Matthew 4;1-25
4 Ekem spirit ada Jesus ọdọk aka wilderness+ man Devil okodomo+ enye.
2 Ke enye ama eketre udia uwemeyo aba ye okoneyo aba,+ biọn̄ ọdọn̄ enye.
3 N̄ko, Andidomo+ edi edidọhọ enye ete: “Edieke afo edide eyen Abasi,+ dọhọ mme itiat emi ẹkabade mme ebok uyo.”
4 Edi enye ọbọrọ ete: “Ẹwet ẹte, ‘Idịghe uyo ikpọn̄ ke owo edida odu uwem, edi edida kpukpru ikọ eke ẹwọrọde Jehovah ke inua odu.’”+
5 Ekem Devil ada enye odụk edisana obio,+ onyụn̄ anam enye ada ke enyọn̄ ibibene temple
6 onyụn̄ ọdọhọ enye ete: “Edieke afo edide eyen Abasi, sio idemfo duọk ke isọn̄;+ koro ẹwet ẹte, ‘Enye ọyọnọ mme angel esie uyo aban̄a fi, ndien mmọ ẹyekama fi ke ubọk mmọ, mbak afo udutuak ukot fo ke itiat.’”+
7 Jesus ọdọhọ enye ete: “Ẹwet n̄ko ẹte, ‘Kûdomo Jehovah Abasi fo.’”+
8 Devil ọtọn̄ọ ntak ada enye ọdọk ata edikon̄ obot, onyụn̄ owụt enye kpukpru mme obio ubọn̄ ererimbot+ ye ubọn̄ mmọ,
9 ndien ọdọhọ enye ete: “Nyọnọ fi kpukpru n̄kpọ emi+ edieke afo ọduọde ke isọn̄ atuak ibuot* ọnọ mi.”+
10 Ekem Jesus ọdọhọ enye ete: “Daha mi, Satan! Koro ẹwet ẹte, ‘Edi Jehovah Abasi fo ke ana afo atuak ibuot ọnọ,+ onyụn̄ edi enye ikpọn̄+ ke ana afo anam edisana utom ọnọ.’”+
11 Ekem Devil adaha ọkpọn̄ enye,+ ndien, sese! mme angel ẹdi ẹdisan̄a utom ẹnọ enye.+
12 Ke ini enye okopde ete ẹma ẹmụm John,+ enye adaha ọnyọn̄ Galilee.+
13 N̄ko-n̄ko, ke ama ọkọkpọn̄ Nazareth, enye edi edidụn̄ ke Capernaum+ ke mbeninyan̄ ke n̄kann̄kụk Zebulun ye Naphtali,+
14 man osu se ẹkedade prọfet Isaiah ẹtịn̄, ẹte:
15 “O isọn̄ Zebulun ye isọn̄ Naphtali, emi ẹdude ke usụn̄ inyan̄, ke edem Jordan oko, kpa Galilee+ mme idụt!
16 mme owo emi ẹtiede ke ekịm+ ẹma ẹkụt akwa un̄wana,+ ndien amaedi mmọ eke ẹtiede ke isọn̄ ekịm n̄kpa, un̄wana+ ama asiaha+ ọnọ mmọ.”
17 Ọtọn̄ọde ke ini oro ka iso, Jesus ọtọn̄ọ ndikwọrọ ikọ onyụn̄ ọdọhọ ete: “Mbufo ẹkabade esịt,+ koro obio ubọn̄+ heaven ke asan̄a ekpere.”
18 Nte enye asan̄ade ke mbeninyan̄ Galilee, enye okụt nditọeka iba, Simon+ emi ekerede Peter+ ye Andrew eyeneka esie, nte ẹduọn̄ọde iyịre ke inyan̄, koro mmọ ẹdide mme ọkọiyak.
19 Ndien enye ọdọhọ mmọ ete: “Ẹtiene mi, ndien nyanam mbufo ẹdi mme ọkọ owo.”+
20 Kpa idaha oro, mmọ ẹdaha ẹkpọn̄ iyịre+ mmọ ẹtiene enye.
21 Ke ini enye osụk asan̄ade aka iso, enye okụt owo iba en̄wen+ emi ẹdide nditọeka, James eyen Zebedee+ ye John eyeneka esie, nte ẹdude ke ubom ye Zebedee ete mmọ, ẹdiọn̄ iyịre, ndien enye okot mmọ.
22 Kpa idaha oro, mmọ ẹkpọn̄ ubom ye ete mmọ ẹtiene enye.
23 Ndien enye asan̄a akanade+ ofụri Galilee,+ ekpep n̄kpọ ke mme synagogue+ mmọ onyụn̄ ọkwọrọ eti mbụk obio ubọn̄ onyụn̄ ọkọk kpukpru orụk udọn̄ọ+ ye kpukpru orụk ndiọkidem ke otu mme owo.
24 Ndien etop esie asuana ke ofụri Syria;+ ndien mmọ ẹda kpukpru mbon emi mîkopke nsọn̄idem,+ emi nsio nsio udọn̄ọ ye ndutụhọ ẹnọmọde, mbon emi ẹnyenede demon ẹnyụn̄ ẹduọde ndisi,+ ye mbon akpauben̄, ẹdi, ndien enye ọkọk mmọ.
25 Ndien akwa otuowo ẹto Galilee+ ye Decapolis ye Jerusalem+ ye Judea ye edem Jordan oko, ẹtiene enye.
Mme Ikọ Idakisọn̄
^ M̀mê, “atuak ibuot ini kiet.”
