Luke 11;1-54
11 Edikem nte enye odude ke ebiet kiet ọbọn̄ akam, ke ini enye okụrede, kiet ke otu mbet esie ọdọhọ enye ete: “Ọbọn̄, kpep nnyịn ndibọn̄ akam,+ kpa nte John ekekpepde mme mbet esie.”+
2 Edi enye ọdọhọ mmọ ete: “Ini ekededi eke mbufo ẹbọn̄de akam,+ ẹdọhọ ẹte, ‘Ete, yak ẹnam enyịn̄ fo asana.+ Yak obio ubọn̄ fo edi.+
3 Nọ nnyịn udia+ usen eke ekemde ye se iyomde ke usen mfịn.
4 Nyụn̄ fen nnyịn mme idiọkn̄kpọ+ nnyịn, koro nnyịn n̄ko ifende kpukpru owo emi ẹkamade nnyịn isọn;+ kûnyụn̄ uda nnyịn usịn ke idomo.’”+
5 N̄ko, enye ọdọhọ mmọ ete: “Anie ke otu mbufo edinyene ufan, edinyụn̄ aka ebịne enye ke ufọt okoneyo ọkọdọhọ enye ete, ‘Ufan, buọt mi uyo ita,
6 koro ufan mi kiet osụk oto isan̄ edi, ndien nnyeneke n̄kpọ eke nnịmde enye ke iso’?
7 Ndien owo emi odu ke esịt ufọk ọbọrọ ete, ‘Kûfịna mi.+ Mmọkọkọbi usụn̄, ndien ami ye n̄kpri nditọ mi imododụk idap; n̄kemeke ndidaha nda nnọ fi n̄kpọ ndomokiet.’
8 Ndọhọ mbufo nte, Okposụkedi nte enye mîdidahake ida inọ enye n̄kpọ ke ntak edide ufan esie, ke akpanikọ ke ntak emi enye ọsọn̄ọde eyịre,+ enye ayadaha ke enyọn̄ ọnọ enye n̄kpọ eke enye oyomde.
9 Mmọdo ndọhọ mbufo nte, Ẹka iso ẹben̄e,+ ndien ẹyenọ mbufo; ẹka iso ẹyom,+ ndien mbufo ẹyekụt; ẹka iso ẹkọn̄, ndien ẹyeberede ẹnọ mbufo.
10 Koro kpukpru owo eke ẹben̄ede ẹbọde,+ kpukpru owo eke ẹnyụn̄ ẹyomde ẹkụtde, ẹyenyụn̄ ẹberede ẹnọ kpukpru owo eke ẹkọn̄de.
11 Ke akpanikọ, ewe ete odu ke otu mbufo eke edinọde eyen+ esie urụkikọt utu ke iyak ke ini eyen esie eben̄ede enye iyak?
12 M̀mê edinọde eyen ikpeyen ke ini eyen eben̄ede enye nsenunen?
13 Ke ntre, edieke mbufo, okposụkedi emi ẹdiọkde, ẹfiọkde ndinọ nditọ mbufo nti enọ,+ adan̄a didie akan oro ke Ete mbufo ke heaven edinọ mbon oro ẹben̄ede enye edisana spirit!”+
14 Ekem enye ebịn demon imụm+ ọduọk. Ke demon oro ama ọkọwọrọ, imụm oro etịn̄ ikọ. Ndien idem akpa otuowo.
15 Edi ndusụk owo ke otu mmọ ẹdọhọ ẹte: “Enye ada Beelzebub, andikara mme demon, ebịn mme demon.”+
16 Edi, mbon efen, man ẹdomo enye ẹse, ẹyom enye ọnọ mmimọ idiọn̄ọ+ emi otode heaven.
17 Ke ọfiọkde ekikere mmọ,+ enye ọdọhọ mmọ ete: “Kpukpru obio ubọn̄ eke abaharede ada an̄wana ye idemesie odụk ke nsobo, ufọk eke onyụn̄ abaharede ada an̄wana ye idemesie ọyọduọ.+
18 Ntre edieke Satan n̄ko abaharede ada an̄wana ye idemesie, didie ke obio ubọn̄ esie edisọn̄ọ ada?+ Koro mbufo ẹdọhọde ẹte nda Beelzebub mbịn mme demon.
19 Edieke ami ndade Beelzebub mbịn mme demon, nditọ+ mbufo ẹda anie ẹbịn mmọ? Ke ntak emi mmọ ẹdidi mme ebiereikpe ẹnọ mbufo.
20 Edi edieke edide nda nnuenubọk Abasi+ mbịn mme demon, obio ubọn̄ Abasi esesịm mbufo.+
21 Ke ini ọkpọsọn̄ owo+ ọbọbọde ofụri mbọbọ ekpeme ufọk ubọn̄ esie, inyene esie aka iso odu ke emem.
22 Edi ke ini owo emi enyenede odudu akan+ enye edide en̄wan ye enye onyụn̄ akande enye,+ ọbọ enye kpukpru n̄kpọekọn̄ esie eke enye ọkọbuọtde idem ke esịt, onyụn̄ edeme mme n̄kpọ eke enye obụmede.
23 Owo eke mîdaha ye ami an̄wan̄wana ye ami, ndien owo eke mîtieneke mi itan̄ ibok asasuan.+
24 “Ke ini ndedehe spirit ọwọrọde owo ke idem, enye oyo ke edisat ebiet oyom ebiet nduọkodudu, ndien, ke ini enye mîkwe, enye ọdọhọ ete, ‘Nyafiak nnyọn̄ ufọk mi emi n̄kotode n̄wọrọ.’+
25 Ndien ke ini enye edide edisịm, enye okụt ke ẹma ẹkpọri asana ẹnyụn̄ ẹbana enye.
26 Ndien enye aka akada spirit itiaba+ efen emi ẹdiọkde ẹkan enye, mmọ ẹnyụn̄ ẹdụk ẹdụn̄ do; ndien akpatre itie owo oro ọdiọk akan akpa.”+
27 Ekem nte enye etịn̄de mme ikọ emi, n̄wan kiet ke otuowo emenede uyo ọdọhọ enye ete: “Idịbi emi akamande fi ye eba emi afo akawapde ẹkop inemesịt!”+
28 Edi enye ọdọhọ ete: “Baba, akam edi mbon oro ẹkopde ikọ Abasi ẹnyụn̄ ẹnamde enye ẹkop inemesịt!”+
29 Ke ini otuowo ẹsopde idem ọtọkiet, enye ọtọn̄ọ ndidọhọ ete: “Emana emi edi idiọk emana; enye oyom idiọn̄ọ.+ Edi owo idinọhọ enye idiọn̄ọ ke mîbọhọke idiọn̄ọ Jonah.+
30 Koro kpa nte Jonah+ ekedide idiọn̄ọ ọnọ mbon Nineveh, kpa ntre n̄ko ke Eyen owo edidi idiọn̄ọ ọnọ emana emi.
31 Ẹyenam ọbọn̄ an̄wan+ edem usụk eset ada ke ikpe ye mbon emana emi onyụn̄ obiom mmọ ikpe; koro enye okotode ke mme utịt isọn̄ edi ndikop ọniọn̄ Solomon, edi, sese! se ikponde ikan+ Solomon odu mi.
32 Mbon Nineveh ẹyedaha ẹda ke ini ikpe ye emana emi ẹnyụn̄ ẹbiom enye ikpe; koro mmọ ẹkekabarede esịt ke se Jonah ọkọkwọrọde;+ edi, sese! se ikponde ikan+ Jonah odu mi.
33 Owo idomoke utuenikan̄ inịm ke ubet unịm n̄kpọ m̀mê ndimen aban̄ mfụk, edi ẹwụk ke uwụk utuenikan̄,+ man mbon oro ẹdụkde ẹkpekụt un̄wana.
34 Utuenikan̄ idem fo edi enyịn fo. Ke ini enyịn fo enen̄erede ese, ofụri idem fo ayayama n̄ko;+ edi ke ini enye ọdiọkde, idem fo eyekịm n̄ko.
35 Ke ntre, kpeme idem, mbak un̄wana eke odude fi ke idem edidi ekịm.+
36 Ntre, edieke ofụri idem fo ayamade, baba nde kiet mînyụn̄ ikịmke, enye ayayama+ ofụri ofụri nte emi utuenikan̄ ayamade ọnọ fi un̄wana.”
37 Ke ini enye ama eketịn̄ ikọ oro ama, Pharisee kiet okot enye ete edidia udia+ ye imọ. Ntre enye odụk aka onyụn̄ eketie ke itie udia.
38 Nte ededi, idem akpa Pharisee oro ndikụt nte enye mîbemke iso iyet ubọk+ ndien edidia udia.
39 Edi Ọbọn̄ ọdọhọ enye ete: “Ke emi mbufo mme Pharisee ẹnanam edem cup ye usan ẹsana, edi esịt+ mbufo ẹyọhọ ye n̄kpọ n̄wo ye idiọkido.+
40 Mbufo mme anana-ibuot owo! Nte idịghe enye emi akanamde edem+ anam esịt n̄ko?
41 Ẹkam ẹda mme n̄kpọ eke ẹdude ke esịt ẹnọ mme ubuene,*+ ndien, sese! kpukpru n̄kpọ eken ẹban̄ade mbufo ẹyesana.
42 Edi mbọm mbufo mme Pharisee, koro mbufo ẹsiode ubak ikọn̄ mint ye ikọn̄ rue ye kpukpru ikọn̄udia kiet ke itie duop ẹnọ,+ edi mbufo ẹfụmi unenikpe ye ima Abasi! Edi mbiomo mbufo ndinam mme n̄kpọ emi, edi ẹkûnyụn̄ ẹtre ndinam mmọ eken.+
43 Mbọm mbufo mme Pharisee, koro mbufo ẹmade n̄kpọitie iso ke mme synagogue ye ekọm ke an̄waurua!+
44 Mbọm mbufo, koro mbufo ẹbietde mme udi eke ẹdịbede, eke mme owo ẹdọkde ẹsan̄a mînyụn̄ idiọn̄ọke!”+
45 Owo kiet ke otu mmọ emi ẹfiọkde Ibet+ ọbọrọ enye ete: “Andikpep, ke editịn̄ n̄kpọ emi, afo ọmọsọn̄ọ nnyịn enyịn n̄ko.”
46 Edi enye ọdọhọ ete: “Mbọm mbufo n̄ko emi ẹfiọkde Ibet, koro mbufo ẹbọpde mbiomo eke ọsọn̄de ndibiom ẹdori owo ke idem, edi mbufo ke idem mbufo idaha nnuenubọk kiet itụk mbiomo oro!+
47 “Mbọm mbufo, koro mbufo ẹbotde udi mme prọfet, edi mme ete ete mbufo ẹkewot mmọ!+
48 Ke akpanikọ mbufo ẹdi ntiense ẹban̄a edinam mme ete ete mbufo, ẹnyụn̄ ẹnyịme+ se mmọ ẹkenamde, koro mmọ emi ẹkewotde+ mme prọfet edi mbufo ke ẹbot mme udi mmọ.
49 Mmọdo, ọniọn̄+ Abasi ọdọhọ n̄ko ete, ‘Nyosio mme prọfet ye mme apostle ndọn̄ ẹtiene mmọ, ndien mmọ ẹyewot ẹnyụn̄ ẹkọbọ ndusụk mmọ,
50 man ẹkpebụp iyịp kpukpru mme prọfet+ oro ẹkeduọkde toto ke editọn̄ọ ererimbot ke ubọk emana emi,+
51 ọtọn̄ọde ke iyịp Abel+ tutu esịm iyịp Zechariah,+ emi ẹkewotde ke ufọt itieuwa ye ufọk Abasi.’+ Ih, ndọhọ mbufo nte, ẹyebụp iyịp mmọ ke ubọk emana emi.
52 “Mbọm mbufo emi ẹfiọkde Ibet, koro mbufo ẹmemen ukpọhọde ifiọk ẹfep;+ mbufo ke idem mbufo ibehe idụk, ẹmenyụn̄ ẹbiọn̄ọ mmọ eke ẹyomde ndibe ndụk!”+
53 Ntre ke ini enye otode do ọwọrọ, mme scribe* ye mme Pharisee ẹtọn̄ọ ndiyịre enye idiọk idiọk nnyụn̄ mfak enye mbụme mban̄a ediwak n̄kpọ efen,
54 ẹkọkde ẹbet+ enye, ẹte ida ikọ inua esie imụm+ enye.
