Mark 8;1-38
8 Ke mme usen oro, ke ini akwa otuowo ẹtọn̄ọde ntak ẹbono mînyụn̄ inyeneke se ẹdiade, enye okot mme mbet onyụn̄ ọdọhọ mmọ ete:+
2 “Mbọm+ otuowo emi anam mi, koro usen ita ẹdi emi nte mmọ ẹkedu ye ami mmọ inyụn̄ inyeneke se ẹdiade;
3 ndien edieke nnamde mmọ ẹsan̄a biọn̄ ẹnyọn̄ọ ufọk, idem ẹyemem mmọ ke usụn̄. Ke akpanikọ, ndusụk mmọ ẹto anyan ebiet.”
4 Edi mme mbet esie ẹbọrọ enye ẹte: “Owo edikeme ndida uyo ke m̀mọ̀n̄ ke nsannsan ebiet emi nyụhọ mme owo emi?”+
5 Edi enye obụp mmọ ete: “Mbufo ẹnyene uyo ifan̄?” Mmọ ẹte: “Itiaba.”+
6 Ndien enye ọnọ otuowo uyo ete ẹsụhọde ẹtetie ke isọn̄, onyụn̄ emen uyo itiaba oro, ọnọ ekọm,+ obụn̄ mmọ, onyụn̄ ayak mmọ ọnọ mme mbet esie ete ẹdeme, mmọ ẹnyụn̄ ẹdeme ẹnọ otuowo.+
7 Mmọ n̄ko ẹma ẹnyene n̄kpri iyak ifan̄; ndien, ke ama ọkọdiọn̄ mmọ emi, enye ọdọhọ mmọ ẹdeme mmọ emi n̄ko.+
8 Ndien mmọ ẹdia ẹyụhọ, ẹnyụn̄ ẹtan̄ mben̄e emi ẹyọhọde ẹsụhọ, ẹyọhọ akpasa udọn̄n̄kpọ itiaba.+
9 Edi mmọ ẹkedi n̄kpọ nte owo tọsịn inan̄. Ke akpatre enye anam mmọ ẹnyọn̄ọ.+
10 Ndien kpa idaha oro enye ediere ke ubom ye mme mbet esie onyụn̄ edisịm mme ikpehe n̄kan̄ Dalmanutha.+
11 Ekem mme Pharisee ẹwọn̄ọ ẹdi ẹnyụn̄ ẹtọn̄ọ ndineni eneni ye enye, ẹyom enye ọnọ idiọn̄ọ eke otode enyọn̄, man ẹdomo enye ẹse.+
12 Ntre enye omụm mmụm ọkpọsọn̄+ ke spirit, onyụn̄ ọdọhọ ete: “Ntak emi emana emi ẹyomde idiọn̄ọ? Ke akpanikọ ke ndọhọ, Owo idinọhọ emana emi idiọn̄ọ ndomokiet.”+
13 Ndien enye ọkpọn̄ mmọ, ọtọn̄ọ ntak ediere ke ubom, onyụn̄ adaha aka edem inyan̄ eken.
14 Edi, mmọ ẹma ẹfre ndida uyo, ndien mmọ inyeneke n̄kpọ baba kiet ke ubom ke mîbọhọke uyo kiet.+
15 Ndien enye ọdọhọ mmọ in̄wan̄-in̄wan̄ ete: “Ẹtịn̄ enyịn ẹkpeme mbak leaven mme Pharisee ye leaven Herod.”+
16 Ntre mmọ ẹneni ye kiet eken ẹban̄a nte mmọ mînyeneke uyo.+
17 Ke ini enye ọfiọkde emi, enye obụp mmọ ete: “Ntak emi mbufo ẹnenide ẹban̄a nte mbufo mînyeneke uyo?+ Nte mbufo ikwe kan̄a inyụn̄ ifiọkke se emi ọwọrọde? Nte esịt osụk ododobi mbufo ndifiọk n̄kpọ?+
18 ‘Nte mbufo ẹnyenyene enyịn, edi ikwe usụn̄; ẹnyụn̄ ẹnyenyene utọn̄, edi ikopke ikọ?’+ Ndien nte mbufo itịghi,
19 ke ini n̄kobụn̄de uyo ition+ nnọ owo tọsịn ition, mbufo ẹketan̄ mben̄e ẹyọhọ akpasa ifan̄?” Mmọ ẹte enye: “Duopeba.”+
20 “Ke ini n̄kobụn̄de uyo itiaba nnọ owo tọsịn inan̄, mbufo ẹketan̄ mben̄e ẹyọhọ akpasa udọn̄n̄kpọ ifan̄?” Mmọ ẹnyụn̄ ẹdọhọ enye ẹte: “Itiaba.”+
21 Ndien enye ọdọhọ mmọ ete: “Nte mbufo isụk ifiọkke se emi ọwọrọde?”+
22 Ekem mmọ ẹdisịm Bethsaida. Ndien mme owo ẹda nnan ẹsọk enye, ẹnyụn̄ ẹkpe enye ubọk ẹte otụk+ enye.
23 Ndien enye omụm nnan oro ke ubọk, ada enye ọwọrọ ke obio-in̄wan̄, ndien, ke enye ama akafiari etap+ esịn enye ke enyịn, enye odori enye ubọk onyụn̄ obụp enye ete: “Nte omokụt n̄kpọ ndomokiet?”
24 Ndien owo oro emenede enyịn ese onyụn̄ ọdọhọ ete: “Mmokụt mme owo, koro n̄kụt se itiede nte mme eto, edi mmọ ẹsasan̄a.”
25 Ekem enye ọtọn̄ọ ntak ada ubọk esie otụk owo oro enyịn, ndien owo oro okụt n̄kpọ in̄wan̄-in̄wan̄, enyịn esie ẹnyụn̄ ẹkabade ẹfọn, enye onyụn̄ enen̄ede okụt kpukpru n̄kpọ.
26 Ntre enye ọnọ enye ọnyọn̄ ufọk, ọdọhọde ete: “Edi kûdụk obio-in̄wan̄.”+
27 Ekem Jesus ye mme mbet esie ẹkpọn̄ ẹka mme obio-in̄wan̄ Caesarea Philippi, ndien ke usụn̄ enye obụp mme mbet esie, ete: “Mme owo ẹdọhọ ke ami ndi anie?”+
28 Mmọ ẹdọhọ enye ẹte: “John Andinịm Owo Baptism,+ ndien mmọ efen ẹte, Elijah,+ edi mmọ efen n̄ko ẹte, Kiet ke otu mme prọfet.”+
29 Ndien enye obụp mmọ mbụme emi ete: “Edi mbufo ẹdọhọ ke ami ndi anie?” Peter ọbọrọ enye ete: “Afo edi Christ.”+
30 Ndien enye ọsọn̄ọ owụk mmọ ete ẹkûtịn̄ n̄kpọ ẹban̄a imọ ẹnọ owo ndomokiet.+
31 N̄ko, enye ọtọn̄ọ ndikpep mmọ ete ke Eyen owo enyene ndikụt ediwak ndutụhọ ndien mbiowo ye mbọn̄ oku ye mme scribe* ẹyesịn enye ẹnyụn̄ ẹwot enye,+ ndien enye eyeset usen ita ke ukperedem.+
32 Ke akpanikọ, enye eketịn̄ ikọ oro ye uko. Edi Peter ada enye esịk ada onyụn̄ ọtọn̄ọ ndisua nnọ enye.+
33 Enye ọwọn̄ọde ese mme mbet esie onyụn̄ asua ọnọ Peter, ete: “Da mi ke edem, Satan, koro afo ukereke ekikere Abasi, edi ekere eke owo.”+
34 Ekem enye okot otuowo ye mme mbet esie ẹtiene enye onyụn̄ ọdọhọ mmọ ete: “Edieke owo ekededi oyomde nditiene mi, yak enye akan̄ idemesie onyụn̄ emen eto ndutụhọ esie aka iso etiene mi.+
35 Koro owo ekededi eke oyomde ndinyan̄a ukpọn̄ esie ọyọduọk enye; edi owo ekededi eke ọduọkde ukpọn̄ esie ke ntak mi ye eti mbụk ayanyan̄a enye.+
36 Nso udori ke owo edidia edieke enye enyenede ofụri ererimbot ndien ataba ukpọn̄ esie?+
37 Nso ke owo edinọ ke ibuot ukpọn̄ esie?+
38 Koro owo ekededi eke okopde bụt aban̄a mi ye ikọ mi ke idiọk emana efịbe emi, Eyen owo oyokop bụt+ n̄ko aban̄a enye ke ini enye edidide ke ubọn̄ Ete esie, asan̄a ye ndisana angel.”+
