Mme Hebrew 12;1-29
12 Ntre, ndien, sia nnyịn inyenede akwa otu ntiense+ eke ẹwakde ntem ẹkande nnyịn ẹkụk, ẹyak nnyịn n̄ko ision̄o kpukpru n̄kpọ eke ẹdobide ifep+ ye idiọkn̄kpọ eke ẹyịrede nnyịn,+ ẹnyụn̄ ẹyak nnyịn ifehe mbuba+ eke ẹnịmde nnyịn ke iso+ ye ime,+
2 nte nnyịn iwụkde enyịn ise Jesus, Akpan Isụn̄utom+ ye Andinam mbuọtidem nnyịn ọfọn ama.+ Koro ke ntak idatesịt oro ẹkenịmde enye ke iso enye ama ọyọ+ eto ndutụhọ, abat esuene ke ekpri n̄kpọ, onyụn̄ osụhọde etetie ke ubọk nnasia ebekpo Abasi.+
3 Mmọdo, ẹtịm ẹkere enye emi ọkọyọde utọ idiọk ndutịn̄ oro+ mme anamidiọk ẹketịn̄de ẹbiọn̄ọ ufọn idemmọ, mbak mbufo ẹdikpa mba ẹnyụn̄ ẹkop mmemidem ke ukpọn̄ mbufo.+
4 Ke en̄wan oro mbufo ẹn̄wanade ye idiọkn̄kpọ oro, mbufo in̄wanake kan̄a isịm udomo emi ẹduọkde iyịp,+
5 edi mbufo ẹmefre item ofụri ofụri, oro ọdọhọde mbufo nte nditọ,+ ete: “Eyen mi, kûse ntụnọ Jehovah ke usụhọde, kûnyụn̄ uyemede ke ini enye enen̄erede fi;+
6 koro Jehovah otụnọde owo eke enye amade; ndien enye amia kpukpru owo eke enye adarade nte eyen.”+
7 Edi ke ntak ntụnọ+ ke mbufo ẹyọ. Abasi anam n̄kpọ ye mbufo nte nditọ.+ Koro ewe eyen ke ete mîtụnọke?+
8 Edi edieke mbufo mîbọhọ ntụnọ emi kpukpru owo ẹbọde, mbufo ẹdi nditọ akpara,+ idịghe ata nditọ.
9 N̄ko-n̄ko, nnyịn ima inyene mme ete eke obụk emi ẹkesịtụnọde nnyịn,+ ima isinyụn̄ ikpono mmọ. Nte nnyịn ikpenen̄ekede isụk ibuot inọ Ete emi ọnọde nnyịn uwem eke spirit inyụn̄ idu uwem?+
10 Koro mmọ ẹketụnọ nnyịn ke usen ifan̄ nte mmọ ẹkụtde ẹte ọfọn,+ edi enye anam emi ke ufọn nnyịn man nnyịn ikpetiene ibuana ke edisana ido esie.+
11 Ke akpanikọ, ntụnọ ndomokiet itiehe inem inem idahaemi, edi ababiak;+ edi ke oro ebede enye on̄wụm mfri emem+ ọnọ mmọ oro ẹkedade enye ẹnọ mmọ ukpep, oro edi, edinen ido.+
12 Ntem ẹsọn̄ọ ubọk eke ẹmemde+ ye edọn̄ eke ẹnyekde,+
13 ẹnyụn̄ ẹka iso ẹsiak afan̄ eke enende ẹnọ ikpat mbufo,+ mbak ukot eke ememde edifebede, edi utu ke oro man ẹkọk enye.+
14 Ẹyom emem ye kpukpru owo,+ ye edisana ido+ koro ke ẹsiode oro ẹfep owo baba kiet idikwe Ọbọn̄,+
15 ẹtịm ẹkpeme mbak owo baba kiet ẹditaba mfọnido Abasi oro owo mîdotke;+ mbak ndotndot orụn̄+ editịbe esịn mfịna, mbak enye edinyụn̄ asabade ediwak owo;+
16 mbak owo use m̀mê owo ekededi eke mîwụtke esịtekọm inọ ndisana n̄kpọ edidu, nte Esau,+ emi akadade unen esie nte akpan okpụhọ ye udia ini kiet.+
17 Koro mbufo ẹmefiọk ẹte ke oro ebede ke ini enye okoyomde ndibọ edidiọn̄,+ ẹma ẹsịn enye,+ koro, okposụkedi enye akadade mmọn̄eyet enen̄ede oyom ẹkpụhọ ekikere,+ ufan̄ ikodụhe inọ enye.+
18 Koro mbufo isan̄ake ikpere se ẹkemede nditụk+ ye se ẹnamde asak ikan̄,+ ye obubịt enyọn̄ ye makmak ekịm ye oyobio,+
19 ye ọkpọsọn̄ uyo obukpon̄+ ye uyo ikọ;+ emi edide ke ẹkopde mme owo ẹkpe ubọk ẹte ẹkûtịn̄ aba ikọ ndomokiet ẹnọ mmimọ.+
20 Koro mmọ ikekemeke ndiyọ ewụhọ oro ọdọhọde: “Edi edieke unam otụkde obot oro, ana ẹtọn̄ọ enye ke itiat.”+
21 N̄ko, se ẹkekụtde ama enyene ndịk etieti tutu Moses ọdọhọ ete: “Ndịk anam mi idem onyụn̄ enyek mi.”+
22 Edi mbufo ẹmesan̄a ẹkpere Obot Zion+ ye obio+ odu-uwem Abasi, kpa Jerusalem eke heaven,+ ye akwa udịm mme angel,+
23 ke akwa esop,+ ye esop mmọ emi ẹdide akpan+ emi ẹwetde enyịn̄+ mmọ ke heaven, ye Abasi emi edide Ebiereikpe kpukpru owo,+ onyụn̄ edide uwem eke spirit+ ọnọ ndinen owo emi ẹnamde ẹfọn ẹma,+
24 ye Jesus esịne-ufọt+ obufa ediomi,+ ye iyịp oro ẹsịmede,+ emi etịn̄de ikọ ke usụn̄ oro ọfọnde akan iyịp Abel.+
25 Mbufo ẹkûsịn ndikpan̄ utọn̄ nnọ enye emi etịn̄de ikọ.+ Koro edieke mbon oro mîkakpan̄ke utọn̄ inọ enye emi ọkọnọde mmọ ntọt Abasi ke isọn̄ mîkọbọhọke,+ nnyịn n̄ko idibọhọke edieke iwọn̄ọrede ikpọn̄ enye emi etiede ke heaven etịn̄ ikọ.+
26 Uyo esie ama enyen̄e isọn̄+ adan̄aoro, edi idahaemi enye ọn̄wọn̄ọ, ete: “Osụk kan̄a ini kiet efen ami nyenyen̄e isọn̄ ye enyọn̄+ n̄ko.”
27 Ikọ oro “Osụk kan̄a ini kiet efen” ọwọrọ edimen mme n̄kpọ oro ẹnyen̄ede mfep nte mme n̄kpọ oro ẹkenamde,+ man mme n̄kpọ oro owo mîkemeke ndinyen̄e ẹkpeka iso ẹdu.+
28 Mmọdo, sia idibọde obio ubọn̄ eke n̄kpọ mîkemeke ndinyen̄e,+ ẹyak nnyịn ika iso inyene mfọnido oro owo mîdotke, emi otode ke enye nnyịn ikeme ndinam edisana utom oro Abasi enyịmede, ke mbak Abasi ye uten̄e.+
29 Koro Abasi nnyịn edi n̄ko ikan̄ eke atade-ta.+
