Luke 21;1-38
21 Ekem enye emenede enyịn okụt nte mbon inyene ẹsịnde enọ mmọ ke n̄kpọ usịn okụk.+
2 Ndien enye okụt ubuene ebeakpa kiet nte esịnde okudọk okụk iba, emi edide ata ekpri okụk,+
3 onyụn̄ ọdọhọ ete: “Ke akpanikọ ke ndọhọ mbufo nte, Ebeakpa emi, okposụkedi ebuenede, ama esịn okụk akan kpukpru se mmọ ẹkesịnde.+
4 Koro kpukpru mmọ ẹkesio mme enọ ke nyọhọ-nsụhọ mmọ ẹsịn, edi n̄wan emi, ke unana esie, ekesịn kpukpru se enye akpadade odu uwem.”+
5 Ekem, nte ndusụk owo ẹtịn̄de ẹban̄a temple, adan̄a nte ẹkedade ndiye itiat ye mme n̄kpọ emi ẹma ẹkeyak ẹnọ ẹbana enye,+
6 enye ọdọhọ ete: “Amaedi mme n̄kpọ emi mbufo ẹkụtde mi, mme usen ẹyedi eke owo mîdikpọn̄ke itiat kiet ke enyọn̄ itiat efen, eke owo mîdidorokede iduọk.”+
7 Ndien mmọ ẹbụp enye, ẹte: “Andikpep, ini ewe ke mme n̄kpọ emi ẹditịbe, nso idinyụn̄ idi idiọn̄ọ ini emi ẹnịmde ẹnọ kpukpru n̄kpọ emi nditịbe?”+
8 Enye ọbọrọ ete: “Ẹkpeme mbak ẹdida mbufo ẹtụn usụn̄;+ koro ediwak owo ẹyedi ke enyịn̄ mi, ẹnyụn̄ ẹdọhọ ẹte, ‘Ami ndi enye,’ n̄ko, ‘Edikem ini asan̄a ekpere.’+ Ẹkûwọrọ ẹtiene mmọ.
9 N̄ko-n̄ko, ke ini mbufo ẹdikopde ẹban̄a ekọn̄ ye mme ndutịme, ẹkûkop ndịk.+ Koro ana mme n̄kpọ emi ẹbem iso ẹtịbe, edi utịt ididịghe kpa idaha oro.”
10 Ekem enye ọdọhọ mmọ ete: “Idụt ayadaha an̄wana ye idụt,+ obio ubọn̄ kiet oyonyụn̄ adaha an̄wana ye obio ubọn̄ en̄wen;+
11 ikpọ unyekisọn̄ ẹyedu, ndiọi udọn̄ọ ye akan̄ ẹyenyụn̄ ẹdu ke nsio nsio ebiet;+ mme owo ẹyekụt n̄kpọ ndịk, mmọ ẹyenyụn̄ ẹkụt ikpọ idiọn̄ọ eke ẹtode ke enyọn̄.+
12 “Edi mbemiso kpukpru n̄kpọ emi ẹtịbe, mme owo ẹyemụm mbufo ẹnyụn̄ ẹkọbọ+ mbufo, ẹyeda mbufo ẹyak ẹnọ ke mme synagogue ẹnyụn̄ ẹsịn mbufo ke ufọk-n̄kpọkọbi, ẹnyụn̄ ẹda mbufo ẹka iso ndidem ye mme andikara ke ntak enyịn̄ mi.+
13 Emi ayakabade edi ntiense ọnọ mbufo.+
14 Ntre ẹbiere ke esịt mbufo ẹte mmimọ idibemke iso ikere nte mmimọ iditịn̄de ikọ inyan̄a idem,+
15 koro ami nyọnọ mbufo ikọ eke ẹditịn̄de* ye ọniọn̄, emi kpukpru mme andibiọn̄ọ mbufo mîdikemeke ndifan̄a m̀mê ndineni.+
16 Akan oro, mme ete ye eka+ ye nditọete ye iman ye mme ufan ẹyeda mbufo ẹyak ẹnọ, ẹyenyụn̄ ẹnam ẹwot ndusụk mbufo;+
17 ndien mbufo ẹyedi mbon emi kpukpru owo ẹsuade ke ntak enyịn̄ mi.+
18 Edi baba idet+ kiet ke ibuot mbufo iditakke.
19 Mbufo ẹdibọ ukpọn̄ mbufo ẹnyene ebe ke ndiyọ.+
20 “N̄ko-n̄ko, ke ini mbufo ẹkụtde nte mbonekọn̄ ẹkande Jerusalem ẹkụk,+ ẹfiọk ndien ẹte n̄wụre esie asan̄a ekpere.+
21 Adan̄aoro yak mbon oro ẹdude ke Judea ẹfehe ẹka ikpọ obot, n̄ko yak mmọ eke ẹdude ke esịt esie ẹwọn̄ọ, yak mmọ eke ẹdude ke in̄wan̄ ẹkûnyụn̄ ẹdụk esịt esie;+
22 koro emi edi mme usen eke ẹbierede ikpe nte enende, man kpukpru n̄kpọ emi ẹkewetde ẹkpesu.+
23 Mbọm iban idịbi ye mmọ emi ẹnọde nditọ eba ke mme usen oro!+ Koro akwa mbaba eyesịm isọn̄, akwa iyatesịt oyonyụn̄ odoro mbio obio emi ke idem;
24 ndien mmọ ẹyeduọn̄ọ ke iso akan̄kan̄, ẹyenyụn̄ ẹtan̄ mmọ nte mbuotekọn̄ ẹka kpukpru mme idụt;+ ndien mme idụt ẹyedịghi Jerusalem ke ikpat, tutu edimek ini+ mme idụt ọyọhọ.
25 “N̄ko, mme idiọn̄ọ ẹyedu ke utịn+ ye ọfiọn̄ ye ntantaọfiọn̄, ndien editịmede esịt oyomụm mme idụt isọn̄, owo idifiọkke usụn̄ ubọhọ ke ntak emi inyan̄+ ye mbufụt esie ẹyomode,+
26 ke adan̄aemi idem eyemede mme owo oto ke ndịk+ ye editie mbet mme n̄kpọ eke ẹdiwọrọde ẹnọ isọn̄;+ koro ẹyenyen̄e mme odudu ikpaenyọn̄.+
27 Ndien adan̄aoro mmọ ẹyekụt Eyen owo+ asan̄ade ke obubịt enyọn̄ edi ye odudu ye akwa ubọn̄.+
28 Edi nte mme n̄kpọ emi ẹtọn̄ọde nditịbe, ẹnen̄ede ẹda ẹnyụn̄ ẹmenede ibuot mbufo ke enyọn̄, koro edinyan̄a mbufo ke asan̄a ekpere.”
29 Ndien enye ọnọ mmọ uwụtn̄kpọ kiet ete: “Mbufo ẹse eto fig ye kpukpru mme eto eken:+
30 Ke ini mmọ ẹsiahade ikọn̄, mbufo ẹkụt ẹnyụn̄ ẹfiọk ke idem mbufo ẹte ndaeyo ke ekpere.+
31 Kpasụk ntre mbufo n̄ko, ke ini mbufo ẹkụtde nte mme n̄kpọ emi ẹtịbede, ẹfiọk ẹte obio ubọn̄ Abasi emekpere.+
32 Ke akpanikọ ke ndọhọ mbufo nte, Emana emi idibehe ifep tutu kpukpru n̄kpọ ẹwọrọ ẹsu.+
33 Enyọn̄ ye isọn̄ ẹyebe ẹfep,+ edi ikọ mi idibehe ifep tutu amama.+
34 “Edi ẹkpeme idem mbak uyụhọ udia ye ọkpọsọn̄+ un̄wọn̄ mmịn ye editịmede esịt+ uwem emi ẹdinam esịt mbufo ẹkabade ẹdobi, ndien usen oro edibuat mbufo+
35 nte ekpọ.+ Koro enye eyesịm kpukpru mbon oro ẹdụn̄de ke ofụri iso isọn̄.+
36 Ẹdu ke edidemede,+ ndien, kpukpru ini ẹnam n̄kpeubọk+ man mbufo ẹkpekeme ndibọhọ kpukpru n̄kpọ emi ẹditịbede, nnyụn̄ nda ke iso Eyen owo.”+
37 Ntre enye ekpep owo n̄kpọ ke temple+ ke uwemeyo, edi ke okoneyo enye ọwọrọ akadan̄ ke obot emi ekerede Obot Olive.+
38 Ndien kpukpru owo+ ẹbak ẹtiene enye ke temple ke usenubọk ndikop ikọ esie.
Mme Ikọ Idakisọn̄
^ At. Ed., “inua.”
