Numbers 5;1-31
5 Ndien Jehovah ọdọhọ Moses ete:
2 “Dọhọ nditọ Israel ete mmọ ẹsion̄o kpukpru mbon akpamfia+ ye kpukpru owo eke n̄kpọ ọwọrọde+ mmọ ke idem ye kpukpru owo emi ẹdehede koro ẹketụkde ukpọn̄ eke akpade.+
3 Mbufo ẹsion̄o mmọ, edide eren m̀mê n̄wan. Mbufo ẹnam mmọ ẹwọrọ ẹka edem itienna,+ mbak mmọ ẹdisabade+ nna mbon oro ami ndụn̄de ke otu mmọ.”+
4 Ndien nditọ Israel ẹnam ntre, ẹnyụn̄ ẹnam mmọ ẹwọrọ ẹka edem itienna. Kpa nte Jehovah ọkọdọhọde Moses, ntre ke nditọ Israel ẹnam.
5 Ndien Jehovah ọdọhọ Moses ete:
6 “Dọhọ nditọ Israel ete, ‘Edieke eren m̀mê n̄wan anamde ekededi ke otu kpukpru idiọkn̄kpọ emi owo esinamde mînyụn̄ inamke akpanikọ inọ Jehovah, ukpọn̄ oro enyene ubiomikpe.+
7 Ndien mmọ ẹnyene ndiyarade+ idiọkn̄kpọ oro mmọ ẹkenamde, enye onyụn̄ enyene ndinọ isop eke ekemde ke ndudue esie, onyụn̄ adian mbahade kiet ke itie ition,+ ndien ada ọnọ owo emi enye ekeduede.
8 Edi edieke owo emi enye ekeduede mînyeneke n̄kpet n̄kpet iman emi enye ọkpọnọde isop ke idiọkn̄kpọ oro, isop oro ẹmende ẹsọk Jehovah edinyene oku, ke mîbọhọke okukịm erọn̄ usio-isop emi oku edidade osio isop ọnọ enye.+
9 “‘Ndien kpukpru ndisana n̄kpọ+ emi nditọ Israel ẹnọde nte etịbe,+ emi mmọ ẹdidade ẹsọk oku, ẹdinyene oku.+
10 Ndien ndisana n̄kpọ owo kiet kiet ẹdinyene oku. Se ededi emi owo kiet kiet ọnọde oku, edinyene oku.’”
11 Ndien Jehovah ọdọhọ Moses ete:
12 “Dọhọ nditọ Israel ete, ‘Edieke n̄wan awahade ọkpọn̄ usụn̄ mînyụn̄ inamke akpanikọ inọ ebe esie,+
13 ndien eren en̄wen adan̄ ye enye, nsene+ onyụn̄ ọwọrọ, ebe esie inyụn̄ ifiọkke,+ n̄kpọ emi onyụn̄ edịbe, enye onyụn̄ asabade idem edi ntiense idụhe, owo inyụn̄ imụmke enye;
14 ndien spirit ufụp+ odụk ebe esie idem, enye onyụn̄ ekere ke n̄wan imọ inamke akpanikọ, ndien edi akpanikọ nte ke n̄wan emi ama asabade idem, mîdịghe spirit ufụp odụk ebe idem, enye onyụn̄ ekere ke n̄wan imọ inamke akpanikọ, edi n̄wan isabakede idem;
15 owo oro ndien enyene ndida n̄wan esie n̄ka iso oku+ nnyụn̄ nda uwa n̄wan oro nsan̄a ye enye n̄ka, odomo barley ephah kiet onyụn̄ ada mbahade kiet ke itie duop edi. Enye inyeneke nditọhọ aran nsịn inyụn̄ inyeneke ndidian frankincense+ ke esịt, koro enye edide uwa n̄kpasịp ufụp, kpa uwa n̄kpasịp editi emi anamde ẹti ndudue.
16 “‘Ndien oku enyene ndida n̄wan oro ndi ke iso Jehovah.+
17 Ndien oku ayada edisana mmọn̄ ke esombat, oku oyonyụn̄ owobi ntan isọn̄ tent utuakibuot esịn ke mmọn̄ oro.
18 Ndien oku enyene ndinam n̄wan oro ada ke iso Jehovah onyụn̄ atat n̄wan oro idet ibuot onyụn̄ ada uwa n̄kpasịp editi, oro edi, uwa n̄kpasịp ufụp,+ esịn enye ke ekaubọk, ndien oku enyene ndikama ndotndot mmọn̄ isụn̄i ke ubọk.+
19 “‘Ndien oku enyene ndinam n̄wan oro ọn̄wọn̄ọ, onyụn̄ ọdọhọ n̄wan oro ete: “Edieke edide erenowo en̄wen idan̄ke fi, afo unyụn̄ usabakede idem ke adan̄aemi odude ke idak uberi,+ yak ndotndot mmọn̄ isụn̄i emi okûnam fi n̄kpọ.
20 Edi edieke edide afo ama awaha ọkpọn̄ usụn̄ ke adan̄aemi odude ke idak uberi+ onyụn̄ asabade idem, ndien erenowo en̄wen, ke mîbọhọke uberi, ọdọn̄ fi nsene+ ke idem,—”
21 Oku ndien ayanam n̄wan oro ada un̄wọn̄ọ isụn̄i,+ onyụn̄ ọdọhọ n̄wan oro ete: “Yak Jehovah anam fi edi n̄kpọ isụn̄i ye se ẹdade ẹn̄wọn̄ọ n̄kpọ ke otu mbio obio fo ke Jehovah ndinam ifụhi+ eyemede fi nnyụn̄ nnam idịbi ofụt fi.
22 Ndien mmọn̄ isụn̄i emi eyebe odụk fi nsia man anam idịbi ofụt fi onyụn̄ anam ifụhi eyemede fi.” Ndien n̄wan oro enyene ndidọhọ ete: “Amen! Amen!”
23 “‘Ndien oku enyene ndiwet mme ikọ isụn̄i emi ke n̄wed+ nnyụn̄ nsọhi+ mmọ ndọn̄ ke ndotndot mmọn̄ oro.
24 Ndien enye enyene ndinam n̄wan oro ọn̄wọn̄ ndotndot mmọn̄ isụn̄i+ oro, ndien mmọn̄ isụn̄i oro oyodụk enye idịbi onyụn̄ odoro.
25 Ndien oku enyene ndibọ n̄wan oro uwa n̄kpasịp+ ufụp ke ubọk onyụn̄ ofụn̄ uwa n̄kpasịp oro aka iso afiak edem ke iso Jehovah onyụn̄ ada enye asan̄a ekpere itieuwa.
26 Ndien oku enyene ndiwobi uwa n̄kpasịp oro nte n̄kpọ editi+ nnyụn̄ mfọp enye ke itieuwa, ndien ekem anam n̄wan oro ọn̄wọn̄ mmọn̄ oro.
27 Ke enye ama akanam n̄wan oro ọn̄wọn̄ mmọn̄ oro, edieke n̄wan oro akasabarede idem, mînyụn̄ inamke akpanikọ inọ ebe esie,+ mmọn̄ isụn̄i oro oyodụk enye idịbi onyụn̄ odoro, ndien idịbi oyofụt enye, ifụhi oyonyụn̄ eyemede enye, ndien n̄wan oro ayakabade edi n̄kpọ isụn̄i ke otu mbio obio esie.+
28 Edi edieke n̄wan oro mîkasabakede idem edi asanade, n̄kpọ idinamke enye;+ ndien nsene ayanam enye oyomo.
29 “‘Emi edi ibet emi aban̄ade ufụp,+ ke ini n̄wan awahade ọkpọn̄ usụn̄+ ke adan̄aemi odude ke idak ebe esie,+ onyụn̄ asabarede idem,
30 m̀mê ke ini spirit ufụp odụkde owo idem, enye onyụn̄ ekerede ke n̄wan imọ inamke akpanikọ; enye enyene ndinam n̄wan esie ada ke iso Jehovah, oku onyụn̄ enyene ndinam ofụri ewụhọ emi ye enye.
31 Ndien ebe idinyeneke ndudue, edi n̄wan oro ọyọbọ ufen ndudue esie.’”
