Leviticus 3;1-17
3 “‘Ndien edieke uwa esie edide uwa ebuana,+ edieke enye onyụn̄ osiode unam ke otu enan̄ ọnọ, edide ayara m̀mê uman, enye edida se iyede idem+ edi ke iso Jehovah.
2 Ndien enye enyene ndidori ubọk ke ibuot+ unam oro, ẹnyụn̄ ẹnyene ndiwot unam oro ke enyịnusụn̄ tent usopidem; ndien nditọ Aaron, kpa mme oku, ẹnyene ndisịme iyịp esie n̄kanade itieuwa.
3 Ndien enye enyene ndida ndusụk uwa ebuana ndi nte uwa emi ẹfọpde ke ikan̄ ẹnọ Jehovah, oro edi, ikpọn̄+ oro ofụhọde ke nsia, kpa ofụri ikpọn̄ emi adianade ke nsia,+
4 ye ekpụt+ mbiba ye ikpọn̄ oro ofụhọde ke mmọ, ukem nte enye oro adianade ke isịn. Amaedi ikpọn̄ oro ofụkde esịt, enye ayadian̄ade ikpọn̄ oro ye mme ekpụt oro.
5 Ndien nditọiren Aaron+ ẹnyene ndifọp+ enye ke itieuwa, ke enyọn̄ edifọp uwa emi odorode ke ifia+ oro odude ke ikan̄, nte uwa eke ẹfọpde ke ikan̄ man osio edinem utebe+ ọnọ Jehovah.
6 “‘Ndien edieke uwa emi enye ọnọde Jehovah nte uwa ebuana edide erọn̄, ayara m̀mê uman, enye edinọ se iyede idem.+
7 Edieke enye adade abak okukịm erọn̄ edi nte uwa esie, do enye enyene ndida enye ndi ke iso Jehovah.+
8 Enye enyene ndidori ubọk ke ibuot+ unam oro, ẹnyụn̄ ẹnyene ndiwot+ unam oro ke iso tent usopidem; ndien nditọiren Aaron ẹnyene ndisịme iyịp unam oro n̄kanade itieuwa.
9 Enye enyene ndifọp ikpọn̄ eke otode uwa ebuana nte uwa emi ẹfọpde ke ikan̄ ẹnọ Jehovah.+ Enye ayadian̄ade ofụri ikpọn̄ ikpọn̄ isịm+ emi ekperede ọkpọ asakedem ye ikpọn̄ emi ofụhọde ke nsia, kpa ofụri ikpọn̄ emi adianade ke nsia,+
10 ye ekpụt mbiba ye ikpọn̄ oro ofụhọde ke mmọ, ukem nte enye oro adianade ke isịn. Amaedi ikpọn̄ oro ofụkde esịt,+ enye ayadian̄ade ikpọn̄ oro ye mme ekpụt oro.
11 Ndien oku enyene ndifọp+ enye ke itieuwa nte udia,+ kpa uwa emi ẹfọpde ke ikan̄ ẹnọ Jehovah.
12 “‘Ndien edieke uwa esie edide ebot,+ do enye enyene ndida enye ndi ke iso Jehovah.
13 Ndien enye enyene ndidori ubọk esie ke ibuot+ unam oro, ẹnyụn̄ ẹnyene ndiwot+ unam oro ke iso tent usopidem; ndien nditọiren Aaron ẹnyene ndisịme iyịp esie n̄kanade itieuwa.
14 Enye enyene ndinọ ikpọn̄ emi ofụhọde ke nsia unam emi nte uwa emi ẹfọpde ke ikan̄ ẹnọ Jehovah, kpa ofụri ikpọn̄ emi adianade ke nsia,+
15 ye ekpụt mbiba ye ikpọn̄ oro adianade ke mmọ, ukem nte enye oro adianade ke isịn. Amaedi ikpọn̄ oro ofụkde esịt, enye ayadian̄ade ikpọn̄ oro ye mme ekpụt oro.
16 Ndien oku enyene ndifọp enye ke itieuwa nte udia, kpa uwa emi ẹfọpde ke ikan̄ man osio edinem utebe. Ofụri ikpọn̄ emi enyene Jehovah.+
17 “‘Emi edi nsinsi ewụhọ ke ofụri emana mbufo, ke ofụri ebietidụn̄ mbufo: Mbufo ẹkûta baba ikpọn̄ kiet ẹkûnyụn̄ ẹdia iyịp.’”+
