Leviticus 26;1-46
26 “‘Mbufo ẹkûnam mme abasi oro mînyeneke ufọn ẹnọ idem mbufo,+ ẹkûnyụn̄ ẹwụk edisọi mbiet+ m̀mê adaha utuakibuot ẹnọ idem mbufo, ẹkûnyụn̄ ẹnịm itiat eke mbuwed odude+ ke isọn̄ mbufo ndinụhọ nnọ enye;+ koro ami ndi Jehovah Abasi mbufo.
2 Mbufo ẹnyene ndinịm mme sabbath mi+ nnyụn̄ nten̄e edisana ebiet mi. Ami ndi Jehovah.
3 “‘Edieke mbufo ẹsan̄ade ke mme ewụhọ mi ẹnyụn̄ ẹnịmde mme ibet mi ẹnyụn̄ ẹnamde mmọ,+
4 nyọnọ mbufo edịm ke edikem ini,+ ndien isọn̄ oyon̄wụm mbun̄wụm,+ eto ke in̄wan̄ oyonyụn̄ osion̄o mfri esie.+
5 Ndien ini udịghi wheat mbufo ayada esịm ini utet grape mbufo, ini utet grape oyonyụn̄ ada esịm ini usuan n̄kpasịp;+ ndien mbufo ẹyeta uyo mbufo ẹyụhọ ẹnyụn̄ ẹdụn̄ ke ifụre ke isọn̄ mbufo.+
6 Ndien nyesịn emem ke isọn̄,+ mbufo ẹyenyụn̄ ẹsụhọde ẹna, ndien idụhe baba owo kiet eke edinamde mbufo ẹdịghe;+ ndien nyanam ndiọi unam ikọt ẹkụre ke isọn̄,+ akan̄kan̄ idinyụn̄ isan̄ake ke isọn̄ mbufo ibe.+
7 Ndien mbufo ẹyebịne mme asua mbufo,+ mmọ ẹyenyụn̄ ẹduọn̄ọ ke akan̄kan̄ ke iso mbufo.
8 Ndien owo ition ke otu mbufo ẹyebịne owo ikie, owo ikie ke otu mbufo ẹyenyụn̄ ẹbịne owo tọsịn duop, ndien mme asua mbufo ẹyeduọn̄ọ ke akan̄kan̄ ke iso mbufo.+
9 “‘Ndien ami nyetịn̄ enyịn ke idem mbufo+ nnyụn̄ nnam mbufo ẹtọt ẹnyụn̄ ẹwak,+ ndien nyanam ediomi emi n̄kodiomide ye mbufo.+
10 Ndien mbufo ẹyedia n̄kani mbun̄wụm isua emi ekebede,+ ẹyenyụn̄ ẹsion̄o n̄kani mbun̄wụm ẹdọn̄ mbufa.
11 Ndien nyowụk tent utuakibuot mi ke ufọt mbufo,+ ukpọn̄ mi idinyụn̄ isuaha mbufo.+
12 Ndien ami nyasan̄a ke otu mbufo nnyụn̄ ndi Abasi mbufo,+ mbufo ẹyenyụn̄ ẹdi ikọt mi.+
13 Ami ndi Jehovah Abasi mbufo, emi n̄kosiode mbufo ke isọn̄ Egypt nte ẹkûdi aba ifịn mmọ,+ mma nnyụn̄ mbụn̄ mme eto ọkpọnọ mbufo nnyụn̄ nnam mbufo ẹnen̄ede ẹsan̄a.+
14 “‘Edi edieke mbufo mîdikpan̄ke utọn̄ inọ mi, mîdinyụn̄ inịmke kpukpru mme ibet emi,+
15 edieke mbufo ẹnyụn̄ ẹsịnde ndinam mme ewụhọ mi,+ ukpọn̄ mbufo onyụn̄ asuade mme ubiereikpe mi, mînyụn̄ inamke kpukpru mme ibet mi, ẹnyụn̄ ẹbiatde ediomi mi,+
16 ami ndien nyanam mbufo n̄kpọ emi, nyọnọ mbufo ufen ke ndida akpaikpai ikọn̄+ ye ọkpọsọn̄ ufiopidem ntịmede mbufo, ndien emi ayanam enyịn ekịm+ mbufo onyụn̄ anam ukpọn̄ mbufo akpa mba.+ Ndien mbufo ẹyesuan n̄kpasịp ke ikpîkpu, koro mme asua mbufo ẹdidia mmọ.+
17 Ndien ami ndinenke iso ye mbufo, mme asua mbufo ẹyenyụn̄ ẹkan mbufo;+ ndien mmọ eke ẹsuade mbufo ẹyedịghi mbufo,+ mbufo ẹyenyụn̄ ẹfen̄e ke ini owo mîbịneke mbufo.+
18 “‘Edi edieke mbufo mîdikpan̄ke utọn̄ inọ mi, kpa ye mme n̄kpọ emi, ami ndien nyotụnọ mbufo utịm ikatiaba ke idiọkn̄kpọ mbufo.+
19 Ndien nyabiat ntan̄idem eke otode odudu mbufo nnyụn̄ nnam ikpaenyọn̄ mbufo etie nte ukwak,+ isọn̄ mbufo onyụn̄ etie nte okpoho.
20 Ndien mbufo ẹdibiat odudu mbufo ke ikpîkpu, koro isọn̄ mbufo mîdin̄wụmke n̄kpọ,+ eto ke isọn̄ idinyụn̄ ision̄oke mfri.+
21 “‘Edi edieke mbufo ẹsụk ẹbiọn̄ọde mi mînyụn̄ imaha ndikpan̄ utọn̄ nnọ mi, ami ndien nyọnọ mbufo ufen utịm ikatiaba nte ekemde ye mme idiọkn̄kpọ mbufo.+
22 Ndien nyọdọn̄ ndiọi unam utom ke ọtọ mbufo,+ ndien mmọ ẹyenam mbufo ẹtaba nditọ mbufo,+ ẹnyụn̄ ẹsobo mme ufene mbufo ẹnyụn̄ ẹnam ibat mbufo osụhọde, mme ọkpọusụn̄ mbufo ẹyenyụn̄ ẹna ndon.+
23 “‘Edieke edide kpa ye mme n̄kpọ emi, mbufo iyakke mi nnen̄ede mbufo,+ edi ẹsụk ẹbiọn̄ọde mi,
24 ami n̄ko nyọbiọn̄ọ mbufo;+ nyonyụn̄ mmia mbufo utịm ikatiaba ke idiọkn̄kpọ mbufo.+
25 Ndien ami nyada akan̄kan̄ eke osiode usiene+ ediomi+ ntiene mbufo; ndien mbufo ẹyesop idem ke mme obio mbufo, ami nyonyụn̄ ndọn̄ idiọk udọn̄ọ utom ke otu mbufo,+ ndien nyada mbufo nsịn asua ke ubọk.+
26 Ke ini mbụn̄de mme eto emi mme ekara uyo mbufo ẹyịrede,+ iban duop ẹyesan̄ uyo mbufo ke usan̄uyo kiet ẹnyụn̄ ẹdodomo uyo mbufo ẹnọ mbufo;+ ndien mbufo ẹyeta edi idiyụhọke mbufo.+
27 “‘Ndien edieke emi mîdinamke mbufo ẹkpan̄ utọn̄ ẹnọ mi edi ẹbiọn̄ọde mi,+
28 ami nyenen̄ede mbiọn̄ọ mbufo,+ nnyụn̄ ntụnọ mbufo utịm ikatiaba ke idiọkn̄kpọ mbufo.+
29 Ntre mbufo ẹyeta obụk nditọiren mbufo, ẹyenyụn̄ ẹta obụk nditọiban mbufo.+
30 Ndien ami nyosobo mme edikon̄ ebiet+ mbufo nnyụn̄ mbụn̄ n̄kpọ udori incense mbufo, nnyụn̄ ntan̄ okpo mbufo ndori ke mbukpịt mbubiam mbiet mbufo;+ ndien ukpọn̄ mi ayasua mbufo.+
31 Ndien nyayak mme obio mbufo nnọ akan̄kan̄+ nnyụn̄ nnam ndisana ebiet mbufo ẹna ndon,+ ndinyụn̄ n̄wụneke edinem utebe uwa mbufo.+
32 Ndien ami nyanam isọn̄ ana ndon,+ mme asua mbufo emi ẹdidụn̄de ke esịt ẹyenyụn̄ ẹwụk enyịn ẹse ke n̄kpaidem.+
33 Ndien nyasuan mbufo ndọn̄ ke otu mme idụt,+ nyonyụn̄ ndụri akan̄kan̄ nsio ke efọk nda ntiene mbufo;+ ndien isọn̄ mbufo ayana ndon,+ mme obio mbufo ẹyenyụn̄ ẹwụre.
34 “‘Ke ini oro, isọn̄ eyekpe isọn mme sabbath esie ke kpukpru usen emi enye anade ndon, ke adan̄aemi mbufo ẹdude ke isọn̄ mme asua mbufo. Ke ini oro, isọn̄ eyenịm sabbath, koro ana enye ekpe isọn mme sabbath esie.+
35 Isọn̄ eyenịm sabbath ke kpukpru usen emi enye anade ndon, koro enye mîkenịmke sabbath ke ofụri ini sabbath mbufo emi mbufo ẹkedụn̄de ke esịt.
36 “‘Amaedi mbon emi ẹsụhọde ke otu mbufo,+ nyesịn mmọ ndịk ke esịt ke isọn̄ mme asua mmọ; ndien uyom ikọn̄ emi enyen̄ede ayanam mmọ ẹfen̄e, ndien mmọ ẹyefen̄e nte emi owo efehede ọbọhọ akan̄kan̄ ẹnyụn̄ ẹduọn̄ọ ke ini baba owo kiet mîbịneke mmọ.+
37 Ndien mmọ ẹyetuaha ye kiet eken ẹduọn̄ọ nte n̄kpọ eke ẹduọn̄ọde ke iso akan̄kan̄ ke ini baba owo kiet mîbịneke mmọ, ndien mbufo idikemeke ndisọn̄ọ nda n̄n̄wana ye mme asua mbufo.+
38 Ndien mbufo ẹyetak ke otu mme idụt,+ isọn̄ mme asua mbufo oyonyụn̄ adia mbufo.
39 Amaedi mmọ oro ẹsụhọde ke otu mbufo, mmọ ẹyeyemede+ ke ndudue mmọ ke isọn̄ mme asua mbufo. Ih, mmọ ẹyeyemede ke ntak ndudue mme ete mmọ,+ kpa nte mme ete mmọ ẹkeyemerede.
40 Ndien mmọ ẹyeyarade ndudue mmọ+ ye ndudue mme ete mmọ ke unana edinam akpanikọ mmọ ke ini mmọ mîkanamke akpanikọ ye ami, ih, ke ini mmọ ẹkebiọn̄ọde mi.+
41 Mma nnyụn̄ mbiọn̄ọ mmọ+ nnyụn̄ nda mmọ n̄ka isọn̄ mme asua mmọ.+
“‘M̀mê esịt mmọ emi mînaha mbobi+ oyosụhọde+ adan̄aoro, mmọ ẹnyụn̄ ẹkpe utịp ndudue mmọ.
42 Ndien ami nyeti ediomi mi emi n̄kodiomide ye Jacob;+ nyonyụn̄ nti ediomi mi emi n̄kodiomide ye Isaac+ ye ediomi mi emi n̄kodiomide ye Abraham,+ nyonyụn̄ nti isọn̄ oro.
43 Ke ofụri ini emi, mmọ ẹma ẹkpọn̄ isọn̄ oro, isọn̄ oro onyụn̄ ekpe isọn mme sabbath esie,+ ke adan̄aemi enye akanade ndon ke ini mmọ mîdụhe, mmọ ẹnyụn̄ ẹkpe utịp ndudue mmọ,+ koro mmọ ẹkesịnde mme ubiereikpe mi,+ ukpọn̄ mmọ onyụn̄ asuade mme ewụhọ mi.+
44 Edi kpa ye ofụri emi, ke adan̄aemi mmọ ẹsụk ẹdude ke isọn̄ mme asua mmọ, ami ndisịnke mmọ,+ ndinyụn̄ nsuaha mmọ,+ ke ndisobo mmọ mfep, nnyụn̄ mbiat ediomi+ mi emi n̄kodiomide ye mmọ; koro ami ndide Jehovah Abasi mmọ.
45 Ndien ke ntak mmọ nyeti ediomi emi n̄kodiomide ye mme ete ete mmọ,+ emi n̄kadade n̄wọrọ ke isọn̄ Egypt ke iso mme idụt,+ man ndi Abasi mmọ. Ami ndi Jehovah.’”
46 Mmọ emi ẹdi mme ewụhọ ye mme ubiereikpe+ ye mme ibet emi Jehovah ekenịmde ke ufọt esie ye nditọ Israel ke Obot Sinai ebe ke Moses.+
