Leviticus 16;1-34
16 Ndien Jehovah etịn̄ ikọ ye Moses ke nditọ Aaron iba ẹma ẹkekpan̄a ke adan̄aemi mmọ ẹsan̄ade ẹkpere iso Jehovah, ẹnyụn̄ ẹkpan̄ade.+
2 Ekem Jehovah ọdọhọ Moses ete: “Dọhọ Aaron eyenuka ete enye okûdụk edisana ebiet+ emi odude ke esịt ikpehe+ kpukpru ini, ke iso okukịp emi okụbọde ke Ekebe, mbak enye edikpa;+ koro ami nyowụt idem ke obubịt enyọn̄+ emi ofụkde okukịp+ ekebe oro.
3 “Aaron enyene ndida mme n̄kpọ emi ndụk edisana ebiet:+ abak ayara enan̄ ke uwa idiọkn̄kpọ+ ye okukịm erọn̄ ke edifọp uwa.+
4 Enye enyene ndisịne edisana ewụra+ linen, ye ibio ọfọn̄ukot+ linen, enye onyụn̄ enyene ndibọbọ ubọpisịn+ linen nnyụn̄ mbọbọ mbọbọ ibuot+ linen. Mmọ ẹdi ndisana ọfọn̄.+ Ndien enye enyene ndiyere mmọn̄+ mbemiso esịnede mmọ.
5 “Ndien enye enyene ndibọ esop nditọ Israel+ abak okpo ebot iba ke uwa idiọkn̄kpọ+ ye okukịm erọn̄ kiet ke edifọp uwa.+
6 “Ndien Aaron enyene ndiwa ayara enan̄ uwa idiọkn̄kpọ, kaban̄a idemesie,+ enye onyụn̄ enyene ndisio isop+ idemesie+ ye eke ufọk esie.+
7 “Ndien enye enyene ndida ebot iba oro nnyụn̄ nnam mmọ ẹda ke iso Jehovah ke enyịnusụn̄ tent usopidem.
8 Aaron onyụn̄ enyene ndisịn afia+ mban̄a ebot iba oro, afia kiet edi eke Jehovah, afia enye eken onyụn̄ edi eke Azazel.*+
9 Ndien Aaron enyene ndiwa ebot oro afia+ okowụtde ke edi eke Jehovah nte uwa idiọkn̄kpọ.+
10 Edi amaedi ebot oro afia okowụtde ke edi eke Azazel, ẹnyene ndimen enye ye uwem ndinịm ke iso Jehovah man ẹda ẹsio isop, ẹnyụn̄ ẹnọ enye aka+ wilderness+ nte eke Azazel.
11 “Ndien Aaron enyene ndiwa ayara enan̄ uwa idiọkn̄kpọ, kaban̄a idemesie, onyụn̄ enyene ndisio isop idemesie ye eke ufọk esie; ndien enye enyene ndiwot ayara enan̄ uwa idiọkn̄kpọ, kaban̄a idemesie.+
12 “Ndien enye enyene ndisio mbubek ikan̄ ke itieuwa+ emi odude ke iso Jehovah nsịn nyọhọ n̄kpọ ufọp incense,+ nnyụn̄ n̄wobi eti edifuọn̄ incense+ nyọhọ ekaubọk esie mbiba,+ nnyụn̄ nda mmọ ndụk esịt ikpehe.+
13 Enye enyene n̄ko ndidọn̄ incense oro ke ikan̄ ke iso Jehovah,+ ndien nsụn̄ikan̄ incense oro enyene nditara mfụk okukịp+ Ekebe, emi okụbọde ke Ntiense,+ mbak enye edikpa.
14 “Ndien enye enyene ndida ndusụk iyịp ayara enan̄+ oro ke nnuenubọk esie nsịme+ ke iso okukịp oro ke n̄kan̄ edem usiahautịn, nnyụn̄ nda ndusụk iyịp oro ke nnuenubọk esie nsịme utịm ikatiaba ke iso okukịp oro.+
15 “Ndien enye enyene ndiwot ebot uwa idiọkn̄kpọ, emi edide eke mbio obio,+ enye onyụn̄ enyene ndida iyịp esie ndụk esịt ikpehe+ nnyụn̄ nnam ye iyịp+ esie kpa nte enye akanamde ye iyịp ayara enan̄; enye onyụn̄ enyene ndisịme enye n̄kpere okukịp oro ye ke iso okukịp oro.
16 “Ndien enye enyene ndisio isop nnọ edisana ebiet kaban̄a ndek+ nditọ Israel ye kaban̄a nsọn̄ibuot mmọ ke ofụri idiọkn̄kpọ mmọ;+ ntem ke enye edinyụn̄ anam ye tent usopidem, emi odude ye mmọ ke ufọt ndek mmọ.
17 “Ndien baba owo kiet efen inyeneke ndidu ke tent usopidem ọtọn̄ọde ke ini emi enye odụkde aka ndisio isop ke edisana ebiet tutu esịm ini emi enye ọwọrọde edi; ndien enye enyene ndisio isop idemesie+ ye eke ufọk esie ye ofụri esop Israel.+
18 “Ndien enye enyene ndiwọrọ ndi itieuwa,+ emi odude ke iso Jehovah, nnyụn̄ nsio isop nnọ enye, enye onyụn̄ enyene ndida ndusụk iyịp ayara enan̄ ye ndusụk iyịp ebot nyet n̄kanade nnụk itieuwa.+
19 Enye enyene ndida n̄ko ndusụk iyịp ke nnuenubọk esie nsịme+ enye utịm ikatiaba nnyụn̄ nnam enye asana ke ndek nditọ Israel.
20 “Ke ini enye okụrede ndisio isop+ nnọ edisana ebiet ye tent usopidem ye itieuwa, enye n̄ko enyene ndimen odu-uwem ebot+ oro ndi.
21 Ndien Aaron enyene ndidori ubọk+ esie mbiba ke ibuot odu-uwem ebot oro nnyụn̄ nyarade+ kpukpru ndudue+ nditọ Israel ye kpukpru nsọn̄ibuot mmọ ke kpukpru mme idiọkn̄kpọ mmọ,+ onyụn̄ enyene ndida mmọ ndori ebot+ oro ke ibuot nnyụn̄ nnọ owo+ emi adade ebet ete ada aka wilderness.+
22 Ndien ebot oro oyobiom kpukpru ndudue+ mmọ odụk desat,+ enye onyụn̄ enyene ndiyak ebot oro aka wilderness.+
23 “Ndien Aaron enyene ndidụk tent usopidem nnyụn̄ nsion̄o mme ọfọn̄ linen oro enye ekesịnede ke ini enye okodụkde edisana ebiet, nnyụn̄ mbon mmọ do.+
24 Ndien enye enyene ndiyere mmọn̄+ ke edisana ebiet+ nnyụn̄ nsịne ọfọn̄+ esie n̄wọrọ ndi nnyụn̄ ndiwa edifọp uwa esiemmọ+ ye edifọp uwa mbio obio+ nnyụn̄ nsio isop idemesie ye eke mbio obio.+
25 Ndien enye enyene ndifọp ikpọn̄ uwa idiọkn̄kpọ ke itieuwa.+
26 “Amaedi owo+ emi akadade ebot Azazel+ akayak, enye enyene ndiyet ọfọn̄ esie, nnyụn̄ nyere mmọn̄,+ ndien ke oro ebede enye ekeme ndidụk itienna.
27 “Edi enye ayada ayara enan̄ uwa idiọkn̄kpọ ye ebot uwa idiọkn̄kpọ, emi ẹkedade iyịp mmọ mbiba ẹsio isop ke edisana ebiet, ọwọrọ aka edem itienna; ndien mmọ ẹnyene ndifọp ikpa mmọ ye obụk mmọ ye ifuọ mmọ ke ikan̄.+
28 Ndien owo emi ọkọfọpde mmọ enyene ndiyet ọfọn̄ esie, enye onyụn̄ enyene ndiyere mmọn̄, ndien ke oro ebede enye ekeme ndidụk itienna.
29 “Ndien emi eyedi nsinsi ewụhọ ọnọ mbufo:+ Ke ọyọhọ usen duop, ke ọyọhọ ọfiọn̄ itiaba,+ mbufo ẹnyene nditụk ukpọn̄ mbufo,+ mbufo ẹkûnam baba utom kiet,+ edide amanaisọn̄ m̀mê esenowo emi odụn̄de ke otu mbufo.
30 Koro ke usen emi ke ẹdisio isop+ ẹnọ mbufo man ẹnam mbufo ẹsana. Mbufo ẹyesana ẹbọhọ kpukpru mme idiọkn̄kpọ mbufo ke iso Jehovah.+
31 Emi edi sabbath+ ọyọhọ nduọkodudu ọnọ mbufo, mbufo ẹnyụn̄ ẹnyene nditụk ukpọn̄ mbufo. Emi edi nsinsi ewụhọ.
32 “Ndien oku emi ẹdiyetde aran,+ emi ẹdinyụn̄ ẹdade odudu ẹsịn enye ke ubọk ẹyọhọ* ẹte anam utom nte oku+ emi adade itie+ ete esie, oyosio isop onyụn̄ esịne ọfọn̄ linen.+ Mmọ ẹdi ndisana ọfọn̄.+
33 Ndien enye enyene ndisio isop nnọ edisana ebiet,+ ye tent+ usopidem ye itieuwa;+ enye oyonyụn̄ osio isop ọnọ mme oku ye ofụri mbon esop.+
34 Ndien emi eyedi nsinsi ewụhọ ọnọ mbufo,+ man ẹsio isop ẹnọ nditọ Israel ini kiet ke isua+ kaban̄a kpukpru idiọkn̄kpọ mmọ.”
Ntem ke enye anam kpa nte Jehovah okowụkde Moses.
