Psalm 102;1-28
Akam owo ukụt ke ini emi enye okopde mmemidem onyụn̄ etịn̄de mfịna esie ọnọ Jehovah.+
102 O Jehovah, kop akam mi;+Ndien eseme emi nsemede nyom un̄wam akpakam edi ebịne fi.+
2 Kûdịp mi iso fo ke usen emi ndude ke nnanenyịn.+Kpan̄ utọn̄ nọ mi;+Ke usen emi nsemede, wara yere mi.+
3 Koro mme usen mi ẹmesịm utịt nte nsụn̄ikan̄,+Mme ọkpọ mi ẹnyụn̄ ẹfiop nte otụn̄ikan̄.+
4 Esịt mi emeyemede onyụn̄ asat nte ikọn̄,+Koro mmefre ndidia udia mi.+
5 Ke ntak uyo eseme mi+Nditak nsụhọ ikpa ye ọkpọ.+
6 Ndibiet ikpan̄inyan̄ ke wilderness.+Mmakabade mbiet ekpri ikurikụt ke mme n̄wụre ebiet.
7 Nditie ọkpọ ọkpọ,Mmonyụn̄ n̄kabade mbiet inuen emi ọsọrọde ikpọn̄ ke ọkọmufọk.+
8 Mme asua mi ẹsuene mi kpukpru usen.+Mmọ eke ẹbatde mi ke ndisịme ẹmeda enyịn̄ mi ẹsụn̄i isụn̄i.+
9 Koro mmadia ntọn̄ nte udia;+Mmọn̄eyet onyụn̄ abuaha ke mme n̄kpọ emi n̄n̄wọn̄de,+
10 Ke ntak ifụtesịt ye iyatesịt fo;+Koro afo ememenede mi ke enyọn̄ man okpotop mi ọduọk.+
11 Mme usen mi ẹbiet mbukpọn̄ emi adahade ke ini utịn osopde,+Ndien ami mmasat nte ikọn̄.+
12 Amaedi afo, O Jehovah, afo oyodụn̄ ke nsinsi,+Ndien se ẹdade ẹti fi eyebịghi ke ofụri emana.+
13 Afo ayadaha ada, ayatua Zion mbọm,+Koro edide ini ndifọn mfọn ye enye,Koro ekem ini oro ẹkenịmde.+
14 Koro mme asan̄autom fo ẹmekop inemesịt ẹban̄a mme itiat esie,+Mmọ ẹnyụn̄ ẹkere ẹban̄a ntan esie.+
15 Ndien mme idụt ẹyebak enyịn̄ Jehovah,+Kpukpru ndidem isọn̄ ẹyenyụn̄ ẹbak ubọn̄ fo.+
16 Koro Jehovah ọyọbọp Zion;+Enye ọyọwọrọ edi ke ubọn̄ esie.+
17 Enye ọyọbiọn̄ utọn̄ ke akam mbon oro ẹbụmede kpukpru n̄kpọ mmọ,+Idinyụn̄ isịnke akam mmọ ke ndek.+
18 Ẹwet n̄kpọ emi ẹnọ emana ini iso;+Ndien mbon oro ẹdibotde ẹyetoro Jah.+
19 Koro enye emetie ke edisana edikon̄ ebiet esie osụk iso ese,+Jehovah etie ke mme heaven ese isọn̄,+
20 Man okop mmụm owo-n̄kpọkọbi,+Man atat mbon oro ẹnịmde ẹnọ n̄kpa;+
21 Man ẹtan̄a enyịn̄ Jehovah ke Zion+Ye itoro esie ke Jerusalem,+
22 Ke ini mme idụt ẹsopde idem ọtọkiet,+Ye mme obio ubọn̄ man ẹnam n̄kpọ Jehovah.+
23 Enye anam odudu mi emem ke usụn̄,+Esịbe mme usen mi ẹmụhọ.+
24 Ami ndọhọ nte: “O Abasi mi,Kûsịbe mi ufep ke ufọt isua uwem mi;+Mme isua fo ẹbịghi ke kpukpru emana.+
25 Anyan ini ko afo ama esịn itiat idakisọn̄ ọnọ isọn̄,+Mme heaven ẹnyụn̄ ẹdi utom ubọk fo.+
26 Mmọ ẹyetak, edi afo oyosụk odu;+Kpukpru mmọ ẹyenyụn̄ ẹtaha nte ọfọn̄.+Afo oyokpụhọ mmọ nte edisịnen̄kpọ, ndien mmọ ẹyesịm utịt mmọ.+
27 Edi afo ukpụhọkede, isua fo idinyụn̄ ikụreke.+
28 Nditọ ikọt fo ẹyeka iso ẹdụn̄;+Ndien ẹyesọn̄ọ ẹwụk nditọ mmọ ke iso fo.”+
