Luke 13;1-35
13 Ndusụk owo ẹma ẹdu do ke ini oro, emi ẹketịn̄de ẹnọ enye ẹban̄a mbon Galilee+ emi Pilate akadade iyịp mmọ abuak ye uwa mmọ.
2 Ntre enye ọbọrọ mmọ ete: “Nte mbufo ẹkere ke mbon Galilee emi ẹma ẹdiọk+ ẹkan ofụri mbon Galilee eken koro mme n̄kpọ emi ẹkesịmde mmọ?
3 Ndọhọ mbufo ke akpanikọ nte, baba; edi, ke mbufo mîkabakede esịt, kpukpru mbufo ẹyetak kpasụk ntre.+
4 Mîdịghe, owo efịteta emi tọwa Siloam ọkọduọde ọtọ, onyụn̄ owotde mmọ, nte mbufo ẹkere ke mmọ ẹkama isọn eke okponde akan eke kpukpru owo eken emi ẹdụn̄de ke Jerusalem?
5 Ndọhọ mbufo ke akpanikọ nte, baba; edi, ke mbufo mîkabakede esịt, kpukpru mbufo ẹyetak kpasụk ntre.”+
6 Ekem enye ọnọ uwụtn̄kpọ emi ete: “Owo kiet ekenyene eto fig emi ẹtọde ke in̄wan̄ vine+ esie, enye onyụn̄ edi ediyom mfri ke esịt,+ edi ikwe.+
7 Ndien enye ọdọhọ ọdiọn̄ vine ete, ‘Sese isua ita+ ẹdi emi n̄kasan̄a nyom mfri ke eto fig emi, edi n̄kwe. Kpi enye duọk!+ Ntak emi enye adade abiat isọn̄?’
8 Ọdiọn̄ vine oro ọbọrọ enye ete, ‘Eteufọk, yak enye ada+ isua emi n̄ko, tutu ntịbi isọn̄ n̄kanade enye n̄kụk nnyụn̄ nduọn̄ọ mbio ke esịt;
9 ndien edieke enye edin̄wụmde mfri ke ini iso, eyetịm ọfọn; edi edieke mîn̄wụmke, afo eyekpi enye ọduọk’”+
10 Edi nte enye ekpepde owo n̄kpọ ke synagogue kiet ke sabbath.
11 Sese! Odu n̄wan emi enyenede spirit+ mmemidem ke isua efịteta, enye onyụn̄ onụhọ, inyụn̄ ikemeke ndinen̄ede nda baba esisịt.
12 Ke ini Jesus okụtde enye, okot enye ete: “N̄wan owo, ẹsana fi ke mmemidem fo ẹyak.”+
13 Enye onyụn̄ odori enye ubọk ke idem; ndien kpa idaha oro enye enen̄ede ada,+ onyụn̄ ọnọ Abasi ubọn̄.
14 Edi akwa owo emi etiede ibuot ke synagogue ofụt esịt koro Jesus ọkọkde udọn̄ọ ke sabbath, onyụn̄ ọdọhọ otuowo ete: “Usen itiokiet ẹdu oro ẹkpenamde utom;+ ntre mbufo ẹdi ke mme usen oro man ẹnam udọn̄ọ ẹkụre mbufo, ẹkûdi ke usen sabbath.”+
15 Edi, Ọbọn̄ ọbọrọ enye ete: “Mbon mbubịk,+ nte mbufo owo kiet kiet isitatke enan̄ m̀mê ass mbufo ke ufọk ufene ke sabbath ida iwọrọ ikọnọ mmọn̄ ọn̄wọn̄?+
16 Nte ini ikemke nte ẹkpetatde n̄wan emi edide eyen Abraham+ mi n̄kpọkọbi emi ke usen sabbath, kpa n̄wan emi Satan ọkọbọpde ke ofụri isua efịteta emi?”
17 Edi, ke ini enye etịn̄de ikọ emi, bụt anam kpukpru mme andibiọn̄ọ enye;+ edi ofụri otuowo ẹdat esịt ke kpukpru mme utịben̄kpọ eke enye anamde.+
18 Ntre ke enye ọdọhọ ete: “Obio ubọn̄ Abasi ebiet nso, ndinyụn̄ nda enye ndomo ye nso?+
19 Enye ebiet n̄kpasịp mustard kiet eke owo emende ọtọ ke in̄wan̄esa esie, ndien enye ọkọri okpon akabade eto, mme inuen enyọn̄+ ẹnyụn̄ ẹdụn̄ ke mme n̄kọk esie.”+
20 Ndien enye ọtọn̄ọ ntak ọdọhọ ete: “Ndida obio ubọn̄ Abasi ndomo ye nso?
21 Enye ebiet leaven, emi n̄wan emende esịn ke ikpọ udomo ndomuyo ita tutu ofụri ebok oro ofụt.”+
22 Ekem enye asan̄a ebe ke mme obio ye obio-in̄wan̄, ekpep mme owo n̄kpọ onyụn̄ asan̄a ebe aka Jerusalem.+
23 Edi owo kiet ọdọhọ enye ete: “Ọbọn̄, nte mmọ emi ẹnyan̄ade iwakke?”+ Enye ọbọrọ mmọ ete:
24 “Mbufo ẹn̄wana+ ọkpọsọn̄ ndibe ke mfafaha usụn̄ ndụk,+ koro ndọhọ mbufo nte ediwak owo ẹyeyom ndidụk edi idikemeke,+
25 ke ini enyeneufọk adahade ke enyọn̄ ọkọbi usụn̄, ndien mbufo ẹtọn̄ọ ndida ke an̄wa n̄kọn̄ usụn̄, ẹte, ‘Ete, berede usụn̄ nọ nnyịn.’+ Edi enye ọyọbọrọ mbufo ete, ‘Mfiọkke ebiet eke mbufo ẹtode.’+
26 Ekem mbufo ẹyetọn̄ọ ndidọhọ ẹte, ‘Nnyịn ima idia inyụn̄ in̄wọn̄ n̄kpọ ke iso fo, afo ama onyụn̄ ekpep n̄kpọ ke ikpọ efak nnyịn.’+
27 Edi enye ọyọbọrọ mbufo ete, ‘Mfiọkke ebiet eke mbufo ẹtode. Ẹdian̄ade mi ke idem, kpukpru mbufo mme anam ukwan̄ido!’+
28 Do ke mbufo ẹditua ẹnyụn̄ ẹta edet,+ ke ini mbufo ẹdikụtde Abraham ye Isaac ye Jacob ye kpukpru mme prọfet ke obio ubọn̄ Abasi,+ edi ẹdisiode mbufo ẹduọk ke an̄wa.
29 N̄ko-n̄ko, mme owo ẹyeto ke edem usiahautịn ye edem usoputịn, ye edem edere ye edem usụk ẹdi,+ ẹnyụn̄ ẹditie ke okpokoro ke obio ubọn̄ Abasi.+
30 Ndien, sese! mme ekperedem ẹdu eke ẹdibemde iso, mme ebeiso ẹnyụn̄ ẹdu eke ẹdikperede edem.”+
31 Kpa ke hour oro ndusụk mme Pharisee ẹdi ẹdidọhọ enye ẹte: “Wọrọ kpọn̄ ebiet emi nyọn̄, koro Herod ke oyom fi ndiwot.”
32 Ndien enye ọdọhọ mmọ ete: “Ẹka ẹkedọhọ ebuaikọt+ oro ẹte, ‘Sese! Ami ke mbịn mme demon nduọn̄ọ nnyụn̄ n̄kọk udọn̄ọ mfịn ye n̄kpọn̄, ndien ke ọyọhọ usen ita nyanam mma.’+
33 Edi, ana n̄ka isan̄ mfịn ye n̄kpọn̄ ye okụt, koro owo inyịmeke ẹwot prọfet ke mîdịghe ke Jerusalem.+
34 Jerusalem, Jerusalem, afo emi owotde+ mme prọfet onyụn̄ ọtọn̄ọde mmọ emi ẹdọn̄de ẹtiene fi ke itiat+—adan̄a ediwak ini didie ke n̄koyom nditan̄ nditọ fo mbon ọtọkiet nte unen esidọn̄de nditọ esie ke idak mba+ esie, edi mbufo ikoyomke!+
35 Sese! Ẹmekpọn̄ ufọk+ mbufo ẹnọ mbufo. Ndọhọ mbufo nte, Mbufo idikwe mi tutu mbufo ẹdọhọ ẹte, ‘Itoro enyene enye emi edide ke enyịn̄ Jehovah!’”+
