Matthew 17;1-27
17 Usen itiokiet ke ukperedem, Jesus ada Peter ye James ye John eyeneka esie ọdọk edikon̄ obot sụk mmọ ikpọn̄.+
2 Ndien mbiet esie okpụhọde ke iso mmọ, iso esie onyụn̄ ayama nte utịn,+ ewụra esie onyụn̄ akabade ayama nte un̄wana.+
3 Ndien, sese! Moses ye Elijah ẹbiọn̄ọde mmọ ke iso, ẹneme nneme ye enye.+
4 Peter ọdọhọ Jesus ete: “Ọbọn̄, ọfọn nnyịn ndidu mi. Edieke afo oyomde, nyowụk tent ita mi, kiet enyene fi, kiet enyene Moses, kiet onyụn̄ enyene Elijah.”+
5 Ke adan̄aemi enye osụk etịn̄de ikọ, sese! un̄wana ofụk mmọ, ndien sese! uyo ọwọrọ ke un̄wana oro, ete: “Emi edi edima Eyen mi, emi ami nnyịmede;+ ẹkpan̄ utọn̄ ẹnọ enye.”+
6 Ke ini mme mbet ẹkopde emi, mmọ ẹduọn̄ọ ẹkịbi iso mmọ ke isọn̄, ndịk onyụn̄ anam mmọ etieti.+
7 Ekem Jesus asan̄a ekpere, onyụn̄ otụk mmọ, ete: “Ẹdaha ke enyọn̄, ẹkûnyụn̄ ẹfehe ndịk.”+
8 Ke ini mmọ ẹmenerede enyịn, mmọ ikwe owo ndomokiet ibọhọke Jesus ikpọn̄.+
9 Ndien nte mmọ ẹtode ke obot oro ẹsụhọde, Jesus owụk mmọ, ete: “Ẹkûtịn̄ n̄kukụt emi ẹnọ owo ndomokiet tutu Eyen owo eset ke n̄kpa.”+
10 Edi, mme mbet ẹbụp enye mbụme emi ẹte: “Ntak, ndien, mme scribe* ẹdọhọde ẹte ke ana Elijah ebem iso edi?”+
11 Enye ọbọrọ ete: “Elijah, ke akpanikọ, ọmọn̄ edi ndien enye ọyọdiọn̄ kpukpru n̄kpọ.+
12 Edi, ndọhọ mbufo nte Elijah ama ededi ndien mmọ ikọfiọkke enye edi ẹnam enye se mmọ ẹmade. Kpasụk ntre n̄ko ẹnịm ẹnọ Eyen owo ndikụt ukụt ke ubọk mmọ.”+
13 Do ke mme mbet ẹfiọk ẹte enye etịn̄ ye mmimọ aban̄a John Andinịm Owo Baptism.+
14 Ndien ke ini mmọ ẹdide ẹdisịm otuowo,+ owo kiet asan̄a ekpere enye, ọtọn̄ọ edọn̄ ọnọ enye onyụn̄ ọdọhọ ete:
15 “Ọbọn̄, tua eyen mi mbọm, koro enye edide owo ndisi onyụn̄ ọdọdọn̄ọ, enye esiduọ ediwak ini odụk ikan̄ onyụn̄ ọduọ ediwak ini odụk mmọn̄;+
16 n̄konyụn̄ nda enye nsọk mbet fo, edi mmọ ikemeke ndikọk enye udọn̄ọ.”+
17 Jesus ọbọrọ ete: “O emana unana mbuọtidem ye eke ukwan̄ido,+ adan̄a didie ke ndika iso ye mbufo? Adan̄a didie ke ndiyọ mbufo? Ẹda enye ẹsọk mi mi.”
18 Ndien Jesus aduari enye, demon oro onyụn̄ ọwọrọ enye ke idem;+ udọn̄ọ onyụn̄ okụre eyen oro kpa ke hour oro.+
19 Ekem mme mbet ẹdi ẹbịne Jesus ke ndịbe ẹdibụp enye ẹte: “Ntak emi nnyịn mîkekemeke ndibịn enye nduọk?”+
20 Enye ọdọhọ mmọ ete: “Ke ntak ekpri mbuọtidem mbufo. Koro ke akpanikọ ke ndọhọ mbufo nte, Edieke mbufo ẹnyenede mbuọtidem eke ekpride nte n̄kpasịp mustard, mbufo ẹyedọhọ obot emi ẹte, ‘Wụhọde mi kowụhọ ko,’ ndien enye oyowụhọde, n̄kpọ ndomokiet idinyụn̄ isọn̄ke ikan mbufo.”+
21 * ——
22 Ekedi ke adan̄aemi mmọ ẹsopde idem ọtọkiet ke Galilee ke Jesus ọkọdọhọ mmọ ete: “Ẹmenịm ẹte ẹda Eyen owo ẹsịn mme owo ke ubọk,+
23 ndien mmọ ẹyewot enye, enye oyonyụn̄ eset ke ọyọhọ usen ita.”+ Ntem mmọ ẹfụhọ etieti.+
24 Ke mmọ ẹma ẹkesịm Capernaum, mme ọbọ a-tax drachma iba ẹka ẹbịne Peter ẹkebụp ẹte: “Nte andikpep mbufo esikpe tax drachma iba?”+
25 Enye ọdọhọ ete: “Ih.” Nte ededi, ke ini enye odụkde ufọk, Jesus ebem enye iso obụp ete: “Simon, afo ekere didie? Mmanie ke ndidem isọn̄ ẹsibọ utomo m̀mê tax? Nte ẹsibọ nditọ mmọ m̀mê ẹsibọ isenowo?”
26 Ke ini enye ọbọrọde ete: “Ẹsibọ isenowo,” Jesus ọdọhọ enye ete: “Ke akpanikọ, ndien, nditọ inyeneke ndikpe tax.
27 Edi mbak nnyịn idinam mmọ ẹtuak ukot ẹduọn̄ọ,+ ka inyan̄ kesịn uwam nyụn̄ da akpa iyak eke edimụmde, ndien ke okụbọrede enye inua, afo oyokụt okụk stater. Da nọ mmọ ke okịm ye okwo.”+
Mme Ikọ Idakisọn̄
^ Ufan̄ikọ emi odu ke ndusụk edikabade Bible, edi enye idụhe ke uwetn̄kpọ usem Greek eke Westcott ye Hort, emi ekemde ye ata ediwak uwetn̄kpọ usem Greek eset.
