Mark 15;1-47
15 Ndien ke ndondo oro eyo esierede ikpọ oku ye mbiowo ye mme scribe,* oro edi, ofụri Sanhedrin, ẹdụk ediomi,+ mmọ ẹnyụn̄ ẹbọp Jesus ẹda ẹdaha ẹkeyak ẹnọ Pilate.+
2 Ntre Pilate obụp enye ete: “Nte afo edi edidem+ mme Jew?” Enye ọbọrọ ete: “Afo ke idemfo ọdọhọ.”+
3 Edi mbọn̄ oku ẹdori enye ikọ ke ediwak n̄kpọ.+
4 Ekem Pilate ọtọn̄ọ ntak obụp enye, ete: “Nte afo unyeneke ibọrọ ndinọ?+ Sese adan̄a ediwak edori ikọ emi mmọ ẹdoride fi.”+
5 Edi Jesus ibọrọke aba baba n̄kpọ kiet, esịn idem akpa Pilate.+
6 Edi, ke kpukpru usọrọ enye esisana owo-n̄kpọkọbi kiet, eke mmọ ẹben̄ede, ayak ọnọ mmọ.+
7 Ini oro, ama odu owo emi ẹkotde Barabbas emi odude ke n̄kpọkọbi ye mme esịn ndutịme, emi ẹkewotde owo ke ndutịme mmọ.+
8 Ntre otuowo ẹdọk ẹdi ẹnyụn̄ ẹtọn̄ọ ndiben̄e nte ekemde ye se Pilate esinamde ọnọ mmọ.
9 Pilate ọbọrọ mmọ, ete: “Nte mbufo ẹmeyom mi nsana edidem mme Jew nyak nnọ mbufo?”+
10 Koro enye ama ọfiọk ete ke mbọn̄ oku ẹkeyak enye ẹnọ imọ+ ke ntak isịnenyịn.+
11 Edi mbọn̄ oku ẹdemede otuowo ẹte ẹben̄e enye asana Barabbas ayak ọnọ mmimọ utu ke Jesus.+
12 Pilate ọtọn̄ọ ntak ọbọrọ mmọ ete: “Nso, ndien, ke ndinam ye enye emi mbufo ẹkotde edidem+ mme Jew?”+
13 Mmọ ẹtọn̄ọ ntak ẹfiori ẹte: “Kọn̄ enye ke eto!”+
14 Edi Pilate ọdọhọ mmọ ete: “Ntak-a, nso idiọkn̄kpọ ke enye akanam?” Edi mmọ ẹdọdiọn̄ ẹfiori ẹte: “Kọn̄ enye ke eto!”+
15 Mmọdo Pilate, sia oyomde ndinem otuowo esịt,+ asana Barabbas ayak ọnọ mmọ, ndien, ke ama akamia Jesus, ayak enye ọnọ ete ẹda ẹkekọn̄ ke eto.+
16 Mbonekọn̄ ndien ẹda enye ẹwọn̄ọde ẹdụk esịt okụre, oro edi, ẹda ẹdụk ufọk ubọn̄ andikara; ndien mmọ ẹkot ofụri udịmekọn̄ ẹbon ọtọkiet,+
17 mmọ ẹnyụn̄ ẹsịne enye ewụra uduot mmọn̄ibọn̄ ẹnyụn̄ ẹdọk anyanya n̄kukịm ẹyara enye.+
18 Ndien mmọ ẹtọn̄ọ ndikọm enye ẹte: “Imọkọm-o,+ Edidem mme Jew!”
19 N̄ko, mmọ ẹda nnyanyan̄a ẹyịbi enye ke ibuot ẹnyụn̄ ẹfiari enye etap, ndien mmọ ẹtọn̄ọ edọn̄ ẹnyụn̄ ẹnụhọ ẹnọ enye.+
20 Ke akpatre, ke mmọ ẹma ẹkesak enye nsahi ẹma, mmọ ẹsio enye ewụra uduot mmọn̄ibọn̄ oro ẹnyụn̄ ẹsịne enye ewụra esie. Ndien mmọ ẹda enye ẹwọrọ ẹka ndikọn̄ ke eto.+
21 N̄ko, mmọ ẹnyịk owo kiet emi asan̄ade ebe ẹsịn ke utom, kpa Simon owo Cyrene, ete Alexander ye Rufus, emi otode obio-in̄wan̄ edi, ẹte enye obiom eto ndutụhọ esie.+
22 Ntre mmọ ẹda enye ẹdi ebiet Golʹgo·tha, emi ọwọrọde Ebiet N̄kpọkpọrọ.+
23 Ekem mmọ ẹdomo ndinọ enye wine emi ẹbuakde ọkpọsọn̄ ibọk myrrh,+ edi enye inyịmeke ndibọ.+
24 Ndien mmọ ẹkọn̄ enye ke eto ẹnyụn̄ ẹdeme ewụra+ esie ebe ke ndisịn afia mban̄a mmọ man ẹfiọk se mmọ kiet kiet ẹkpedade.+
25 Ekedi ọyọhọ hour ita,*+ ndien mmọ ẹkọn̄ enye ke eto.
26 Ndien ẹwet ikọ emi ẹdoride+ enye ẹdian ke enyọn̄ ibuot esie, “Edidem mme Jew.”+
27 Akan oro, mmọ ẹkọn̄ mbon n̄wo iba ke eto ye enye, kiet ke nnasia, kiet ke ufien.+
28 * ——
29 Ndien mbon oro ẹsan̄ade ẹbe ẹsụn̄i enye,+ ẹfụn̄ ibuot ẹnyụn̄ ẹdọhọ ẹte: “Ha! Afo emi okpowụride temple, onyụn̄ ọbọpde enye ke usen ita,+
30 nyan̄a idemfo ke ndisụhọde ke eto ndutụhọ.”+
31 Kpasụk ntre n̄ko mbọn̄ oku ye mme scribe ẹsak enye nsahi ke otu idemmọ ẹnyụn̄ ẹdọhọ ẹte: “Enye akanyan̄a mmọ en̄wen; edi ikemeke ndinyan̄a idemesie!+
32 Yak Christ Edidem Israel osụhọde ke eto ndutụhọ idahaemi, man nnyịn ikụt inyụn̄ inịm ke akpanikọ.”+ Idem mmọ oro ẹkekọn̄de ye enye ke eto ẹnyụn̄ ẹsụn̄i enye.+
33 Ke ini esịmde ọyọhọ hour itiokiet* ekịm ofụk ofụri isọn̄ tutu esịm ọyọhọ hour usụkkiet.*+
34 Ndien ke ọyọhọ hour usụkkiet Jesus ofiori ke ọkpọsọn̄ uyo ete: “Eʹli, Eʹli, laʹma sa·bach·thaʹni?” emi ọwọrọde: “Abasi mi, Abasi mi, ntak emi afo ọkpọn̄de mi?”+
35 Ndien ke ini ndusụk mbon emi ẹdade ẹkpere ẹkopde, mmọ ẹdọhọ ẹte: “Sese! Enye ke okot Elijah.”+
36 Edi owo kiet efehe ekedebi ndọbọ ke n̄kpakpai wine, owụk ke nnyanyan̄a anyan ọnọ enye ete ọn̄wọn̄,+ ọdọhọde ete: “Yak etie ntre ye enye! Yak ise m̀mê Elijah eyedi edikọn̄ọde enye.”+
37 Edi Jesus ofiori n̄kpo onyụn̄ ọduọk akpatre ibifịk.+
38 Ndien ikpehe+ edisana ebiet asiaha iba ọtọn̄ọde ke enyọn̄ tutu esịm isọn̄.+
39 Ekem, ke ini akwa owoekọn̄ oro akadade ekpere asak iso ese enye okụtde nte enye ọduọkde akpatre ibifịk ke utọ idaha eke etiede ntem, enye ọdọhọ ete: “Ke akpanikọ owo emi ekedi Eyen Abasi.”+
40 Iban n̄ko ẹma ẹdu do emi ẹkedade nsannsan ẹse,+ ndusụk ke otu mmọ ẹkedi Mary Magdalene ọkọrọ ye Mary eka Ekpri James ye Joses, ye Salome,+
41 emi ẹkesisan̄ade ye enye+ ẹsan̄a utom ẹnọ enye ke ini enye okodude ke Galilee ye ediwak iban en̄wen emi ẹkesan̄ade ye enye ẹdọk ẹdi Jerusalem.+
42 Ekem ke esịmde utịt utịt uwemeyo, sia onyụn̄ edide usen Mben̄eidem, oro edi, usen emi ebemde sabbath iso,
43 Joseph owo Arimathea edi, kpa owo Akwa Esop eke ẹtịmde ẹkpono, emi n̄ko eketiede ebet obio ubọn̄ Abasi.+ Enye ada uko odụk ebịne Pilate ekeben̄e okpo+ Jesus.
44 Edi Pilate eyịk m̀mê enye akam akpakpa, ndien enye okot akwa owoekọn̄ edi, onyụn̄ obụp m̀mê enye ama akpa.
45 Ntre ke ama okokop oto akwa owoekọn̄ ete ke enye akpa, enye ayak okpo ọnọ Joseph.+
46 Ndien enye edep eti linen onyụn̄ ọkọn̄ọde enye, ada eti linen oro awan̄ enye onyụn̄ enịm enye+ ke udi+ emi ẹketụn̄de ke akamba itiat; ndien enye akpat itiat eberi ke inua udi.+
47 Edi Mary Magdalene ye Mary eka Joses ẹka iso ẹse ebiet emi ẹkenịmde enye.+
Mme Ikọ Idakisọn̄
^ “Ọyọhọ hour ita,” oro edi, n̄kpọ nte n̄kanika usụkkiet usenubọk.
^ “Ọyọhọ hour itiokiet,” oro edi, n̄kpọ nte n̄kanika duopeba uwemeyo.
^ “Ọyọhọ hour usụkkiet,” oro edi, n̄kpọ nte n̄kanika ita uwemeyo.
