Nehemiah 1;1-11
1 Ikọ Nehemiah+ eyen Hacaliah: Edikem ke ọfiọn̄ Chislev,+ ke ọyọhọ isua edịp,+ ami ndu ke akwa ufọk ubọn̄ ke Shushan.+
2 Ndien Hanani,+ kiet ke otu nditọete mi, odụk edi, enye ye iren Judah en̄wen, ndien ami mbụp+ mban̄a mme Jew,+ kpa nsụhọ mbon ntan̄mfep+ oro ẹkebọhọde,+ nnyụn̄ mbụp n̄ko mban̄a Jerusalem.
3 Ndien mmọ ẹbọrọ mi ẹte: “Mbon oro ẹkeyọhọde ẹsụhọ do ke ikpehe obio ukara,+ emi mîkakaha ntan̄mfep, ẹdu ke ata idiọk idaha+ ye ke itie esuene;+ ibibene+ Jerusalem omowụre, ẹmenyụn̄ ẹfọp mme inuaotop+ esie ke ikan̄.”
4 Edikem ke ndondo oro n̄kopde ikọ emi, ami nsụhọde ntie ntua eyet nnyụn̄ mfụhọ ke ediwak usen, ndien ami n̄ka iso ntre udia+ nnyụn̄ mbọn̄ akam ke iso Abasi enyọn̄.+
5 Ndien ndọhọ nte: “Ah, Jehovah Abasi enyọn̄, Abasi emi okponde onyụn̄ enyenede uten̄e,+ emi enịmde ediomi+ ye ima-mfọnido ọnọ mbon oro ẹmade enye+ ẹnyụn̄ ẹnịmde mme ewụhọ+ esie,
6 mbọk, kpan̄ utọn̄,+ nyụn̄ tat enyịn fo, man okop akam emi ami asan̄autom fo+ mbọn̄de ke iso fo mfịn emi mban̄a nditọ Israel uwemeyo ye okoneyo,+ kpa mme asan̄autom fo, ke adan̄aemi nyararede+ mme idiọkn̄kpọ+ nditọ Israel emi nnyịn inamde idue fi. Nnyịn imanam idiọkn̄kpọ, ami ye ufọk ete mi.+
7 Edi akpanikọ nte ke nnyịn imanam oburobụt ido idue fi+ inyụn̄ inịmke mme ibet+ ye mme ewụhọ+ ye mme ubiereikpe+ fo emi afo akadade Moses asan̄autom fo ọnọ.+
8 “Mbọk, ti+ ikọ oro afo okowụkde Moses asan̄autom fo, ete, ‘Edieke mbufo mînamke akpanikọ, ami n̄ko nyasuan mbufo ndọn̄ ke otu mme idụt.+
9 Edieke mbufo ẹdifiakde ẹtiene mi+ ẹdinyụn̄ ẹnịmde mme ewụhọ+ mi ẹnyụn̄ ẹnam mmọ,+ ikọt mbufo ẹkpesasuana ẹka utịt ikpaenyọn̄, nyatan̄ mmọ do+ nnyụn̄ nda mmọ ndi+ ke ebiet emi mmekde nte enyịn̄ mi odu.’+
10 Ndien mmọ ẹdi mme asan̄autom fo+ ye ikọt fo,+ emi afo akadade akwa odudu+ ye ọkpọsọn̄ ubọk+ fo afak.
11 Ah, Jehovah, mbọk kpan̄ utọn̄ ke akam emi asan̄autom fo ọbọn̄de ye ke akam+ ikọt fo emi ẹkopde inemesịt ndibak enyịn̄ fo;+ mbọk, nam asan̄autom fo okụt unen mfịn+ emi nyụn̄ yak mbọm esie anam owo emi.”+
Ndien ami n̄kedi akama-cup+ edidem.
