Matthew 20;1-34
20 “Koro obio ubọn̄ heaven ebiet enyeneufọk emi ọwọrọde ke tụhi-tụhi usenubọk aka ndikpe mbonutom ndọn̄ ke in̄wan̄ vine esie.+
2 Ke enye ama ekenyịme ndikpe mbonutom oro denarius kiet ke usen,+ enye osio mmọ ọdọn̄ ẹka in̄wan̄ vine esie.
3 Ke ini enye afiakde ọwọrọ ke n̄kpọ nte ọyọhọ hour ita,*+ enye okụt mmọ en̄wen nte ẹdade ke an̄waurua inyụn̄ inyeneke utom;+
4 ndien enye ọdọhọ mmọ ete, ‘Mbufo n̄ko, ẹdụk in̄wan̄ vine, ndien nyọnọ mbufo se ededi oro enende.’
5 Ntre mmọ ẹdaha ẹka. Enye afiak ọwọrọ aka ke n̄kpọ nte ọyọhọ hour itiokiet*+ ye ọyọhọ hour usụkkiet*+ onyụn̄ anam kpasụk ntre.
6 Ke akpatre, enye ọwọrọ ke n̄kpọ nte ọyọhọ hour duopekiet* onyụn̄ okokụt mmọ efen nte ẹdade, enye onyụn̄ obụp mmọ ete, ‘Ntak emi mbufo ẹdade mi ofụri usen inyeneke utom?’
7 Mmọ ẹdọhọ enye ẹte, ‘Koro baba owo kiet ikpehe nnyịn utom.’ Enye ọdọhọ mmọ ete, ‘Mbufo n̄ko ẹdụk in̄wan̄ vine.’+
8 “Ke ini esịmde mbubreyo,+ enyene in̄wan̄ vine ọdọhọ esenyịn utom ete, ‘Kot mbonutom ẹdi nyụn̄ kpe mmọ okụkutom+ mmọ, ọtọn̄ọde ke akpatre tutu esịm akpa.’
9 Ke ini mbon ọyọhọ hour duopekiet* ẹdide, mmọ kiet kiet ẹbọ denarius kiet.
10 Ntre, ke ini mmọ emi ẹkedide akpa ẹdide, mmọ ẹkere ẹte mmimọ iyọbọ ikan oro; edi mmọ n̄ko ẹbọ denarius kiet.
11 Ke ini mmọ ẹbọde, mmọ ẹtọn̄ọ ndisụk enyeneufọk uyo+
12 ẹnyụn̄ ẹdọhọ ẹte, ‘Mmọ emi ẹkedide akpatre ẹkesịn hour kiet ke utom; edi afo amanam mmọ ẹdi ukem ye nnyịn emi ikobiomde ọkpọsọn̄ mfịghe usen inyụn̄ ifọbọde eyo!’
13 Edi enye ọbọrọ owo kiet ke otu mmọ ete, ‘Ufan, nnamke fi idiọk ndomokiet. Nte ami ye afo ikebiereke denarius kiet?+
14 Bọ se idide okwo nyọn̄. Nyom ndinọ akpatre owo emi ukem nte nnọde fi.+
15 Nte nnyeneke unen ndida mme n̄kpọ mi nnam se mmade? M̀mê nte enyịn fo akabade ọdiọk+ koro ami mfọnde?’+
16 Ntem ke mme akpatre ẹdidi akpa, mme akpa ẹnyụn̄ ẹdi akpatre.”+
17 Edi ke ini Jesus oyomde ndidọk n̄ka Jerusalem, enye ada mbet duopeba+ adaha ke ndịbe onyụn̄ ọdọhọ mmọ ke usụn̄ ete:
18 “Sese! Nnyịn imọn̄ idọk ika Jerusalem, ndien ẹyeyak Eyen owo ẹnọ mbọn̄ oku ye mme scribe,* ndien mmọ ẹyebiom enye ikpe n̄kpa,+
19 ẹnyụn̄ ẹyak enye ẹnọ mbon idụt ndisak enye nsahi nnyụn̄ mmia enye nnyụn̄ n̄kọn̄ enye ke eto,+ ndien enye eyeset ke ọyọhọ usen ita.”+
20 Ekem eka nditọ Zebedee+ asan̄a ye nditọiren esie edi ebịne enye, edinụhọ ọnọ enye onyụn̄ eben̄e enye n̄kpọ.+
21 Enye obụp n̄wan oro ete: “Nso ke afo oyom? N̄wan oro ọbọrọ enye ete: “Nọ uyo man nditọiren mi iba emi ẹkpetie, kiet ke ubọk nnasia fo, kiet ke ufien, ke obio ubọn̄ fo.”+
22 Jesus ọbọrọ ete: “Mbufo ifiọkke se mbufo ẹben̄ede. Nte mbufo ẹmekeme ndin̄wọn̄ cup+ emi ami nyomde ndin̄wọn̄?” Mmọ ẹdọhọ enye ẹte: “Nnyịn imekeme.”
23 Enye ọdọhọ mmọ ete: “Ke akpanikọ, Mbufo ẹyen̄wọn̄ cup+ mi, edi editie ke nnasia mi ye ke ufien mi inyeneke mi ndinọ, edi enyene mbon emi Ete mi eketịmde oro ọnọ.”+
24 Ke ini mbet duop eken ẹkopde emi, esịt ofụt mmọ aban̄a nditọeka iba emi.+
25 Edi Jesus okot mmọ ẹdi onyụn̄ ọdọhọ mmọ ete: “Mbufo ẹmefiọk ẹte mme andikara mme idụt ẹkara mmọ ke ọkpọsọn̄ ubọk, ikpọ owo ẹnyụn̄ ẹnyene odudu ke idem mmọ.+
26 Inyeneke ndidi ntem ke otu mbufo;+ edi owo ekededi eke oyomde ndidi akwa owo ke otu mbufo edidi asan̄autom mbufo,+
27 owo ekededi eke onyụn̄ oyomde ndidi akpa ke otu mbufo edidi ofụn mbufo.+
28 Kpa nte Eyen owo mîkedịghe man ẹnam n̄kpọ ẹnọ enye, edi man enye anam n̄kpọ ọnọ owo+ onyụn̄ ọnọ ukpọn̄ esie nte ufak ke ibuot ediwak owo.”+
29 Ndien nte mmọ ẹwọrọde ke Jericho+ akwa otuowo ẹtiene enye.
30 Ndien, sese! nnan iba ẹtie ke mbenusụn̄, ke ini mmọ ẹkopde ẹte Jesus ke asan̄a ebe, mmọ ẹfiori, ẹte: “Ọbọn̄, tua nnyịn mbọm, Eyen David!”+
31 Edi otuowo ẹsọn̄ọ ẹdọhọ mmọ ẹte ẹdop uyo; edi mmọ ẹdọdiọn̄ ẹfiori, ẹte: “Ọbọn̄, tua nnyịn mbọm, Eyen David!”+
32 Ntre Jesus atuak ada, okot mmọ onyụn̄ obụp mmọ ete: “Ẹyom nnam nso nnọ mbufo?”
33 Mmọ ẹbọrọ enye ẹte: “Ọbọn̄, tat nnyịn enyịn.”+
34 Mbọm mmọ anam Jesus, ndien enye otụk mmọ enyịn,+ ndien ke ndondo oro mmọ ẹkụt usụn̄, ẹnyụn̄ ẹtiene enye.+
Mme Ikọ Idakisọn̄
^ “Ọyọhọ hour ita,” oro edi, n̄kpọ nte n̄kanika usụkkiet usenubọk.
^ “Ọyọhọ hour itiokiet,” oro edi, n̄kpọ nte n̄kanika duopeba uwemeyo.
^ “Ọyọhọ hour usụkkiet,” oro edi, n̄kpọ nte n̄kanika ita uwemeyo.
^ “Ọyọhọ hour duopekiet,” oro edi, n̄kpọ nte n̄kanika ition mbubreyo.
^ Se ik. id. uf. 6.
