Numbers 4;1-49
4 Ekem Jehovah ọdọhọ Moses ye Aaron ete:
2 “Yak ẹbat nditọiren Kohath+ ke otu nditọ Levi, nte mme ubon mmọ ẹdide ke ufọk mme ete mmọ,
3 ọtọn̄ọde ke owo isua edịp ye duop+ esịm owo isua aba ye duop,+ kpukpru owo emi ẹdude ke otu emi esinamde utom+ ke tent usopidem.
4 “Utom nditọ Kohath ke tent usopidem+ edi emi. Utom emi edi ata edisana:
5 Ndien Aaron ye nditọiren esie ẹnyene ndidụk ndi ke ini ẹyomde ndidaha ke itienna, mmọ ẹnyụn̄ ẹnyene ndikọn̄ọde ikpehe+ nda mfụk ekebe+ ntiense.
6 Ndien mmọ ẹyeda ọfọn̄ ikpa seal+ ẹfụk enye ẹnyụn̄ ẹtat blu blu ọfọn̄ ẹfụk ke enyọn̄ ẹnyụn̄ ẹdọn̄ nnyan eto+ esie.
7 “Ndien mmọ ẹyetat blu blu ọfọn̄ ẹfụk okpokoro+ uyo iso Abasi, mmọ ẹnyụn̄ ẹnyene ndidori mme usan+ ye mme cup+ ye mme eso ye mme osioinua emi ẹsidade ẹtọhọ edin̄wọn̄ uwa; ndien uyo+ emi esidude do kpukpru ini enyene ndika iso ndoro ke enyọn̄ okpokoro emi.
8 Ndien mmọ ẹnyene nditat ọfọn̄ ididuot+ ndidi mfụk mmọ, nnyụn̄ nda ọfọn̄ ikpa seal+ mfụk nnyụn̄ ndọn̄ nnyan eto+ esie.
9 Mmọ ẹnyụn̄ ẹnyene ndida blu blu ọfọn̄ mfụk uwụk utuenikan̄+ emi ọnọde un̄wana ye utuenikan̄+ esie ye ufatikan̄+ ye n̄kpọ ufọp incense+ ye kpukpru n̄kpọ udọn̄ aran+ emi mmọ ẹsidade ẹnam utom do.
10 Ndien mmọ ẹnyene ndimen enye ye kpukpru n̄kpoduoho esie nsịn ke ọfọn̄ ikpa seal+ nnyụn̄ mmen ndori ke ibiọn̄ eto.
11 Ndien mmọ ẹnyene nditat blu blu ọfọn̄ mfụk itieuwa+ oro ẹnamde ke gold, nnyụn̄ nda ọfọn̄ ikpa seal+ mfụk enye nnyụn̄ ndọn̄ nnyan eto+ esie.
12 Ndien mmọ ẹnyene nditan̄ kpukpru n̄kpoduoho+ utom emi mmọ ẹsidade ẹnam utom ke edisana ebiet ndọn̄ ke blu blu ọfọn̄ nnyụn̄ nda ọfọn̄ ikpa seal+ mfụk nnyụn̄ nda mmọ ndori ke ibiọn̄ eto.
13 “Ndien mmọ ẹnyene ndisio ntọn̄ ikpọn̄ uwa ke itieuwa+ nnyụn̄ ntat ọfọn̄ idet erọn̄ emi enyenede uduot mmọn̄ibọn̄ mfụk enye.
14 Ndien mmọ ẹnyene nditan̄ kpukpru n̄kpoduoho emi ẹsidade ẹnam utom ke esịt ndori ke enyọn̄ esie, oro edi, n̄kpọ ufọp incense, ye fork ye udọk usio ntọn̄ ye mme eso, kpukpru n̄kpoduoho itieuwa;+ ndien mmọ ẹnyene nditat ọfọn̄ ikpa seal mfụk enye nnyụn̄ ndọn̄ nnyan eto+ esie.
15 “Ndien Aaron ye nditọiren esie ẹnyene ndifụk edisana ebiet+ ye kpukpru n̄kpoduoho+ edisana ebiet mma ke ini ẹyomde ndidaha ke itienna, ndien ke oro ebede nditọ Kohath ẹyedụk ẹdi ẹdimen mmọ,+ edi mmọ inyeneke nditụk+ edisana ebiet mbak mmọ ẹdikpan̄a. Emi edi mbiomo nditọ Kohath ke tent usopidem.+
16 “Ndien Eleazar eyen Aaron oku edise aban̄a+ aran+ emi ẹdade ẹnọ un̄wana ye edifuọn̄ incense+ ye uwa n̄kpasịp+ emi odude do kpukpru ini ye aran oro ẹsidade ẹyet owo,+ onyụn̄ edi enye edise aban̄a tent utuakibuot ye kpukpru se idude ke esịt, oro edi, edisana ebiet ye n̄kpoduoho esie.”
17 Ndien Jehovah ọdọhọ Moses ye Aaron ete:
18 “Ẹkûyak ẹsịbe mme ubon nditọ Kohath+ ẹfep ke otu nditọ Levi.
19 Edi ẹnam n̄kpọ emi ẹnọ mmọ man mmọ ẹdu uwem, ẹkûnyụn̄ ẹkpan̄a ke ini mmọ ẹsan̄ade ẹkpere ata ndisana n̄kpọ.+ Aaron ye nditọiren esie ẹyedụk ẹdi, ndien mmọ ẹyenọ mmọ kiet kiet utom ndinam ye mbiomo ndibiom.
20 Ndien mmọ inyeneke ndidụk ndikụt ndisana n̄kpọ, idem ekpedi enyịn kiet, mbak mmọ ẹdikpan̄a.”+
21 Ekem Jehovah ọdọhọ Moses ete:
22 “Yak ẹbat nditọ Gershon,+ ih, yak ẹbat mmọ ke ufọk mme ete mmọ nte mme ubon mmọ ẹdide.
23 Ọtọn̄ọde ke owo isua edịp ye duop esịm owo isua aba ye duop ke afo edisịn enyịn̄ ke n̄wed,+ kpukpru owo emi ẹdude ke otu emi esinamde utom ke tent usopidem.
24 Emi edi utom mme ubon nditọ Gershon ke se ẹdinamde ye se ẹdibiomde.+
25 Ndien mmọ ẹnyene ndibiom mme ọfọn̄ tent+ utuakibuot ye tent usopidem,+ se ẹdade ẹfụk+ enye ye ọfọn̄ ikpa seal emi ofụhọde+ enye ke enyọn̄, ye ọfọn̄+ enyịnusụn̄ tent usopidem,
26 ye mme ikpehe+ okụre ye ọfọn̄+ enyịnusụn̄ inuaotop okụre emi odude akanade tent utuakibuot ye itieuwa, ye mme urụk tent ye kpukpru n̄kpoduoho utom mmọ, ye kpukpru n̄kpọ emi ẹsidade ẹnam utom. Ntem ke mmọ ẹdinam utom.
27 Ke uyo Aaron ye nditọiren+ esie ke nditọ Gershon+ ẹdinam ofụri utom mmọ ẹnyụn̄ ẹbiom ofụri mbiomo mmọ, mbufo ẹnyụn̄ ẹnyene ndinọ mmọ kpukpru se mmọ ẹdinamde.
28 Emi edi utom mme ubon nditọ Gershon+ ke tent usopidem, ndien utom emi mmọ ẹnyenede ndinam esịne Ithamar,+ eyen Aaron oku, ke ubọk.
29 “Amaedi nditọ Merari,+ afo enyene ndisịn mmọ enyịn̄ ke n̄wed nte mme ubon mmọ ẹdide ke ufọk mme ete mmọ.
30 Ọtọn̄ọde ke owo isua edịp ye duop esịm owo isua aba ye duop ke afo edisịn enyịn̄ ke n̄wed, kpukpru owo emi ẹdude ke otu emi esinamde utom ke tent usopidem.+
31 Ndien emi edi mbiomo mmọ, kpa se mmọ ẹdinamde,+ nte ofụri utom mmọ ẹdide ke tent usopidem: mme obubọk+ tent utuakibuot ye mbiọn̄ eto+ esie ye mme adaha+ esie ye mme etak+ esie,
32 ye mme adaha+ okụre emi ẹdude ẹkanade ye mme etak+ mmọ ye mme ọkpọhọ+ tent mmọ ye mme urụk tent ọkọrọ ye kpukpru n̄kpọutom mmọ ye ofụri utom mmọ. Ndien mbufo ẹdinọ mmọ n̄kpọutom mmọ, nte mbiomo+ mmọ, ke owo ke owo.
33 Emi edi utom mme ubon nditọ Merari+ nte ofụri utom mmọ ẹdide ke tent usopidem, emi esịnede Ithamar, eyen Aaron oku,+ ke ubọk.”
34 Ndien Moses ye Aaron ye mbọn̄+ esop ẹsịn nditọ Kohath+ enyịn̄ ke n̄wed nte mme ubon mmọ ye ufọk mme ete mmọ ẹdide,
35 ọtọn̄ọde ke owo isua edịp ye duop+ esịm owo isua aba ye duop,+ kpukpru owo emi ẹdude ke otu emi esinamde utom ke tent usopidem.+
36 Ndien mbon oro ẹkesịnde enyịn̄ ke n̄wed ke otu mmọ, ke ubon mmọ, ẹkedi owo tọsịn iba, ikie itiaba ye aba ye duop.+
37 Mmọ emi ẹdi mbon oro ẹkesịnde enyịn̄ ke n̄wed+ ke mme ubon nditọ Kohath, kpukpru mbon oro ẹnamde utom ke tent usopidem, emi Moses ye Aaron ẹkesịnde enyịn̄ nte Jehovah akadade Moses eteme.
38 Amaedi mbon oro ẹkesịnde enyịn̄ ke n̄wed ke otu nditọ Gershon+ ke mme ubon mmọ ye ke ufọk mme ete mmọ,
39 ọtọn̄ọde ke owo isua edịp ye duop esịm owo isua aba ye duop, kpukpru owo emi ẹdude ke otu emi esinamde utom ke tent usopidem,+
40 mbon oro ẹkesịnde enyịn̄ ke n̄wed ke otu mmọ, ke mme ubon mmọ, ke ufọk mme ete mmọ, ẹkedi owo tọsịn iba ikie itiokiet ye edịp ye duop.+
41 Mmọ emi ẹkedi mbon oro ẹkesịnde enyịn̄ ke n̄wed ke mme ubon nditọ Gershon, kpukpru mbon oro ẹnamde utom ke tent usopidem, emi Moses ye Aaron ẹkesịnde enyịn̄ ke n̄wed nte Jehovah eketemede.+
42 Amaedi mbon oro ẹkesịnde enyịn̄ ke n̄wed ke mme ubon nditọ Merari ke ubon mmọ ye ke ufọk mme ete mmọ,
43 ọtọn̄ọde ke owo isua edịp ye duop esịm owo isua aba ye duop, kpukpru owo emi ẹdude ke otu emi esinamde utom ke tent usopidem,+
44 mbon oro ẹkesịnde enyịn̄ ke n̄wed ke otu mmọ, ke mme ubon mmọ, ẹkedi owo tọsịn ita ikie iba.+
45 Mmọ emi ẹkedi mbon oro ẹkesịnde enyịn̄ ke n̄wed ke mme ubon nditọ Merari, emi Moses ye Aaron ẹkesịnde nte Jehovah akadade Moses eteme.+
46 Kpukpru mbon oro Moses ye Aaron ye mbọn̄ Israel ẹkesịnde enyịn̄ ke n̄wed nte nditọ Levi ke mme ubon mmọ ye ke ufọk mme ete mmọ,
47 ọtọn̄ọde ke owo isua edịp ye duop esịm owo isua aba ye duop,+ kpukpru mbon oro ẹdide ndinam ọkpọsọn̄ utom ye utom ubiom mbiomo ke tent usopidem,+
48 mbon oro ẹkesịnde enyịn̄ ke n̄wed ke otu mmọ ẹkedi owo tọsịn itiaita, ikie ition ye anan̄.+
49 Ke uyo Jehovah ke Moses ekesịn mmọ enyịn̄ ke n̄wed, owo kiet kiet nte utom esie ye mbiomo esie ẹdide; ndien ẹkesịn mmọ enyịn̄ kpa nte Jehovah eketemede Moses.+
