Mme Hebrew 6;1-20
6 Ke ntak emi, sia nnyịn ima ikọkpọn̄ akpa ukpepn̄kpọ+ emi aban̄ade Christ,+ ẹyak nnyịn isịn ifịk ikọri isịm ọyọhọ idaha,+ ikûtọn̄ọ aba ntak isịn itiat idakisọn̄,+ oro edi, edikabade esịt n̄kpọn̄ utom n̄kpa,+ ye edibuọt idem ke Abasi,+
2 ye ukpepn̄kpọ aban̄ade baptism+ ye edidori owo ubọk,+ ediset mme akpan̄kpa+ ye nsinsi ikpe.+
3 Nnyịn iyanam emi, edieke Abasi enyịmede.+
4 Koro amaedi mbon oro ẹma ẹkenam enyịn an̄wan̄a+ mmọ ini kiet ko, emi ẹma ẹkenyụn̄ ẹtabi enọ mfọn emi otode heaven,+ ẹnyụn̄ ẹkabade ẹdi mme andibuana ke edisana spirit,+
5 emi ẹma ẹkenyụn̄ ẹtabi+ eti ikọ Abasi ye mme odudu editịm n̄kpọ eke edide,+
6 edi emi ẹduọn̄ọde ẹkpọn̄ usụn̄,+ ọsọsọn̄ ndinam mmọ ẹtọn̄ọ ntak ẹkabade esịt,+ koro mmọ ẹtọn̄ọde ntak ẹkọn̄ Eyen Abasi ke eto ẹnọ idemmọ ẹnyụn̄ ẹsuenede enye an̄wan̄wa.+
7 Ke uwụtn̄kpọ, isọn̄ oro ọn̄wọn̄de edịm emi esidepde ke esịt, onyụn̄ osion̄ode ikọn̄ udia eke ọfọnde ye mbon oro ẹtọde enye ẹnọ,+ ọbọ edidiọn̄ oto Abasi nte utịp.
8 Edi edieke enye osion̄ode n̄kukịm ye mbaraekpe, ẹsịn enye, enye onyụn̄ ekpere ndidi se ẹsụn̄ide;+ ndien ke akpatre ẹfọp enye ke ikan̄.+
9 Nte ededi, ndima, nnyịn imetịm ifiọk ite ke n̄kpọ ọfọn ye mbufo akan mbon oro ye nte ke mbufo ke ẹnam mme n̄kpọ oro ẹdidade mbufo ẹsịm edinyan̄a, okposụkedi nnyịn itịn̄de ikọ ntem.
10 Koro Abasi ikwan̄ake eke ekpesịnde enye efre utom mbufo ye ima eke mbufo ẹwụtde ẹban̄a enyịn̄ esie,+ ke emi mbufo ẹkenamde n̄kpọ ẹnọ ndisana owo+ ẹnyụn̄ ẹsụk ẹkade iso ẹnam.
11 Edi nnyịn iyom owo mbufo kiet kiet owụt utọ ifịk oro man ekpenyene ọyọhọ nsọn̄ọ+ aban̄a idotenyịn+ tutu esịm utịt,+
12 mbak mbufo ẹdikabade ẹfu ifu,+ edi ẹdi mme andikpebe+ mbon oro otode ke mbuọtidem ye ime mmọ ẹbọ mme un̄wọn̄ọ ẹnyene.+
13 Koro ke ini Abasi ọkọn̄wọn̄ọde un̄wọn̄ọ ọnọ Abraham,+ sia enye mîkemeke nditomo owo eke okponde akan, enye otomo idemesie,+
14 ete: “Ke akpanikọ nyọdiọn̄ fi, ndinyụn̄ ntreke ndinam fi ọtọt.”+
15 Ntre ke Abraham ama ekeme ime, enye ama ọbọ un̄wọn̄ọ emi.+
16 Koro mme owo ẹsin̄wọn̄ọ un̄wọn̄ọ ke enyịn̄ owo oro okponde akan,+ ndien un̄wọn̄ọ oro mmọ ẹdade edi akpatre n̄kpọ eke ẹdade ẹbiere kpukpru ikọ, sia enye edide ubiọn̄ oro ibet enyịmede ọnọ mmọ.+
17 Kpasụk ntre ke ini Abasi aduakde nditetịm n̄wụt mmọ emi ẹdidade un̄wọn̄ọ ẹnyene+ ete ke uduak imọ ikemeke ndikpụhọde,+ enye ada un̄wọn̄ọ ke ikọ esie,
18 man okpoto ke n̄kpọ iba emi mîkemeke ndikpụhọde emi Abasi mînyụn̄ ikemeke ndisu nsu+ mban̄a, nnyịn emi ikefehede ika ebiet ubọhọ ikpọbọ akwa nsịnudọn̄ ndisọn̄ọ mmụm idotenyịn+ emi ẹnịmde nnyịn ke iso n̄kama.
19 Idotenyịn+ emi ke nnyịn inyene nte ukwak ubom ukpọn̄ nnyịn, emi mîdikpụhu, emi onyụn̄ ọsọn̄ọde ada, onyụn̄ ebede odụk esịt ikpehe,+
20 ke ebiet emi enye emi ebede iso, kpa Jesus, okodụkde ke ibuot nnyịn,+ enye akabade edi akwa oku ke ukem usụn̄ oro Melchizedek ekedide.+
