Nahum 3;1-19
3 Mbọm obio emi ọduọkde iyịp.+ Enye ọyọhọ ye abian̄a ye n̄wo. Enye itreke ndimụm se atade!
2 Kop uyom ikpa+ ye uyom wheel, ye enan̄-mbakara emi abarade itọk ye chariot emi ọfrọde.+
3 Andidoro ke enan̄-mbakara, akan̄kan̄ emi asakde ikan̄, eduat emi asiahade emịnen̄mịnen̄,+ ediwak owo emi ẹwotde, ye ediwak okpo owo; ndien mme okpo owo inyeneke ibat. Mmọ ẹmetuak ukot ke mme okpo owo mmọ ẹduọn̄ọ;
4 ke ntak akpakịp edinam usan̄a akpara+ eke akpara emi eyede uyai, onyụn̄ edide n̄wan idiọn̄, emi adade mme edinam usan̄a akpara esie omụm mme idụt ke afia onyụn̄ omụmde mme ubon ke idiọn̄ esie.+
5 Jehovah mme udịm ọdọhọ ete: “Sese! Ami mmenyene utọk ye afo,+ ndien nyofụhọde isọn̄ọfọn̄ fo mfụk fi iso, nyonyụn̄ nnam mme idụt ẹkụt iferi fo,+ nnyụn̄ nnam mme obio ubọn̄ ẹkụt esuene fo.
6 Ndien nyotop mbubiam n̄kpọ nduọk fi,+ nnyụn̄ nnam fi edi n̄kpọ ndek; ndien nyenịm fi nte n̄kpọ ndise.+
7 Ndien ama ekem, owo ekededi eke edikụtde fi eyefehe ọkpọn̄ fi,+ onyụn̄ ọdọhọ ete, ‘Ẹmebụme Nineveh! Anie editua enye mbọm?’ Ndiyom mme owo ke m̀mọ̀n̄ ẹdidọn̄ fi esịt?
8 Ndi afo ọmọfọn akan No-amon,+ emi eketiede ke mme edịk Nile?+ Mmọn̄ ẹma ẹdu ẹkan enye ẹkụk, inyan̄ ekedi inyene esie, ibibene esie okonyụn̄ ọtọn̄ọ ke inyan̄.
9 Ethiopia ekedi ofụri odudu esie ye Egypt n̄ko;+ ndien oro ikenyeneke udomo. Put ye mbon Libya ẹkedi mme andin̄wam fi.+
10 Enye n̄ko akana aka ntan̄mfep; ẹma ẹmụm enye nte mbuotekọn̄.+ Ẹda ke kpukpru ibuot efak ẹkpok nditọ esie n̄ken̄e n̄ken̄e;+ ndien ẹsịn afia ẹban̄a ikọt esie+ emi ẹnọde ubọn̄, ẹnyụn̄ ẹkọbi ikpọ owo esie ke ebuka.+
11 “Afo n̄ko ayakpa mmịn;+ afo oyonyụn̄ edịbe.+ Afo n̄ko oyoyom ubọhọ oto mme asua fo.+
12 Kpukpru mme ebiet ukpeme fo ẹbiet mme eto fig ye akpa mfri eke ẹdatde, emi edide edieke ẹnyen̄ede, mmọ ẹduọn̄ọ ẹdụk inua andidia.+
13 “Sese! Ikọt fo ẹbiet iban ke ufọt fo.+ Mme inuaotop obio fo iditreke ndiberede nnọ mme asua fo. Ikan̄ oyonyụn̄ ata mme eto usịnusụn̄ fo.+
14 Da mmọn̄ sịn ọkọ kanade idemfo kụk.+ Sọn̄ọ mme ebiet ukpeme fo.+ Dụk okpụk, nyụn̄ dịghi mbat; sọn̄ọ mụm n̄kpọ unam kọrikọri kama.
15 Kpasụk do ke ikan̄ edita fi. Akan̄kan̄ eyesịbe fi efep.+ Enye ayata fi nte nditọ n̄kukun̄kpọyọriyọ.+ Wak ke ibat nte nditọ n̄kukun̄kpọyọriyọ; wak nte n̄kukun̄kpọyọriyọ.
16 Afo amanam mbonurua fo ẹwak ẹkan ntantaọfiọn̄ ke ikpaenyọn̄.+
“Nditọ n̄kukun̄kpọyọriyọ ẹmefọrọde ikpọk mmọ; ekem ẹfe ẹdaha.
17 Mbon ukpeme fo ẹbiet n̄kukun̄kpọyọriyọ, mme etubom fo oro ẹtan̄de owo ke ekọn̄ ẹnyụn̄ ẹbiet udịm n̄kukun̄kpọyọriyọ. Mmọ ẹnam nna ke itienna emi ẹbọpde ke itiat ke usen etuep. Utịn asiaha, ndien mmọ ẹfen̄e; owo inyụn̄ ifiọkke ebiet eke mmọ ẹkade.+
18 “Mme ekpemerọn̄ fo ẹmeyet idap,+ O edidem Assyria; n̄kpọsọn̄ owo fo ẹdu ke mme ebietidụn̄ mmọ.+ Ẹmesuan ikọt fo ke enyọn̄ obot, ndien idụhe baba owo kiet eke atan̄de mmọ obon ọtọkiet.+
19 Ubọhọ idụhe inọ fi ke afanikọn̄ fo. Owo inyụn̄ ikemeke ndikọk unan fo.+ Kpukpru mmọ eke ẹkopde etop fo ẹyekwak ubọk ẹban̄a fi;+ koro anie ke idiọkido fo mîkesịmke kpukpru ini?”+
