Matthew 25;1-46
25 “Adan̄aoro ẹyemen obio ubọn̄ heaven ẹdomo ye nditọiban* duop emi ẹkemende utuenikan̄+ mmọ ẹwọrọ ẹka ndikosobo ye ebendọ.+
2 Ition ke otu mmọ ẹkedi ndisịme,+ ition ẹdi mme enyene-ọniọn̄.+
3 Koro mme ndisịme ẹmen utuenikan̄ mmọ edi idaha aran ikọrọ do,
4 edi mme enyene-ọniọn̄ ẹkama aran ke okpon̄ mmọ ye ke utuenikan̄ mmọ.
5 Ke adan̄aemi ebendọ ebịghide ndidi, kpukpru mmọ ẹyet idap ẹnyụn̄ ẹde.+
6 Ke ufọt okoneyo, ẹfiori ẹte,+ ‘Sese ebendọ mi! Ẹwọrọ ẹdisobo ye enye.’
7 Ndien kpukpru nditọiban oro ẹdaha ẹda ẹnyụn̄ ẹtịm utuenikan̄+ mmọ.
8 Mme ndisịme ẹdọhọ mme enyene-ọniọn̄ ẹte, ‘Ẹnọ nnyịn ndusụk aran+ mbufo, koro utuenikan̄ nnyịn ẹmọn̄ ẹnịme.’
9 Mme enyene-ọniọn̄+ ẹbọrọ ẹte, ‘Eyedi idiwakke ikem nnyịn ye mbufo. Utu ke oro, mbufo ẹka ke ọtọ mme anyam aran ẹkedep.’
10 Ke adan̄aemi mmọ ẹwọrọde ẹka ndidep, ebendọ edisịm, ndien nditọiban oro ẹkeben̄ede idem ẹsan̄a ye enye ẹdụk usọrọ ndọ;+ ndien ẹberi usụn̄.
11 Ekem nditọiban eken ẹdi n̄ko ẹdidọhọ ẹte: ‘Ete, ete, berede usụn̄ nọ nnyịn!’+
12 Enye ọbọrọ ete, ‘Ntịn̄ akpanikọ nnọ mbufo, ndiọn̄ọke mbufo.’+
13 “Ẹdu ke ukpeme,+ ndien, koro mbufo mîfiọkke usen m̀mê hour oro.+
14 “Koro etie nte ke ini owo+ oyomde ndika esenidụt,+ okot ifịn esie onyụn̄ ayak inyene esie esịn mmọ ke ubọk.+
15 Ndien enye ọnọ owo kiet talent ition, ọnọ owo efen talent iba, enye eken talent kiet, ọnọ owo kiet kiet nte ukeme esie edide,+ ndien adaha aka esenidụt.
16 Ke ndondo oro owo emi ọkọbọde talent ition adaha esiemmọ onyụn̄ akada mmọ anam mbubehe ndien enyene ition efen.+
17 Kpasụk ntre ke owo emi ọkọbọde iba enyene iba efen.
18 Edi owo emi ọkọbọde kiet kpọt adaha, onyụn̄ eketịbi isọn̄ edịp okụk silver eteufọk esie.
19 “Ke anyan ini ama ekebe+ eteufọk ifịn oro edi edinam ibat ye mmọ.+
20 Ntre owo emi ọkọbọde talent ition ọwọrọ edi onyụn̄ ada talent ition efen edi edidọhọ ete, ‘Eteufọk, afo ọkọnọ mi talent ition; sese, ami mmadian talent ition efen.’+
21 Eteufọk esie ọdọhọ enye ete, ‘Emetịm anam, eti ofụn emi anamde akpanikọ!+ Afo ama anam akpanikọ+ ke se mîwakke. Nyemek fi ese aban̄a ediwak n̄kpọ.+ Tiene usọufọk dat esịt.’+
22 Ekem owo emi ọkọbọde talent iba ọwọrọ edi edidọhọ ete, ‘Eteufọk, afo ọkọnọ mi talent iba; sese, ami mmadian talent iba efen.’+
23 Eteufọk esie ọdọhọ enye ete, ‘Emetịm anam, eti ofụn emi anamde akpanikọ! Afo ama anam akpanikọ ke se mîwakke. Nyemek fi ese aban̄a ediwak n̄kpọ.+ Tiene usọufọk dat esịt.’+
24 “Ke akpatre, owo emi ọkọbọde talent kiet ọwọrọ edi+ edidọhọ ete, ‘Eteufọk, mma ndiọn̄ọ ke afo edi owo nsọn̄ido, ọdọdọk ke ọtọ eke mûkọtọhọ onyụn̄ atatan̄ ke ọtọ eke mûkasakke.
25 Ntre mma n̄kop ndịk+ nnyụn̄ ndaha n̄ka n̄kedịp talent fo ke isọn̄. Se n̄kpọ fo mi.’
26 Eteufọk esie ọbọrọ enye ete, ‘Idiọk ofụn ye ifu, nte afo ama ọfiọk ete ndọdọk ke ọtọ eke mmen̄kọtọhọ nnyụn̄ ntatan̄ ke ọtọ eke mmen̄kasakke?
27 Afo, ndien, ekpekemen okụk silver mi ọnọ mme akama okụk ẹnịm, ndien ke emi ndide ndisịm mi n̄kpọbọ okụk mi ye udori.+
28 “‘Mmọdo ẹbọ enye talent oro ẹnọ enye emi enyenede talent duop.+
29 Koro ẹyedian ẹnọ kpukpru owo eke ẹnyenede, ndien enye eyenyene uwak uwak; edi amaedi owo eke mînyeneke, ẹyebọ enye kpa se enye enyenede.+
30 Ẹnyụn̄ ẹtop ikpîkpu ofụn emi ẹduọk ke an̄wa ke ekịm. Do ke enye editua onyụn̄ ata edet.’+
31 “Ke ini Eyen owo+ edidide ke ubọn̄ esie, kpukpru mme angel ẹnyụn̄ ẹsan̄a ye enye,+ ndien enye oyosụhọde etetie ke ebekpo ubọn̄ esie.+
32 Ndien ẹyebon kpukpru mme idụt ke iso esie,+ enye oyonyụn̄ abahade+ mme owo kiet ye eken,+ kpa nte ekpemerọn̄ abaharede erọn̄ ye ebot.
33 Enye oyonyụn̄ enịm erọn̄ ke ubọk nnasia,+ edi eyenịm ebot ke ufien esie.+
34 “Ekem edidem ọyọdọhọ mbon oro ẹdude ke nnasia ete, ‘Ẹdi, mbufo emi Ete mi ọdiọn̄de,+ ẹda obio ubọn̄ emi ẹketịmde ẹnịm ẹnọ mbufo toto ke editọn̄ọ ererimbot ẹnyene.+
35 Koro biọn̄ ọkọdọn̄de mi ndien mbufo ẹnọ mi udia;+ itọn̄ akasat mi ndien mbufo ẹnọ mi mmọn̄ n̄n̄wọn̄. N̄kedi esenowo ndien mbufo ẹdara mi ke ntatubọk;+
36 n̄kodu iferi,+ ndien mbufo ẹsịne mi ọfọn̄. Nduọ udọn̄ọ ndien mbufo ẹse mi enyịn. N̄kodu ke ufọk-n̄kpọkọbi+ ndien mbufo ẹdi ẹdise mi.’
37 Ndien ndinen owo ẹyebọrọ enye ẹte, ‘Ọbọn̄, ini ewe ke nnyịn ikokụt biọn̄ ọdọn̄de fi ndien inọ fi udia, m̀mê itọn̄ asatde fi,+ ndien inọ fi mmọn̄ ọn̄wọn̄?+
38 Ini ewe ke ikokụt fi edide esenowo, ndien idara fi ke ntatubọk, m̀mê odude iferi, ndien isịne fi ọfọn̄?
39 Ini ewe ke nnyịn ikokụt fi ọdọn̄ọde m̀mê odude ke ufọk-n̄kpọkọbi, ndien idise fi?’
40 Edidem+ oyonyụn̄ ọbọrọ mmọ ete, ‘Ke akpanikọ ke ndọhọ mbufo nte, Adan̄a nte mbufo ẹkenamde n̄kpọ emi ẹnọ kiet ke otu n̄kpri-n̄kan+ nditọete mi+ emi, mbufo ẹkenam ẹnọ mi.’+
41 “Ekem enye ọyọdọhọ mmọ eke ẹdude ke ufien n̄ko, ete, ‘Ẹdian̄ade mi ke idem,+ mbufo emi ẹsụn̄ide, ẹkedụk nsinsi ikan̄+ emi ẹkenịmde ẹnọ Devil ye mme angel esie.+
42 Koro biọn̄ ọkọdọn̄de mi, edi mbufo inọhọ mi udia,+ itọn̄ akasat mi,+ edi mbufo inọhọ mi mmọn̄ n̄n̄wọn̄.
43 N̄kedi esenowo, edi mbufo idarake mi ke ntatubọk; n̄kodu iferi, edi mbufo isịneke mi ọfọn̄;+ nduọ udọn̄ọ nnyụn̄ ndu ke ufọk-n̄kpọkọbi,+ edi mbufo ikesehe mi enyịn.’
44 Ndien mmọ n̄ko ẹyebọrọ ẹte, ‘Ọbọn̄, ini ewe ke nnyịn ikokụt biọn̄ ọdọn̄de fi m̀mê itọn̄ asatde fi m̀mê edide esenowo m̀mê odude iferi m̀mê odude ke ufọk-n̄kpọkọbi ndien nnyịn itre ndisan̄a utom nnọ fi?’
45 Adan̄aoro enye ọyọbọrọ mmọ, ete, ‘Ke akpanikọ ke ndọhọ mbufo nte, Adan̄a nte mbufo mîkanamke n̄kpọ emi inọ kiet ke otu n̄kpri-n̄kan emi,+ mbufo ikanamke+ inọ mi.’+
46 Ndien ẹyesịbe mmọ emi ẹfep ke nsinsi,+ edi ẹyenọ ndinen owo nsinsi uwem.”+
Mme Ikọ Idakisọn̄
^ Ke ikọ Greek, emi aban̄a eyenan̄wan emi mîfiọkke erenowo.
