Luke 4;1-44
4 Edi Jesus ọyọhọ ye edisana spirit, ọwọn̄ọde ọkpọn̄ Jordan, ndien spirit ada enye asan̄a ke wilderness+
2 ke usen aba,+ ke adan̄aemi Devil odomode+ enye. N̄ko-n̄ko, enye idiaha n̄kpọ ke mme usen oro, ndien ke ini mme usen oro ẹbede, biọn̄ ọdọn̄ enye.
3 Edi Devil ọdọhọ enye ete: “Edieke afo edide eyen Abasi, dọhọ itiat emi akabade edi uyo.”
4 Edi Jesus ọbọrọ enye ete: “Ẹwet ẹte, ‘Idịghe uyo ikpọn̄ ke ana owo ada odu uwem.’”+
5 Ekem enye ada enye ọdọk edikon̄ ebiet onyụn̄ okowụt enye kpukpru mme obio ubọn̄ isọn̄ ke idaha kiet;
6 ndien Devil ọdọhọ enye ete: “Nyọnọ fi ofụri odudu+ emi ye ubọn̄ mmọ, koro ẹma ẹyak enye ẹnọ mi, ndien ami nda enye nnọ owo eke mmade.+
7 Ke ntre, edieke afo atuakde ibuot*+ ke iso mi, kpukpru ẹyedi okwo.”
8 Jesus ọbọrọ enye ete: “Ẹwet ẹte, ‘Edi Jehovah Abasi+ fo ke ana afo atuak ibuot ọnọ, onyụn̄ edi enye ikpọn̄ ke ana afo anam edisana utom ọnọ.’”+
9 Ndien enye ada enye odụk Jerusalem onyụn̄ anam enye ada ke enyọn̄ ibibene+ temple onyụn̄ ọdọhọ enye ete: “Edieke afo edide eyen Abasi, da mi sio idemfo duọk ke isọn̄;+
10 koro ẹwet ẹte, ‘Enye ọyọnọ mme angel esie uyo aban̄a fi, ete ẹkpeme fi,’+
11 ndien, ‘Mmọ ẹyekama fi ke ubọk mmọ, mbak afo udutuak ukot fo ke itiat.’”+
12 Jesus ọbọrọ enye ete: “Ẹdọhọ ẹte, ‘Kûdomo Jehovah Abasi fo.’”+
13 Ntre ke Devil ama okokụre kpukpru idomo emi, adaha ọkpọn̄ enye tutu ifet afiak eberede.+
14 Ekem Jesus afiak edi Galilee+ ke odudu spirit. Ndien nti n̄kpọ emi ẹtịn̄de ẹban̄a enye ẹsuana ke ofụri n̄kann̄kụk oro.+
15 N̄ko, enye ọtọn̄ọ ndikpep n̄kpọ ke mme synagogue mmọ, kpukpru owo ẹnyụn̄ ẹkpono enye.+
16 Ekem enye edi Nazareth,+ ebiet emi ẹkebọkde enye; ndien, nte ido esie edide ke usen sabbath, enye odụk synagogue,+ onyụn̄ adaha ada ndikot n̄wed.
17 Ntre ẹnọ enye ikpan̄wed prọfet Isaiah, ndien enye atat ikpan̄wed emi onyụn̄ okụt ebiet emi ẹwetde ẹte:
18 “Spirit+ Jehovah odoro mi ke idem, koro enye ama eyet mi aran enịm ete ntan̄a eti mbụk nnọ mme ubuene, enye ama osio mi ọdọn̄ ete n̄kwọrọ ubọhọ-ufụn nnọ mbuotekọn̄ nnyụn̄ n̄kwọrọ edifiak n̄kụt usụn̄ nnọ mme nnan, nnyụn̄ nnam mmọ emi ẹfịkde ẹnyọn̄ọ ke ifụre,+
19 nnyụn̄ n̄kwọrọ isua mfọnido Jehovah.”+
20 Ndien enye ofụt ikpan̄wed oro, afiak ayak ọnọ asan̄autom onyụn̄ osụhọde etetie; kpukpru owo ke synagogue ẹnyụn̄ ẹwụk enyịn ẹse enye.
21 Ekem enye ọtọn̄ọ ndidọhọ mmọ ete: “Mfịn emi itie N̄wed Abasi oro mbufo ẹsụk ẹkopde do omosu.”+
22 Ndien kpukpru mmọ ẹtọn̄ọ nditịn̄ eti ikọ ntiense mban̄a enye, idem onyụn̄ akpa mmọ ndikop ndinem ikọ+ eke ẹwọn̄ọde enye ke inua, ndien mmọ ẹdọhọ ẹte: “Nte emi idịghe eyen Joseph?”+
23 Ndien enye ọdọhọ mmọ ete: “Mmọfiọk ke mbufo ẹmọn̄ ẹtop n̄ke emi ẹban̄a mi, ‘Abiausọbọ,+ kọk idemfo,’ ẹnyụn̄ ẹdọhọ ẹte, mme n̄kpọ+ oro nnyịn ikokopde nte ẹtịbede ke Capernaum,+ nam mi n̄ko ke obio emana fo.”+
24 Edi enye ọdọhọ ete: “Ke akpanikọ ke ndọhọ mbufo nte owo idaha prọfet ndomokiet ke n̄kpọ ke obio emana esie.
25 Ke uwụtn̄kpọ, ntịn̄ akpanikọ nnọ mbufo nte, Ediwak mme ebeakpa ẹma ẹdu ke Israel ke eyo Elijah, ke ini ẹkesịride enyọn̄ isua ita ye ọfiọn̄ itiokiet, tutu esịn akamba akan̄ odu ke ofụri isọn̄,+
26 edi owo ikọdọn̄ke Elijah aka ebịne baba kiet ke otu iban oro, ke mîbọhọke ebeakpa emi okodude ke Zarephath+ ke isọn̄ Sidon.
27 N̄ko, ediwak mbon akpamfia ẹma ẹdu ke Israel ke eyo prọfet Elisha, edi owo ikanamke ndomokiet ke otu mmọ asana, ke mîbọhọke Naaman owo Syria.”+
28 Edi esịt ofụt kpukpru mmọ emi ẹkopde n̄kpọ emi ke synagogue;+
29 mmọ ẹnyụn̄ ẹdaha ke enyọn̄ ẹbịn enye ẹsio ke obio, ẹnyụn̄ ẹda enye ẹka ibuot obot emi ẹbọpde obio mmọ ẹdori, man ẹsio enye ibuot ibuot ẹduọk ke isọn̄.+
30 Edi enye asan̄a ke ufọt mmọ ebe ọnyọn̄ esiemmọ.+
31 Ndien enye osụhọde aka Capernaum,+ obio Galilee. Enye onyụn̄ ekpep mmọ n̄kpọ ke sabbath;
32 ndien idem akpa mmọ aban̄a usụn̄ nte enye ekpepde owo n̄kpọ,+ koro ikọ esie enyenede odudu.+
33 Edi owo kiet odu ke synagogue emi enyenede spirit,+ kpa ndedehe demon, ndien owo oro ofiori ke ọkpọsọn̄ uyo ete:
34 “Ah! Nnyịn isan̄a nso ye afo,+ Jesus eyen Nazareth?+ Nte afo ekedi ndisobo nnyịn? Mmetịm mfiọk+ owo emi afo edide, afo edi Edisana Eyen Abasi.”+
35 Edi Jesus aduari spirit oro, ete: “Kịbi inua, nyụn̄ wọrọ enye ke idem.” Ntre, ke ama okosio owo oro ọduọk ke iso mmọ, demon oro ọwọrọ enye ke idem inyụn̄ inọhọ enye unan.+
36 Ndien, idem akpa kpukpru owo, mmọ ẹnyụn̄ ẹtọn̄ọ ndineme ye kiet eken, ẹte: “Nso orụk ikọ edi emi, koro enye adade nsọn̄uyo ye odudu owụk mme ndedehe spirit, ndien mmọ ẹwọn̄ọ?”+
37 Ntre ke mbụk emi aban̄ade enye ọdọdiọn̄ asuana ke kpukpru ebiet ke n̄kann̄kụk oro.+
38 Ke enye ama akadaha ọwọrọ ke synagogue enye odụk ufọk Simon. Edi eka an̄wan Simon ọdọn̄ọ ọkpọsọn̄ ufiopidem, ndien mmọ ẹkpe enye ubọk ẹban̄a n̄wan emi.+
39 Ntre enye ada ekpere enye onyụn̄ aduari ufiopidem,+ ndien ufiopidem ọkpọn̄ enye. Kpa idaha oro enye adaha ke enyọn̄ anam n̄kpọ ọnọ mmọ.+
40 Edi ke ini utịn osụhọrede, kpukpru owo eke ẹnyenede mbon emi ẹdọn̄ọde nsio nsio udọn̄ọ ẹda mmọ ẹsọk enye. Enye odori mmọ kiet kiet ubọk onyụn̄ ọkọk mmọ udọn̄ọ.+
41 Mme demon n̄ko ẹwọn̄ọ ediwak owo ke idem,+ ẹfiori ẹte: “Afo edi Eyen+ Abasi.” Edi, enye aduari mmọ, iyakke mmọ ẹsioro uyo,+ koro mmọ ẹfiọkde ẹte enye+ edi Christ.+
42 Nte ededi, ke ini eyo esierede, enye ọwọrọ aka ndobo ndobo ebiet.+ Edi otuowo ẹtọn̄ọ ndiyom enye ẹnyụn̄ ẹdi ẹdisịm enye, ẹnyụn̄ ẹdomo ndibiọn̄ọ enye ẹte okûkpọn̄ mmimọ.
43 Edi enye ọdọhọ mmọ ete: “Nnyene nditan̄a eti mbụk obio ubọn̄ Abasi nnọ mme obio en̄wen n̄ko, koro ẹkesio mi ẹdọn̄ ẹte ndinam emi.”+
44 Ndien enye asan̄a ọkwọrọ ikọ ke mme synagogue Judea.+
Mme Ikọ Idakisọn̄
^ M̀mê, “atuakde ibuot ini kiet.”
