Luke 17;1-37
17 Ekem enye ọdọhọ mme mbet esie ete: “Owo ikemeke ndinyan̄a, ana n̄kpọ iduọ ẹdu.+ Edi mbọm owo eke adade mmọ edi!+
2 Ọkpọfọn ye enye edieke ẹkpedade itiat ukọkn̄kpọ ẹkọn̄ọ enye ke itọn̄, ndien ẹduọk enye ke inyan̄,+ akan enye ndinam kiet ke otu n̄kpri nditọ emi atuak ukot ọduọ.+
3 Ẹtịm ẹkpeme idem mbufo. Edieke eyenete fo eduede fi sua nọ enye,+ ndien edieke enye atuade n̄kpọfiọk fen nọ enye.+
4 Idem ọkpọkọm enye edue fi utịm ikatiaba ke usen onyụn̄ afiak edi etiene fi utịm ikatiaba, edidọhọ ete, ‘Mmatua n̄kpọfiọk,’ afo enyene ndifen enye.”+
5 Ekem mme apostle ẹdọhọ Ọbọn̄ ẹte: “Nam mbuọtidem nnyịn etetịm okpon.”+
6 Edi Ọbọn̄ ọdọhọ ete: “Edieke mbufo ẹnyenede mbuọtidem eke etiede nte n̄kpasịp mustard, mbufo ẹkpedọhọ obubịt eto mulberry emi ẹte, ‘Wụhọde ka kowụhọ ke inyan̄!’ ndien enye okpokop uyo mbufo.+
7 “Anie ke otu mbufo emi enyenede ofụn eke ofụn̄de isọn̄ m̀mê ọbọkde erọn̄ edidọhọ enye ke ini enye otode in̄wan̄ ọnyọn̄ edi, ete, ‘Di mi inikiet ditie ke okpokoro udia’?
8 Utu ke oro, nte ididọhọke enye ite, ‘Nam udia mbubreyo nọ mi ndia, nyụn̄ bọbọ mbọbọ san̄a utom nọ mi tutu ndia nnyụn̄ n̄n̄wọn̄ n̄kpọ mma, ekem afo ayadia onyụn̄ ọn̄wọn̄ okwo’?
9 Nte enye ọyọkọm ofụn oro koro anamde se ẹkenọde enye anam?
10 Ntre mbufo, n̄ko, ke ini mbufo ẹnamde kpukpru se ẹnọde mbufo ẹnam, ẹdọhọ ẹte, ‘Nnyịn idi ifịn eke mînyeneke ufọn.+ Nnyịn inam se ikpanamde.’”
11 Edikem ke adan̄aemi enye akade Jerusalem, enye asan̄a ebe ke ufọt Samaria ye Galilee.+
12 Ndien nte enye odụkde obio-in̄wan̄ kiet, mbon akpamfia+ duop ẹdisobo ye enye, edi mmọ ẹda nsannsan.
13 Ndien mmọ ẹmenede uyo mmọ ẹfiori ẹte: “Jesus, Andikpep, tua nnyịn mbọm!”+
14 Ndien ke ini enye okụtde mmọ, enye ọdọhọ mmọ ete: “Ẹka ẹkewụt mme oku idem mbufo.”+ Edi nte mmọ ẹsan̄ade ẹka, ẹnam mmọ ẹsana.+
15 Ke ini owo kiet ke otu mmọ okụtde ete ẹma ẹnam udọn̄ọ okụre imọ, enye afiak edi edinọ Abasi ubọn̄+ ke ọkpọsọn̄ uyo.
16 Ndien enye ọduọ ekịbi iso esie ke isọn̄ ke ukot Jesus,+ ọkọm enye; n̄ko-n̄ko, enye ekedi owo Samaria.+
17 Jesus obụp ete: “Nte idịghe owo duop ke ẹkenam ẹsana? Enye, ndien, owo usụkkiet eken?
18 Nte owo baba kiet idụhe eke afiakde edi edinọ Abasi ubọn̄ ke mîbọhọke owo idụt efen emi?”
19 Ndien enye ọdọhọ owo oro ete: “Daha nyọn̄ okwo; mbuọtidem fo anam idem ọsọn̄ fi.”+
20 Edi ke ini mme Pharisee ẹbụpde enye ini emi obio ubọn̄ Abasi edidide,+ enye ọbọrọ mmọ ete: “Obio ubọn̄ Abasi idịghe nte ẹkụtde ke enyịn,
21 mme owo idinyụn̄ idọhọke ite, ‘Se enye mi!’ mîdịghe, ‘Se enye ko!’+ Koro, sese! obio ubọn̄ Abasi odu ke otu mbufo.”+
22 Ekem enye ọdọhọ mme mbet ete: “Mme usen ẹyedi eke mbufo ẹdiyomde ndikụt kiet ke otu usen Eyen owo edi mbufo idikwe.+
23 Ndien mme owo ẹyedọhọ mbufo ẹte, ‘Se enye ko!’ mîdịghe, ‘Se enye mi!’+ Ẹkûwọrọ ẹka, ẹkûnyụn̄ ẹfen̄e ẹtiene mmọ.+
24 Koro kpa nte emịnen̄mịnen̄+ ọwọrọde oto n̄kan̄ ikpaenyọn̄ kiet ayama esịm n̄kan̄ ikpaenyọn̄ eken, ntre ke edidi ye Eyen owo.+
25 Edi, enye enyene ndibem iso n̄kụt ediwak ndutụhọ, mbon emana emi ẹyenyụn̄ ẹsịn enye.+
26 Akan oro, kpa nte ekedide ke mme usen Noah,+ kpasụk ntre ke edidi n̄ko ke usen Eyen owo:+
27 mmọ ẹkedia n̄kpọ, ẹnyụn̄ ẹn̄wọn̄ n̄kpọ, irenowo ẹdọ ndọ, ẹda iban ẹnọ ke ndọ, tutu esịm usen emi Noah odụkde ubom, ndien ukwọ edi edisobo mmọ kpukpru.+
28 Kpasụk nte okonyụn̄ edide ke eyo Lot:+ mmọ ẹkedia n̄kpọ, ẹnyụn̄ ẹn̄wọn̄ n̄kpọ, mmọ ẹdep, ẹnyụn̄ ẹnyam, mmọ ẹtọ in̄wan̄, ẹnyụn̄ ẹbọp ufọk.
29 Edi ke usen oro Lot ọwọrọde ke Sodom, ikan̄ ye sulphur ẹto enyọn̄ ẹdep ẹdisobo mmọ kpukpru.+
30 Kpasụk ntre ke edidi ke usen oro Eyen owo ediyararede idem.+
31 “Ke usen oro yak owo eke odude ke enyọn̄ ufọk edi emi mme n̄kpọ esie ẹdude ke esịt ufọk okûsụhọde aka nditan̄ mmọ; kpasụk ntre n̄ko owo eke odude ke in̄wan̄ okûfiak aka ebịne mme n̄kpọ oro ẹdude ke edem.
32 Mbufo ẹti n̄wan Lot.+
33 Owo eke oyomde ndinyan̄a ukpọn̄ esie ọyọduọk enye, edi owo eke ọduọkde eyenịm enye uwem.+
34 Ndọhọ mbufo nte, Ke okoneyo oro irenowo iba ẹyena ke n̄kpana kiet; ẹyeda kiet, edi ẹkpọn̄ enye eken.+
35 Iban iba ẹyekọk n̄kpọ ke itiat ukọkn̄kpọ kiet; ẹyeda kiet, edi ẹkpọn̄ enye eken.”+
36 * ——
37 Ntre mmọ ẹbụp enye ẹte: “Ọbọn̄, ke m̀mọ̀n̄?” Enye ọdọhọ mmọ ete: “Ebiet eke okpo anade,+ do n̄ko ke mme ntrukpom ẹdisop idem.”+
Mme Ikọ Idakisọn̄
^ Ufan̄ikọ emi odu ke ndusụk edikabade Bible, edi enye idụhe ke uwetn̄kpọ usem Greek eke Westcott ye Hort, emi ekemde ye ata ediwak uwetn̄kpọ usem Greek eset.
