Leviticus 23;1-44
23 Ndien Jehovah ọdọhọ Moses ete:
2 “Dọhọ nditọ Israel ete, ‘Mme usọrọ Jehovah eke ini ke ini+ oro mbufo ẹditan̄ade+ ẹdi ndisana mbono. Mmọ emi ẹdi mme usọrọ mi eke ini ke ini:
3 “‘Ẹnam utom ke usen itiokiet, edi ọyọhọ usen itiaba edi sabbath ọyọhọ nduọkodudu,+ kpa edisana mbono. Mbufo inyeneke ndinam baba orụk utom kiet. Enye edi sabbath Jehovah ke kpukpru ebiet emi mbufo ẹdụn̄de.+
4 “‘Mmọ emi ẹdi mme usọrọ Jehovah eke ini ke ini,+ kpa ndisana mbono,+ emi mbufo ẹnyenede nditan̄a ke edikem ini+ mmọ:
5 Ke mbubreyo* ọyọhọ usen duopenan̄, ke akpa ọfiọn̄,+ ẹyenịm passover+ ẹnọ Jehovah.
6 “‘Ndien ke ọyọhọ usen efịt ke ọfiọn̄ emi, ẹyenịm usọrọ uyo eke leaven mîdụhe ẹnọ Jehovah.+ Mbufo ẹnyene ndita uyo eke leaven mîdụhe ke usen itiaba.+
7 Mbufo ẹyenịm edisana mbono ke akpa usen.+ Mbufo inyeneke ndinam baba ọkpọsọn̄ utom kiet.
8 Edi mbufo ẹnyene ndifọp uwa ke ikan̄ nnọ Jehovah ke usen itiaba. Ke ọyọhọ usen itiaba, ẹyenịm edisana mbono. Mbufo inyeneke ndinam baba ọkpọsọn̄ utom kiet.’”
9 Ndien Jehovah ọdọhọ Moses ete:
10 “Dọhọ nditọ Israel ete, ‘Ke ini mbufo ẹdide ẹdisịm isọn̄ emi nnọde mbufo, ẹnyụn̄ ẹkpen̄ede mbun̄wụm esie, mbufo ẹnyene n̄ko ndida ebek akpa mbun̄wụm+ emi mbufo ẹkpen̄ede nsọk oku.
11 Ndien enye enyene ndifụn̄ ebek oro n̄ka iso mfiak edem+ ke iso Jehovah man nnyịme mbufo. Ke ndan̄nsiere sabbath oro ke oku enyene ndifụn̄ ebek oro n̄ka iso mfiak edem.
12 Ndien ke usen emi mbufo ẹnọde ebek oro ẹte ẹfụn̄ enye ẹka iso ẹfiak edem, mbufo ẹnyene ndiwa abak okukịm erọn̄ eke mîbehe isua kiet emi eyede idem nte edifọp uwa nnọ Jehovah;
13 ye uwa n̄kpasịp eti ndomuyo emi ẹdomode ephah kiet ẹda mbahade iba ke itie duop ẹbuak ye aran, nte uwa emi ẹfọpde ke ikan̄ ẹnọ Jehovah, man osio edinem utebe; ye nte edin̄wọn̄ uwa emi udomo esie edide mbahade wine hin kiet ke itie inan̄.
14 Ndien mbufo inyeneke ndita uyo m̀mê edifọp wheat* m̀mê obufa wheat mbemiso usen emi,+ tutu mbufo ẹda uwa Abasi mbufo ẹdi. Emi edi nsinsi ewụhọ ke ofụri emana mbufo ke kpukpru ebiet emi mbufo ẹdụn̄de.
15 “‘Ndien mbufo ẹnyene nditọn̄ọ ke ndan̄nsiere sabbath oro, kpa usen emi mbufo ẹkedade ebek edifụn̄ uwa ẹdi, mbat sabbath itiaba+ nnọ idem mbufo. Mmọ ẹnyene ndikem ibat.
16 Ke usen oro ọyọhọ sabbath itiaba okụrede, mbufo ẹnyene ndibat usen aba ye duop+ ndian, nnyụn̄ n̄wa uwa obufa n̄kpasịp+ nnọ Jehovah.
17 Mbufo ẹnyene ndida uyo iba+ nte edifụn̄ uwa ke ebietidụn̄ mbufo ndi. Mmọ ẹnyene ndidi eti ndomuyo emi ẹdomode ephah kiet ẹda mbahade iba ke itie duop. Ẹnyene ndisịn leaven nsan̄ mmọ,+ nte akpa mfri eke ẹdatde emi ẹdade ẹsọk Jehovah.+
18 Ndien ke adianade ye uyo oro, mbufo ẹnyene ndinọ nyara nditọerọn̄ itiaba emi ẹdide isua kiet emi ẹnyụn̄ ẹyede idem,+ ye abak ayara enan̄ kiet ye okukịm erọn̄ iba. Mmọ ẹdidi edifọp uwa emi ẹnyenede Jehovah ọkọrọ ye uwa n̄kpasịp mmọ ye edin̄wọn̄ uwa mmọ nte uwa emi ẹfọpde ke ikan̄, man osio edinem utebe ọnọ Jehovah.
19 Ndien mbufo ẹnyene ndiwa eyen ebot+ kiet nte uwa idiọkn̄kpọ ye nyara nditọerọn̄ iba, emi ẹdide isua kiet, nte uwa ebuana.+
20 Ndien oku enyene ndifụn̄ mmọ n̄ka iso mfiak edem+ ọkọrọ ye uyo akpa mfri eke ẹdatde, nte edifụn̄ uwa ke iso Jehovah, ọkọrọ ye nyara nditọerọn̄ iba oro. Mmọ ẹdidi ndisana n̄kpọ Jehovah emi ẹnyenede oku.+
21 Ndien mbufo ẹnyene nditan̄a+ usen emi; edisana mbono oyodu ọnọ mbufo. Mbufo inyeneke ndinam baba ọkpọsọn̄ utom kiet. Emi edi nsinsi ewụhọ ke ofụri emana mbufo ke kpukpru ebiet eke mbufo ẹdụn̄de.
22 “‘Ndien ke ini mbufo ẹkpen̄ede ukpen̄e ke in̄wan̄ mbufo, kûkpen̄e se idude ke adan̄a in̄wan̄ fo uma, kûnyụn̄ utan̄ se ibọhọde fi iduọn̄ọ.+ Kpọn̄ mmọ nọ owo ukụt+ ye esenowo.+ Ami ndi Jehovah Abasi mbufo.’”
23 Ndien Jehovah ọdọhọ Moses ete:
24 “Dọhọ nditọ Israel ete, ‘Ke ọyọhọ ọfiọn̄ itiaba,+ ke akpa usen ke ọfiọn̄ oro, mbufo ẹnyene ndiduọk odudu ofụri ofụri, emi edidi usen editi emi ẹfride obukpon̄,+ ye edisana mbono.+
25 Mbufo ẹkûnam ọkpọsọn̄ utom ndomokiet, mbufo ẹnyụn̄ ẹnyene ndiwa uwa emi ẹfọpde ke ikan̄ ẹnọ Jehovah.’”
26 Ndien Jehovah ọdọhọ Moses ete:
27 “Ọyọhọ usen duop ke ọyọhọ ọfiọn̄ itiaba emi edi usen usio-isop.+ Mbufo ẹnịm edisana mbono, mbufo ẹnyụn̄ ẹtụk* ukpọn̄+ mbufo ẹnyụn̄ ẹwa uwa+ emi ẹfọpde ke ikan̄ ẹnọ Jehovah.
28 Mbufo ẹkûnam utom ndomokiet ke usen emi, koro enye edide usen usio-isop eke ẹdisiode isop+ ẹnọ mbufo ke iso Jehovah Abasi mbufo;
29 koro amaedi ukpọn̄ ekededi eke mîditụkke ukpọn̄ esie ke usen emi, ẹyesịbe enye ẹfep ke otu mbio obio mmọ.+
30 Amaedi ukpọn̄ ekededi emi edinamde utom ekededi ke usen emi, nyosobo ukpọn̄ oro mfep ke otu mbio obio mmọ.+
31 Mbufo inyeneke ndinam baba utom kiet.+ Emi edi nsinsi ewụhọ ke ofụri emana mbufo ke kpukpru ebiet emi mbufo ẹdụn̄de.
32 Enye edi sabbath ọyọhọ nduọkodudu ọnọ mbufo,+ mbufo ẹnyụn̄ ẹnyene nditụk+ ukpọn̄ mbufo ke mbubreyo ọyọhọ usen usụkkiet ke ọfiọn̄ emi. Mbufo ẹdinịm sabbath mbufo ọtọn̄ọde ke mbubreyo tutu esịm mbubreyo.”
33 Ndien Jehovah ọdọhọ Moses ete:
34 “Dọhọ nditọ Israel ete, ‘Ke ọyọhọ usen efịt ke ọyọhọ ọfiọn̄ itiaba emi, ẹyenịm usọrọ mme ataya ke usen itiaba ẹnọ Jehovah.+
35 Akpa usen edi edisana mbono. Mbufo inyeneke ndinam baba ọkpọsọn̄ utom kiet.
36 Mbufo ẹnyene ndifọp uwa ke ikan̄ nnọ Jehovah ke usen itiaba. Ke ọyọhọ usen itiaita, mbufo ẹyenịm edisana mbono,+ mbufo ẹnyụn̄ ẹnyene ndifọp uwa ke ikan̄ nnọ Jehovah. Emi edi edisana esop. Mbufo inyeneke ndinam baba ọkpọsọn̄ utom kiet.
37 “‘Mmọ emi ẹdi mme usọrọ Jehovah eke ini ke ini+ oro mbufo ẹnyenede nditan̄a nte ndisana mbono,+ ndiwa uwa emi ẹfọpde ke ikan̄+ nnọ Jehovah: edifọp uwa+ ye uwa n̄kpasịp+ emi asan̄ade ye uwa unam ye edin̄wọn̄ uwa+ nte ekemde ye ndutịm eke usen ke usen,
38 ọkọrọ ye mme sabbath Jehovah+ ye mme enọ+ mbufo ye kpukpru uwa akan̄a+ mbufo ye kpukpru uwa unyịmesịt+ mbufo, emi mbufo ẹnyenede ndinọ Jehovah.
39 Nte ededi, ke ọyọhọ usen efịt ke ọyọhọ ọfiọn̄ itiaba, ke ini mbufo ẹtan̄de mbun̄wụm isọn̄ ẹbon ọtọkiet, mbufo ẹnyene ndinịm usọrọ+ Jehovah ke usen itiaba.+ Akpa usen edi usen ọyọhọ nduọkodudu, ọyọhọ usen itiaita onyụn̄ edi usen ọyọhọ nduọkodudu.+
40 Ndien ke akpa usen, mbufo ẹnyene ndida mfri ndiye eto, ndakeyop+ ye n̄kọk eto emi enyenede ediwak ikọn̄ ye eto poplar itịghede mmọn̄, mbufo ẹnyụn̄ ẹnyene ndidat esịt+ ke iso Jehovah Abasi mbufo ke usen itiaba.
41 Ndien mbufo ẹnyene ndinịm enye nte usọrọ nnọ Jehovah usen itiaba ke isua.+ Mbufo ẹnyene ndinịm usọrọ emi ke ọyọhọ ọfiọn̄ itiaba nte nsinsi ewụhọ ke ofụri emana mbufo.
42 Mbufo ẹnyene ndidụn̄ ke mme ataya ke usen itiaba.+ Kpukpru mme amanaisọn̄ ke Israel ẹnyene ndidụn̄ ke mme ataya,+
43 man mme emana mbufo ẹkpefiọk+ ẹte ke n̄kanam nditọ Israel ẹdụn̄ ke mme ataya ke ini n̄kadade mmọ n̄wọrọ ke isọn̄ Egypt.+ Ami ndi Jehovah Abasi mbufo.’”
44 Ntem ke Moses akasian nditọ Israel mme usọrọ Jehovah eke ini ke ini.+
Mme Ikọ Idakisọn̄
^ At. Ed., “ke ufọt mbubreyo iba.”
^ Mîdịghe, emi ekeme ndidi “barley.”
^ Ekeme ndidi emi aban̄a utreudia.
