Micah 6;1-16
6 Mbọk, mbufo ẹkop se Jehovah etịn̄de.+ Ẹdaha ke enyọn̄, ẹkpe ikpe ke iso ikpọ obot, yak n̄kpri obot ẹnyụn̄ ẹkop uyo mbufo.+
2 O mbufo ikpọ obot, ẹkop ikpe Jehovah, n̄ko mbufo ikpọ itiat emi ẹbịghide, ye mbufo mme itiat idakisọn̄ emi isọn̄ odorode ke esịt;+ koro Jehovah enyenede ikpe ye ikọt esie, ndien enye eyekpe ikpe ye Israel:+
3 “O ikọt mi,+ nnam mbufo nso? Ke nso usụn̄ ke nnyụn̄ mfek mbufo?+ Ẹtịn̄ se ami nduede.+
4 Koro ami n̄kosio mbufo ke isọn̄ Egypt ndọk ndi,+ nnyụn̄ mfak mbufo nsio ke ufọk ufụn;+ nnyụn̄ ndọn̄ Moses ye Aaron ye Miriam ẹbem mbufo iso.+
5 O ikọt mi, mbọk, ẹti+ se Balak edidem Moab akaduakde,+ ye se Balaam eyen Beor ọkọbọrọde enye.+ Emi ọkọtọn̄ọ ke Shittim+ tutu esịm Gilgal,+ man ẹkpefiọk ndinen edinam Jehovah.”+
6 Ndida nso ndi ke iso+ Jehovah? Ndida nso nnụhọ nnọ Abasi ke enyọn̄?+ Nte ndida ofụri edifọp uwa,+ ye nditọ enan̄ isua kiet ndi enye ke iso?
7 Nte ediwak tọsịn okukịm erọn̄, ye ediwak tọsịn idịm aran ẹyenem Jehovah esịt?+ Nte n̄kpọnọ akpan mi ke nsọn̄ibuot mi, ye mfri idịbi mi ke idiọkn̄kpọ ukpọn̄ mi?+
8 O owo, enye amasian fi se ifọnde.+ Ndien nso ke Jehovah oyom oto fi ke mîbọhọke ndinam se inende+ nnyụn̄ mma mfọnido+ nnyụn̄ nsụk idem+ nsan̄a ye Abasi fo?+
9 Uyo Jehovah ofiori okot obio,+ ndien owo emi enyenede ata ọniọn̄ ayabak enyịn̄ fo.+ O mbufo ẹkpan̄ utọn̄ ẹnọ eto ye enye emi ekemekde enye enịm.+
10 Ndi n̄kpọuto idiọkido+ ye ekpri udomo ephah oro ẹsụn̄ide ke ẹsụk ẹdu ke ufọk idiọkowo?
11 Nte mmekeme ndisana ke ido uwem edieke nnyenede udomon̄kpọ eke mînenke ye ekpat nsunsu itiat udomo?+
12 Koro mbon inyene esie ẹyọhọde ye afai, mme andidụn̄ ke enye ẹnyụn̄ ẹsu nsu,+ edeme mmọ onyụn̄ abian̄a abian̄a ke inua mmọ.+
13 “Ami nyamia fi tutu afo ọdọn̄ọ;+ ẹyesobo fi ke ntak mme idiọkn̄kpọ fo.+
14 Afo ayadia n̄kpọ edi idiyụhọke fi, idịbi fo oyonyụn̄ ana ukpọk.+ Ndien afo oyosion̄o mme n̄kpọ, edi udumenke mmọ ifụre ifụre uwọrọ; nyonyụn̄ nyak n̄kpọ ekededi eke afo edimende ifụre ifụre ọwọrọ nnọ akan̄kan̄.+
15 Afo ayasuan n̄kpasịp, edi udukpen̄eke. Afo eyedịghi olive, edi udufiọn̄ọke aran esie; ayanam edinem wine n̄ko, edi udun̄wọn̄ke.+
16 Ndien ẹmenịm mme ewụhọ Omri+ ẹnyụn̄ ẹtiene kpukpru mme edinam ufọk Ahab,+ ndien mbufo ẹsan̄a ke mme item mmọ;+ man n̄kpanam fi edi n̄kpọ n̄kpaidem n̄kponyụn̄ nnam mme owo ẹfri inụk ẹban̄a mme andidụn̄ ke enye;+ ndien mbufo ẹyebiom esuene mme owo.”+
