Leviticus 20;1-27
20 Ndien Jehovah ọdọhọ Moses ete:
2 “Dọhọ nditọ Israel ete, ‘Ẹkûtre ndiwot owo ekededi ke otu nditọ Israel ye esenowo ekededi emi odụn̄de ke Israel, emi emende eyen esie ekededi ọnọ Molech.+ Mbio obio ẹnyene nditọn̄ọ enye ke itiat n̄wot.
3 Ami ndinenke iso ye owo oro, nyonyụn̄ nsịbe enye mfep ke otu mbio obio esie,+ koro enye adade ndusụk ke otu nditọ esie ọnọ Molech man asabade edisana ebiet mi+ onyụn̄ esịn edisana enyịn̄ mi ke ndek.+
4 Ndien edieke mbio obio oro ẹkoide-koi ẹnam nte mmimọ ikwe owo oro, ke ini enye adade eyen esie ekededi ọnọ Molech ẹnyụn̄ ẹtrede ndiwot enye,+
5 ami ndien ndinenke iso ye owo oro ye ubon esie,+ nyonyụn̄ nsịbe enye ye kpukpru mbon oro ẹtienede enye ẹnyene oburobụt ebuana, ke ndinyene oburobụt ebuana+ ye Molech, mfep ke otu mbio obio mmọ.
6 “‘Amaedi ukpọn̄ eke akade etiene mme obụp ekpo+ ye mmọ emi ẹtịn̄de ini iso+ man ekenyene oburobụt ebuana ye mmọ, ndinenke iso ye ukpọn̄ oro nyonyụn̄ nsịbe enye mfep ke otu mbio obio esie.+
7 “‘Ndien mbufo ẹnyene ndinam idem mbufo asana nnyụn̄ ndi edisana,+ koro ami ndi Jehovah Abasi mbufo.
8 Mbufo ẹnịm mme ewụhọ mi ẹnyụn̄ ẹnam mmọ.+ Ami ndi Jehovah emi nnamde mbufo ẹsana.+
9 “‘Edieke owo ekededi osụn̄ide ete esie ye eka esie,+ ẹkûtre ndiwot enye.+ Edi ete esie ye eka esie ke enye osụn̄i. Iyịp esie ọkọbọ enye.+
10 “‘Owo emi esịnde efịbe ye n̄wan owo efen esịn efịbe ye n̄wan ekemmọ owo.+ Ẹkûtre ndiwot enye, eren ye n̄wan efịbe oro.+
11 Owo eke onyụn̄ adan̄de ye n̄wan ete esie omofụhọde iferi ete esie.+ Ẹkûtre ndiwot mmọ mbiba. Iyịp mmọ ọkọbọ mmọ.
12 N̄ko, owo ama adan̄ ye n̄wan eyen esie, ẹkûtre ndiwot mmọ mbiba.+ Mmọ ẹmebiat ndutịm obot. Iyịp mmọ ọkọbọ mmọ.+
13 “‘Ndien owo ama adan̄ ye erenowo ukem nte adan̄de ye n̄wan, mmọ mbiba ẹmenam mbubiam n̄kpọ.+ Ẹkûtre ndiwot mmọ. Iyịp mmọ ọkọbọ mmọ.
14 “‘Edieke owo ọdọde n̄wan ọkọrọ ye eka an̄wan esie, obukpo ido edi oro.+ Ẹnyene ndifọp eren oro ye mmọ ke ikan̄,+ mbak obukpo ido+ oro edika iso odu ke otu mbufo.
15 “‘Ndien edieke owo ọnọde unam nsene esie,+ ẹkûtre ndiwot enye, mbufo ẹnyụn̄ ẹnyene ndiwot unam oro.
16 Ndien edieke n̄wan etienede unam ekededi man ekenyene ebuana+ ye enye, afo enyene ndiwot n̄wan oro ye unam oro. Ẹkûtre ndiwot mmọ. Iyịp mmọ ọkọbọ mmọ.
17 “‘Ndien edieke owo adade eyeneka esie an̄wan m̀mê eyenete esie an̄wan, onyụn̄ okụtde enye iferi, n̄wan oro onyụn̄ okụtde eren oro iferi, oro edi n̄kpọ bụt.+ Ntre ẹnyene ndisịbe mmọ mfep ke iso nditọ obio mmọ. Enye omofụhọde eyeneka esie an̄wan iferi. Ndudue esie oyobiom enye.
18 “‘Edieke owo adan̄de ye n̄wan emi odude ke itieisọn̄ ke ntem ofụhọrede enye iferi, enye amayarade idịm iyịp n̄wan oro, n̄wan oro omonyụn̄ ayarade idịm iyịp esie.+ Ntem ẹnyene ndisịbe mmọ mbiba mfep ke otu mbio obio mmọ.
19 “‘Kûfụhọde iferi eyeneka uka an̄wan+ ye iferi eyeneka usọ an̄wan,+ koro oro ọwọrọ owo ndifụhọde owo emi edide iyịp kiet ye enye iferi.+ Ndudue mmọ oyobiom mmọ.
20 Ndien owo emi adan̄de ye n̄wan eyeneka ete esie omofụhọde iferi eyeneka ete esie.+ Idiọkn̄kpọ mmọ oyobiom mmọ. Mmọ ẹyekpan̄a inyeneke eyen.+
21 Ndien edieke owo adan̄de ye n̄wan eyeneka esie, n̄kpọ itekesịt+ edi oro. Enye omofụhọde iferi eyeneka esie. Mmọ idinyeneke eyen.
22 “‘Mbufo ẹnyene ndinịm kpukpru mme ewụhọ+ mi ye kpukpru ubiereikpe+ mi nnyụn̄ nnam mmọ, mbak isọn̄ emi ndade mbufo n̄ka nte ẹkeda ẹnyene edikpọhi mbufo ọduọk.+
23 Mbufo ẹkûnyụn̄ ẹsan̄a ke mme ewụhọ mme idụt emi ami mbịnde nsion̄o ke iso mbufo,+ koro mmọ ẹnamde kpukpru n̄kpọ emi, ndien ami mmasua mmọ.+
24 Ntem ndọhọ mbufo nte:+ “Mbufo ẹyeda isọn̄ mmọ ẹnyene, ndien ami nyada enye nnọ mbufo nte ẹda ẹnyene, kpa isọn̄ emi ọfiọrọde mmọn̄eba ye aranọkwọk.+ Ami ndi Jehovah Abasi mbufo emi mbaharede mbufo nsio ke otu mme idụt.”+
25 Ndien mbufo ẹnyene ndinam ukpụhọde odu ke ufọt unam eke asanade ye unam eke edehede ye ke ufọt inuen eke edehede ye inuen eke asanade;+ ndien mbufo ẹkûsabade+ ukpọn̄ mbufo ye unam ye inuen ye n̄kpọ ekededi eke asan̄ade ke isọn̄ emi ami mbaharede ke ntak mbufo ke ndidọhọ ke mmọ ẹdehe.
26 Ndien mbufo ẹnyene ndidi edisana nnọ mi,+ koro ami Jehovah ndi edisana;+ mmonyụn̄ mbahade mbufo nsio ke otu mme idụt nte ẹdi okịm.+
27 “‘Amaedi eren m̀mê n̄wan emi enyenede spirit ubụpekpo m̀mê spirit utịn̄ ini iso,+ ẹkûtre ndiwot mmọ.+ Ẹnyene nditọn̄ọ mmọ ke itiat n̄wot. Iyịp mmọ ọkọbọ mmọ.’”+
