ẹbuakde aran ye aran ke udomo log kiet;+
11 ndien oku emi ọdọhọde ke enye asana enyene ndida owo oro anamde idem asana, ye mme n̄kpọ emi, ndi ke iso Jehovah ke enyịnusụn̄ tent usopidem.
12 Ndien oku enyene ndida abak okukịm erọn̄ kiet n̄wa nte uwa ubiomikpe+ ọkọrọ ye aran ke udomo log+ kiet onyụn̄ ofụn̄ mmọ aka iso afiak edem nte edifụn̄ uwa+ ke iso Jehovah.
13 Ndien enye enyene ndiwot abak okukịm erọn̄ oro ke ebiet+ emi ẹsiwotde unam uwa idiọkn̄kpọ ye unam edifọp uwa, ke edisana ebiet,+ koro uwa ubiomikpe, ukem nte uwa idiọkn̄kpọ, enyene oku.+ Enye edi ata edisana n̄kpọ.
14 “Ndien oku enyene ndida ndusụk iyịp uwa ubiomikpe nyet ke mben utọn̄ nnasia owo emi anamde idem asana ye ke akpan nnuenubọk nnasia esie ye ke akpan nnuenukot nnasia+ esie.
15 Ndien oku enyene ndida ndusụk aran ke udomo log+ kiet ntọhọ nsịn ke ekaubọk ufien esiemmọ.
16 Ndien oku enyene ndidebi nnuenubọk nnasia esie ke aran oro odude enye ke ekaubọk ufien nnyụn̄ nsịme aran oro odude enye ke nnuenubọk utịm ikatiaba+ ke iso Jehovah.
17 Ndien oku enyene ndida aran oro osụhọde ke ekaubọk esie nyet ke mben utọn̄ nnasia owo emi anamde idem asana ye ke akpan nnuenubọk nnasia esie ye ke akpan nnuenukot nnasia esie ke itie emi ẹkeyetde iyịp uwa ubiomikpe.+
18 Ndien oku ayada aran oro osụhọde emi odude enye ke ekaubọk eyet ke ibuot owo emi anamde idem asana, ndien oku enyene ndisio isop+ nnọ enye ke iso Jehovah.
19 “Ndien oku enyene ndiwa uwa idiọkn̄kpọ+ nnyụn̄ nsio isop nnọ owo emi anamde idem asana ọbọhọ ndek esie, ndien ekem enye oyowot unam edifọp uwa.
20 Ndien oku enyene ndiwa edifọp uwa ye uwa n̄kpasịp+ ke itieuwa, oku+ oyonyụn̄ osio isop ọnọ enye;+ ndien enye ayasana.+
21 “Edi edieke enye ebuenede+ mînyụn̄ inyeneke ukeme,+ enye ndien enyene ndida abak okukịm erọn̄ kiet nte uwa ubiomikpe nnọ ke edifụn̄ uwa man ẹsio isop ẹnọ enye onyụn̄ ada mbahade eti ndomuyo ephah kiet ke itie duop oro ẹbuakde aran nte uwa n̄kpasịp ye aran ke udomo log kiet,
22 ye mbomon̄kuku+ iba m̀mê nditọ ibiom iba, nte ukeme esie edide, ndien kiet edidi ke uwa idiọkn̄kpọ, enye eken edinyụn̄ edi ke edifọp uwa.
23 Ndien ke ọyọhọ usen itiaita+ enye enyene ndida mmọ nsọk oku ke enyịnusụn̄ tent usopidem,+ ke iso Jehovah, man ẹda ẹnam enye asana.+
24 “Ndien oku enyene ndida abak okukịm erọn̄ uwa ubiomikpe+ ye aran ke udomo log kiet ndi, oku onyụn̄ enyene ndifụn̄ mmọ n̄ka iso mfiak edem nte edifụn̄ uwa ke iso Jehovah.+
25 Ndien enye enyene ndiwot abak okukịm erọn̄ uwa ubiomikpe, oku onyụn̄ enyene ndida ndusụk iyịp uwa ubiomikpe oro nyet ke mben utọn̄ nnasia owo emi anamde idem asana ye ke akpan nnuenubọk nnasia esie ye ke akpan nnuenukot nnasia+ esie.
26 Ndien oku ọyọtọhọ ndusụk aran oro esịn ke ekaubọk ufien+ esiemmọ.
27 Ndien oku enyene ndidebi nnuenubọk nnasia esie ke aran oro odude enye ke ekaubọk ufien nnyụn̄ nsịme+ utịm ikatiaba ke iso Jehovah.
28 Ndien oku enyene ndida ndusụk aran oro odude enye ke ekaubọk nyet ke mben utọn̄ nnasia owo emi anamde idem asana ye ke akpan nnuenubọk nnasia esie ye ke akpan nnuenukot nnasia esie ke itie emi ẹkeyetde iyịp uwa ubiomikpe.+
29 Ndien oku ayada aran oro osụhọde enye ke ekaubọk eyet ke ibuot+ owo emi anamde idem asana man osio isop ọnọ enye ke iso Jehovah.
30 “Ndien enye enyene ndiwa kiet ke otu mbomon̄kuku oro m̀mê kiet ke otu nditọ ibiom oro nte ukeme+ owo oro edide,
31 kiet ekededi ke otu mmọ emi enye edinọde nte ukeme esie edide, edidi uwa idiọkn̄kpọ+ ndien enye eken edidi edifọp uwa+ ọkọrọ ye uwa n̄kpasịp; ndien oku enyene ndisio isop+ nnọ owo emi anamde idem asana ke iso Jehovah.
32 “Emi edi ibet emi aban̄ade owo emi enyenede udọn̄ọ akpamfia edi emi mînyeneke ukeme ke ini ẹnamde enye asana.”
33 Ndien Jehovah ọdọhọ Moses ye Aaron ete:
34 “Ke ini mbufo ẹdidụkde isọn̄ Canaan,+ emi nnọde mbufo ẹda ẹnyene,+ ndien ami nda udọn̄ọ akpamfia nsịn ke ufọk kiet ke isọn̄ emi mbufo ẹdidade ẹnyene,+
35 andinyene ufọk oro enyene ndika mbịne oku n̄kọdọhọ ete, ‘Etie mi nte udọn̄ọ odu ke ufọk mi.’
36 Ndien oku ọyọnọ uyo, ndien mmọ ẹnyene ndision̄o n̄kpọ mfep ke ufọk oro mbemiso oku odụkde edi ndise udọn̄ọ oro, mbak enye edidọhọ ke kpukpru n̄kpọ ke ufọk oro ẹdehe; ndien ekem oku oyodụk edi edise ufọk oro.
37 Ke ini enye okụtde udọn̄ọ oro, ndien edieke udọn̄ọ oro odude ke ibibene ufọk onyụn̄ edide utouto ye awawa m̀mê eyịbede onyụn̄ etịgherede odụk esịt ibibene,
38 oku ọyọwọrọ ke esịtufọk oro edida ke enyịnusụn̄ ufọk onyụn̄ anam owo okûdụk+ ufọk oro ke usen itiaba.
39 “Ndien oku enyene ndifiak n̄ka do ke ọyọhọ usen itiaba n̄kese;+ ndien edieke udọn̄ọ oro atarade asuana ke ibibene ufọk oro,
40 oku enyene ndinọ uyo, ndien mmọ ẹyesion̄o+ itiat itie emi udọn̄ọ oro odude, ẹnyụn̄ ẹtop mmọ ẹduọn̄ọ ke edem obio ke ebiet emi edehede.
41 Ndien enye ayanam ẹkwat ibibene esịtufọk oro ẹkanade, ndien mmọ ẹnyene nditop mbat ukọkufọk oro mmọ ẹkwatde ẹdian̄ade nduọn̄ọ ke edem obio ke ebiet emi edehede.
42 Mmọ ẹnyụn̄ ẹnyene ndida mme itiat efen nsịri ke itie n̄kani itiat oro; ndien yak enye anam ẹda mbat ukọkufọk efen ẹyọn̄ọ ufọk oro.
43 “Edi edieke udọn̄ọ oro ọtọn̄ọde ntak odụk ufọk oro ke ẹma ẹkesion̄o itiat ẹnyụn̄ ẹkwat ufọk oro ẹnyụn̄ ẹfiak ẹyọn̄ọ,
44 oku+ enyene ndidụk ndi nnyụn̄ ntịm nse; ndien edieke udọn̄ọ oro atarade asuana ke ufọk oro, enye edi ata idiọk akpamfia+ ke ufọk. Ufọk oro edehe.
45 Ndien enye enyene ndinam ẹwụri ufọk oro ye itiat esie ye eto esie ye kpukpru mbat ukọkufọk ufọk oro ẹnyụn̄ ẹbiom ẹkeduọn̄ọ ke edem obio ke ebiet emi edehede.+
46 Edi owo ekededi emi odụkde ufọk oro ke usen ekededi emi ẹdọhọde owo okûdụk+ eyedehe tutu esịm mbubreyo;+
47 ndien owo ekededi eke anade ke ufọk oro enyene ndiyet ọfọn̄+ esie, ndien owo ekededi eke adiade n̄kpọ ke ufọk oro enyene ndiyet ọfọn̄ esie.
48 “Edi edieke oku edide editịm ese, ndien sese, udọn̄ọ oro itarake isuana ke ufọk oro ke ẹma ẹkeyọn̄ọ ufọk oro, oku ndien enyene ndidọhọ ke ufọk oro asana, koro udọn̄ọ oro ama okụre.+
49 Ndien enye enyene ndida inuen+ iba ye eto cedar+ ye ididuot ndidi+ ye hyssop nnam ufọk oro asana ọbọhọ idiọkn̄kpọ.
50 Ndien enye enyene ndiwot inuen kiet ke esombat ke enyọn̄ mmọn̄ idịm.+
51 Ndien enye enyene ndimen eto cedar ye hyssop+ ye ididuot ndidi ye odu-uwem inuen oro ndebi ke iyịp inuen oro ẹkewotde ye ke mmọn̄ idịm, nnyụn̄ nda nsịme+ ke ufọk oro utịm ikatiaba.+
52 Ndien yak enye ada iyịp inuen oro ye mmọn̄ idịm ye odu-uwem inuen ye eto cedar ye hyssop ye ididuot ndidi anam ufọk oro asana ọbọhọ idiọkn̄kpọ.
53 Ndien enye enyene ndiyak odu-uwem inuen oro efe ọwọrọ ke obio ọnyọn̄ ikọt onyụn̄ osio isop+ ọnọ ufọk oro; ndien enye ayasana.
54 “Emi edi ibet emi aban̄ade udọn̄ọ akpamfia+ ekededi ye udọn̄ọ emi anamde idet ebehe+
55 ye akpamfia ke ọfọn̄+ ye ke ufọk,
56 ye n̄kpọ eke obụpde owo ke idem ye n̄kikan ye n̄kem,+
57 man ẹteme+ se ẹkpenamde ke ini n̄kpọ edehede ye ke ini n̄kpọ asanade. Emi edi ibet emi aban̄ade akpamfia.”+
