Luke 5;1-39
5 Ini kiet ke adan̄aemi otuowo ẹberide enye ọkpọsọn̄ ẹnyụn̄ ẹkpan̄de utọn̄ ẹkop ikọ Abasi, enye ada ke mben n̄kpọdiọhọ mmọn̄ Gennesaret.*+
2 Ndien enye okụt ubom iba ẹyịrede ke mben n̄kpọdiọhọ mmọn̄ oro, edi mme ọkọiyak ẹma ẹwọn̄ọ ke esịt, ke ẹnyụn̄ ẹdarade iyịre mmọ.+
3 Enye odụk ubom kiet, emi enyenede Simon, onyụn̄ ọdọhọ enye onụk ubom oro adian̄ade ọkpọn̄ obot esisịt. Ekem enye osụhọde etetie ke ubom+ ọtọn̄ọ ndikpep otuowo n̄kpọ.
4 Ke enye ama eketịn̄ ikọ okụre, enye ọdọhọ Simon ete: “Ẹwat ẹka udem, ẹnyụn̄ ẹkeduọn̄ọ iyịre+ man ẹmụm iyak.”
5 Edi Simon ọbọrọ ete: “Andikpep, nnyịn ima ikpa utom ofụri okoneyo inyụn̄ imụmke baba n̄kpọ kiet,+ edi ke uyo fo nyọduọk iyịre.”
6 Ndien, ke ini mmọ ẹnamde emi, mmọ ẹmụm ata ediwak iyak. Ndien, iyịre mmọ ọtọn̄ọ ndiwaha.
7 Ntre ke mmọ ẹnam idiọn̄ọ ẹkot mme nsan̄a mmọ ke ubom enye eken ẹte ẹdi ẹdin̄wam mmimọ;+ mmọ oro ẹnyụn̄ ẹdi, ẹyọhọ ubom mbiba ye iyak, tutu mmọ ẹtọn̄ọ ndisịp.
8 Ke Simon Peter+ okụtde emi, ọduọ Jesus ke edọn̄, ọdọhọ ete: “Daha kpọn̄ mi, Ọbọn̄, koro ami ndide anamidiọk.”+
9 Koro idem akpade enye ye kpukpru mmọ emi ẹdude ye enye ke utọ ediwak iyak eke mmọ ẹmụmde,
10 kpasụk ntre n̄ko ye James ye John, nditọ Zebedee,+ mme nsan̄a Simon. Edi Jesus ọdọhọ Simon ete: “Kûfehe ndịk. Ọtọn̄ọde ke emi afo edikọ owo ye uwem.”+
11 Ntre ke mmọ ẹwat ubom ẹdidian ke obot, ẹnyụn̄ ẹkpọn̄ kpukpru n̄kpọ ẹtiene enye.+
12 Ke ini efen ke adan̄aemi enye odude ke obio kiet, sese! owo emi akpamfia ọyọhọde enye idem! Ke ini enye okụtde Jesus enye ọduọ ekịbi iso ke isọn̄ onyụn̄ eben̄e enye, ete: “Ọbọn̄, edieke afo akam amade, emekeme ndinam mi nsana.”+
13 Ndien enye anyanade ubọk otụk enye, ete: “Mmama. Sana.” Ndien kpa idaha oro akpamfia okụre enye.+
14 Ndien enye owụk owo oro ete okûtịn̄ ọnọ baba owo kiet:+ “Edi ka kowụt oku idemfo,+ nyụn̄ wa uwa+ kaban̄a edinam fi asana, kpa nte Moses eketemede, man edi ntiense ọnọ mmọ.”+
15 Edi etop esie ọdọdiọn̄ asuana, ndien akwa otuowo ẹdi ẹdisop idem ọtọkiet ndikpan̄ utọn̄ man enye onyụn̄ anam udọn̄ọ mmọ okụre.+
16 Edi, enye osụk odu ikpọn̄ ke desat onyụn̄ ọbọn̄ akam.+
17 Usen kiet, nte enye ekpepde mme owo n̄kpọ, mme Pharisee ye mme ekpep ibet emi ẹtode ke kpukpru obio-in̄wan̄ Galilee ye Judea ye Jerusalem ẹnyụn̄ ẹtie do; odudu Jehovah onyụn̄ odu ye enye ndida n̄kọk udọn̄ọ.+
18 Ndien, sese! mme owo ẹbiom ọdọn̄ọ akpauben̄ kiet ke n̄kpana ẹdi, mmọ ẹnyụn̄ ẹyom usụn̄ ndida enye ndụk ndinịm ke iso esie.+
19 Ntre, sia mîkwe usụn̄ nte ẹdade enye ẹdụk ẹdi ke ntak otuowo, mmọ ẹdọk ọkọm, ẹnyụn̄ ẹto ke odudu ọkọm ẹsụhọde enye ke ekpri n̄kpana ẹnịm ke ufọt mbon oro ẹdude ke iso Jesus.+
20 Ndien ke ini enye okụtde mbuọtidem mmọ, enye ọdọhọ ete: “Ete, ẹmefen mme idiọkn̄kpọ fo.”+
21 Mmọdo mme scribe* ye mme Pharisee ẹtọn̄ọ ndikere, ẹte: “Owo emi edi anie eke osụn̄ide Abasi?+ Anie ekeme ndifen idiọkn̄kpọ ke mîbọhọke Abasi ikpọn̄-ikpọn̄?”+
22 Edi Jesus ọfiọk se mmọ ẹkerede, onyụn̄ ọbọrọ mmọ ete: “Nso ke mbufo ẹkere ke esịt mbufo?+
23 Ewe emem akan, ndi ndidọhọ, ‘Ẹmefen mme idiọkn̄kpọ fo,’ m̀mê ndidọhọ, ‘Daha ke enyọn̄ san̄a’?+
24 Edi man mbufo ẹfiọk ẹte ke Eyen owo enyene odudu ke isọn̄ ndifen mme idiọkn̄kpọ—” enye ọdọhọ owo akpauben̄ oro ete: “Ndọhọ fi nte, Daha ke enyọn̄ men ekpri n̄kpana fo nyọn̄ ufọk.”+
25 Ndien kpa idaha oro enye adaha ke enyọn̄ ke iso mmọ, emen se enye ekesinade ke esịt ọnyọn̄ ufọk esie onyụn̄ ọnọ Abasi ubọn̄.+
26 Edi idem akpa+ kpukpru owo, mmọ ẹnyụn̄ ẹtọn̄ọ ndinọ Abasi ubọn̄, ndịk onyụn̄ anam mmọ etieti, ndien mmọ ẹdọhọ ẹte: “Nnyịn imokụt mme esen esen n̄kpọ mfịn!”+
27 Ekem ke mme n̄kpọ emi ẹma ẹkebe enye ọwọrọ okokụt ọbọ a-tax kiet emi ekerede Levi nte etiede ke itie ubọ tax, ndien enye ọdọhọ enye ete: “Tiene mi.”+
28 Ndien enye ọkpọn̄ kpukpru n̄kpọ+ adaha etiene enye.
29 N̄ko, Levi oro anam akamba usọrọ ke ufọk esie ọnọ enye; akwa otu mme ọbọ a-tax ye mbon en̄wen ẹnyụn̄ ẹditie ke itie udia ye mmọ.+
30 Ndien mme Pharisee ye mme scribe ẹtọn̄ọ ndikụni mban̄a enye nnọ mme mbet esie, ẹte: “Ntak emi mbufo ẹdiade ẹnyụn̄ ẹn̄wọn̄de n̄kpọ ye mme ọbọ a-tax ye mme anamidiọk?”+
31 Jesus ọdọhọ mmọ ete: “Mbon emi idem ọsọn̄de isiyomke abiausọbọ,+ edi mbon emi idem mîsọn̄ke ẹsiyom.+
32 N̄kedịghe ndikot ndinen owo, edi n̄kedi ndikot mme anamidiọk nte ẹkabade esịt.”+
33 Mmọ ẹdọhọ enye ẹte: “Mme mbet John ẹwak nditre udia ẹnyụn̄ ẹnam n̄kpeubọk, kpasụk ntre n̄ko ye mbet mme Pharisee, edi okwo ẹdia ẹnyụn̄ ẹn̄wọn̄ n̄kpọ.”+
34 Jesus ọdọhọ mmọ ete: “Nte mbufo ẹmekeme ndinam mme ufan ebendọ ẹtie utreudia ke adan̄aemi ebendọ odude ye mmọ?+
35 Edi mme usen ẹyedi eke ẹdibọde+ mmọ ebendọ;+ adan̄aoro mmọ ẹyetie utreudia ke mme usen oro.”+
36 N̄ko, enye ọnọ mmọ uwụtn̄kpọ kiet ete: “Baba owo kiet isịbeke ubak obufa ọfọn̄ ikịm idian ke akani ewụra; edi edieke enye ekịmde adian, enye awak obufa ọfọn̄, ndien ubak obufa ọfọn̄ isan̄ake ukem ye akani oro.+
37 Akan oro, baba owo kiet isịnke obufa wine ke n̄kani ikpa wine; edi edieke enye esịnde, obufa wine ayasiak ikpa wine+ oro, wine onyụn̄ ọduọhọ, ikpa wine oro ẹyenyụn̄ ẹtak.+
38 Edi ẹnyene ndisịn obufa wine ke mbufa ikpa wine.
39 Baba owo kiet emi ọn̄wọn̄de akani wine iyomke obufa; koro enye ọdọhọde ete, ‘Akani+ oro ọfọn.’”
Mme Ikọ Idakisọn̄
^ “N̄kpọdiọhọ Mmọn̄ Gennesaret” edi enyịn̄ efen emi ẹkotde Inyan̄ Galilee.
^ Ke akpa, emi akaban̄a mme andision̄o N̄wed Abasi n̄wet, edi ke eyo Jesus, emi akaban̄a mbon oro ẹfiọkde Ibet ẹnyụn̄ ẹdide mme andikpep Ibet.
