Mme Hebrew 11;1-40
11 Mbuọtidem+ edi idotenyịn oro enyenede nsọn̄ọ nte ke se ẹtiede ẹbet eyedi,+ uyarade oro owụtde ke ata idem n̄kpọ odu okposụkedi enyịn mîkwe.+
2 Mbuọtidem akanam ẹtie ntiense ẹban̄a mbon eyo oko.+
3 Oto mbuọtidem nnyịn ifiọk ite ke ẹkeda ikọ Abasi+ ẹnam editịm n̄kpọ+ emi, ntem se ẹkụtde ọwọrọ oto mme n̄kpọ oro mîwọrọke iwụt idem.+
4 Oto mbuọtidem Abel awa uwa eke ọsọn̄de urua akan eke Cain+ ọnọ Abasi, ndien ke ntak mbuọtidem oro ẹtie ntiense ẹban̄a enye ẹte enye ekedi edinen owo, Abasi onyụn̄ edi ntiense+ aban̄a mme enọ esie; ndien otode ke oro, enye osụk etetịn̄ ikọ,+ okposụkedi enye ama akakpa.
5 Oto mbuọtidem ẹkpụhọ Enoch+ itie mbak enye edikụt n̄kpa, owo ikonyụn̄ ikwe enye aba sia Abasi okokpụhọde enye itie;+ koro ke ini owo mîkokpụhọke enye itie, ẹma ẹtie ntiense ẹban̄a enye ẹte enye ama etịm enem Abasi esịt.+
6 Akan oro, ke mbuọtidem mîdụhe+ owo ikemeke nditịm nnem enye esịt,+ koro ana owo eke asan̄ade ekpere Abasi enịm ete enye odu+ ye nte ke enye edi andinọ+ mbon oro ẹnen̄erede ẹyom enye utịp.+
7 Oto mbuọtidem Noah,+ ke Abasi ama ọkọnọ enye ntọt aban̄a mme n̄kpọ oro owo mîkwe kan̄a,+ owụt ke imabak Abasi onyụn̄ ọkọn̄ ubom+ ndida nnyan̄a mbonufọk esie; ndien otode ke mbuọtidem oro, enye obiom ererimbot ikpe,+ onyụn̄ akabade edi andinyene edinen ido+ eke asan̄ade ye mbuọtidem.
8 Oto mbuọtidem Abraham,+ ke ini ẹkotde enye, okop uyo ke ndiwọrọ n̄ka ebiet emi ẹkenịmde ẹnọ enye ndibọ nte udeme; ndien enye ọwọrọ aka okposụkedi mîfiọkke ebiet eke enye akade.+
9 Oto mbuọtidem enye odụn̄ nte esenowo ke isọn̄ un̄wọn̄ọ nte odụn̄ ke esen idụt,+ onyụn̄ odụn̄ ke tent+ ye Isaac+ ye Jacob,+ emi ẹdide mme anditiene enye nda un̄wọn̄ọ oro nnyene.+
10 Koro enye eketiede ebet obio+ emi enyenede ata itiat idakisọn̄, emi andibọp ye andinam enye edide Abasi.+
11 Oto mbuọtidem n̄ko Sarah+ ọbọ odudu ndiyomo mfri, idem ke ini enye ama ekebe isua uman eyen,+ sia enye adade enye emi ọkọn̄wọn̄ọde un̄wọn̄ọ oro nte anam-akpanikọ.+
12 Ntre n̄ko oto owo kiet,+ emi etiede nte akpan̄kpa,+ nditọ ẹmana ẹwak nte ntantaọfiọn̄ enyọn̄ ẹnyụn̄ ẹnana ibat nte ntan mbeninyan̄.+
13 Ke mbuọtidem ke kpukpru mmọ emi ẹkekpan̄a,+ okposụkedi mmọ mîkọbọhọ edisu mme un̄wọn̄ọ oro,+ edi mmọ ẹda nsannsan ẹkụt+ ẹnyụn̄ ẹdara mmọ ẹnyụn̄ ẹtan̄a an̄wan̄wa ẹte mmimọ idi isenowo ye mme odudụn̄ ke isọn̄.+
14 Koro mbon oro ẹtịn̄de mme utọ n̄kpọ oro, ẹnọ uyarade nte ke mmimọ imenen̄ede iyom itie inọ idem mmimọ.+
15 Edi edieke ekpedide mmọ ẹma ẹka iso ẹti ebiet oro mmọ ẹketode ẹwọn̄ọ,+ mmọ ẹkpekenyene ifet ndifiak nnyọn̄ọ.+
16 Edi ke emi mmọ ẹyom ebiet eke ọfọnde akan, oro edi, enye emi odude ke heaven.+ Ntem bụt inamke Abasi iban̄a mmọ ke mmọ ndiseme n̄kot enye nte Abasi mmọ,+ koro enye ama eben̄e obio+ enịm ọnọ mmọ.
17 Oto mbuọtidem, ke ini ẹkedomode+ Abraham, enye ekpere ndiwa Isaac, ndien owo oro ọkọbọde mme un̄wọn̄ọ emi ke idatesịt ama eben̄e idem ndiwa ikpọn̄-ikpọn̄ edibon eyen esie,+
18 okposụkedi ẹketịn̄de ẹnọ enye ẹte: “Se ẹdikotde ‘mfri fo’ edito Isaac.”+
19 Edi enye akabat ete Abasi ekeme ndinam enye eset ke n̄kpa;+ ndien ke ndamban̄a usụn̄ enye ama ọtọn̄ọ ntak ọbọ enye ke n̄kpa ada enyene.+
20 Oto mbuọtidem n̄ko Isaac ọdiọn̄ Jacob+ ye Esau+ aban̄a mme n̄kpọ eke ẹdidide.
21 Oto mbuọtidem Jacob, ke ini oyomde ndikpa,+ ọdiọn̄ nditọiren Joseph kiet kiet+ onyụn̄ onụk ibuot odori ke esan̄ esie okpono Abasi.+
22 Oto mbuọtidem Joseph, ke ini ekperede utịt uwem esie, etịn̄ aban̄a uwọrọidụn̄+ nditọ Israel; onyụn̄ ọnọ ewụhọ aban̄a mme ọkpọ esie.+
23 Oto mbuọtidem ete ye eka Moses ẹdịp enye ke ọfiọn̄ ita ke enye ama akamana,+ koro mmọ ẹkekụtde nte ekpri eyen oro eyede,+ mmọ inyụn̄ ifeheke ewụhọ+ edidem.
24 Oto mbuọtidem Moses, ke ama ọkọkọri okpon,+ esịn ndikere eyen adiaha Pharaoh,+
25 emek nditiene ikọt Abasi mbiom ukụt utu ke ndidia inemesịt idiọkn̄kpọ ke ibio ini,
26 koro enye akabatde esuene+ Christ nte inyene eke okponde akan n̄kpọuto Egypt; sia enye okowụkde enyịn ese utịp eke ẹdinọde.+
27 Oto mbuọtidem enye ọkpọn̄ Egypt,+ edi ifeheke iyatesịt edidem,+ koro enye ọsọn̄ọde ada nte n̄kpọ eke okụtde Enye emi enyịn owo mîkwe.+
28 Oto mbuọtidem enye enịm passover+ onyụn̄ esịme iyịp,+ mbak andisobo editụk akpa nditọ+ mmọ.
29 Oto mbuọtidem mmọ ẹsan̄a ke Ididuot Inyan̄ ẹbe nte n̄kpọ eke ẹsan̄ade ke edisat isọn̄,+ edi ke nditọ Egypt ẹdomode ndinam kpa ntre mmọn̄ emen mmọ emen.+
30 Oto mbuọtidem ibibene Jericho ọduọ ke isọn̄ ke mmọ ẹma ẹkesan̄a ẹkanade enye ke usen itiaba.+
31 Oto mbuọtidem, Rahab+ akpara oro itieneke mbon oro ẹketụtde utọn̄ ikụt nsobo, koro enye akadade mbon uyep esịn ke ufọk ke emem emem usụn̄.+
32 Ndien nso efen ke ndidọhọ? Koro ini ididụhe ami ndika iso mbụk mban̄a Gideon,+ Barak,+ Samson,+ Jephthah,+ David+ ọkọrọ ye Samuel+ ye mme prọfet eken,+
33 emi ẹkedade mbuọtidem ẹkan mme obio ubọn̄ ke en̄wan,+ ẹnam edinen ido,+ ẹbọ mme un̄wọn̄ọ,+ ẹkịbi mme ekpe inua,+
34 ẹnịme ide ikan̄,+ ẹbọhọ iso akan̄kan̄,+ ẹsio mmọ ke itie mmemidem ẹnam ẹkop odudu,+ ẹnyene uko ke ekọn̄,+ ẹsuan udịmekọn̄ isenidụt.+
35 Iban ẹbọ mme akpan̄kpa mmọ oto ke ediset ke n̄kpa;+ ẹtụhọde irenowo eken sia mmọ mîkenyịmeke ndibọ ufak ibuot mmọ, man mmọ ẹkpenyene ediset ke n̄kpa eke ọfọnde akan.
36 Ih, mmọ eken ẹsobo idomo mmọ ẹto nsahi ye umia, ke akande oro, ẹsobo idomo ẹto ebuka+ ye ufọk-n̄kpọkọbi.+
37 Ẹma ẹtọn̄ọ mmọ ke itiat,+ ẹdomo mmọ,+ ẹyọk mmọ ẹsịbe iba, ẹwot mmọ+ ke akan̄kan̄, mmọ ẹsịne ikpaerọn̄+ ye ikpaebot ẹyo ẹsan̄a, ke adan̄aemi mmọ ẹdude ke unana,+ ke ukụt,+ ẹnyụn̄ ẹnamde n̄kpọ ye mmọ ke idiọk usụn̄;+
38 ndien ererimbot idotke ye mmọ. Mmọ ẹyo ke desat ye ke obot ye ke abaitiat+ ye ke ndudu isọn̄.
39 Ndien okposụkedi ẹketiede ntiense ẹban̄a kpukpru mmọ ke ntak mbuọtidem mmọ, mmọ ikọbọhọ edisu un̄wọn̄ọ oro,+
40 sia Abasi ekebemde iso ada okụt n̄kpọ eke ọfọnde akan+ ọnọ nnyịn,+ man ẹkûnam mmọ+ ẹfọn ẹma+ ke nnyịn mîdụhe.+
