Philippi 4;1-23
4 Mmọdo, nditọete mi emi mmade onyụn̄ ọdọn̄de mi ndikụt, kpa idatesịt ye anyanya mi,+ ẹsọn̄ọ ẹda+ ntem ke Ọbọn̄, ndima mi.
2 Mmọnọ Euodia item, mmonyụn̄ nnọ Syntyche item nte ẹnyene ekikere+ kiet ke Ọbọn̄.
3 Ih, mmeben̄e fi n̄ko, ata nsan̄autom mi, nte aka iso an̄wam iban emi ẹkesan̄ade ye ami+ ẹn̄wana ẹban̄a eti mbụk ọkọrọ ye Clement ye mme nsan̄autom+ mi eken, emi enyịn̄+ mmọ ẹdude ke n̄wed uwem.+
4 Ẹdat esịt ke Ọbọn̄ kpukpru ini.+ Nyọtọn̄ọ ntak ndọhọ, Ẹdat esịt!+
5 Ẹyak kpukpru owo ẹkụt eti ibuot+ mbufo. Ọbọn̄ emekpere.+
6 Ẹkûtịmede esịt ke baba n̄kpọ kiet,+ edi ke kpukpru n̄kpọ ẹda akam ye n̄kpeubọk+ ọkọrọ ye ekọm ẹben̄e Abasi se mbufo ẹyomde;+
7 ndien emem+ Abasi emi akande kpukpru ekikere eyekpeme mbufo esịt+ ye ekikere ke Christ Jesus.
8 Ke akpatre, nditọete, n̄kpọ ekededi eke edide akpanikọ, n̄kpọ ekededi eke odotde ẹtịm ẹkere, n̄kpọ ekededi eke enende, n̄kpọ ekededi eke asanade,+ n̄kpọ ekededi eke ẹmade, n̄kpọ ekededi eke ọwọrọde eti etop, n̄kpọ ekededi eke esịnede eti ido ye n̄kpọ ekededi eke odotde itoro, ẹka iso ẹkere mme n̄kpọ emi.+
9 Mme n̄kpọ emi mbufo ẹkekpepde ẹnyụn̄ ẹnyịmede ẹnyụn̄ ẹkopde ẹnyụn̄ ẹkụtde nte ami nnamde, ẹnam mme n̄kpọ emi;+ ndien Abasi emem+ oyodu ye mbufo.
10 Mmadat esịt etieti ke Ọbọn̄ nte ke akpatre mbufo ẹmefiak ẹtọn̄ọ ndikere mban̄a mi,+ ndien mbufo ẹma ẹkekere ndinam emi, edi mbufo ikenyeneke ifet.
11 Ntịn̄ke koro nnanade n̄kpọ, koro mmekpep ndiyụhọ ye se nnyenede ke idaha ekededi oro ami ndude.+
12 Ke akpanikọ mmọfiọk ndinyene esisịt+ mmonyụn̄ mfiọk ndinyene uwak uwak. Ke kpukpru n̄kpọ ye ke kpukpru idaha mmọfiọk ndidia nyụhọ ndinyụn̄ ntie biọn̄, ndinyene uwak uwak ndinyụn̄ ndu ke unana.+
13 Mmenyene ukeme ndinam kpukpru n̄kpọ ebe ke enye emi ọnọde mi odudu.+
14 Edi, mbufo ẹma ẹnam ọfọn nditiene mbuana+ ke mme ukụt mi.+
15 Ke akpanikọ, mbufo mbon Philippi ẹmefiọk n̄ko ẹte ke ini n̄kọtọn̄ọde nditan̄a eti mbụk, ke ini n̄kọkpọn̄de Macedonia, ndomo esop kiet ikabuanake n̄kpọ ye ami ke edinọ ye edibọ mi n̄kpọ, ke mîbọhọke mbufo ikpọn̄;+
16 koro, idem ke Thessalonica, mbufo ẹma ẹnọ se nnanade ẹsọk mi utịm ikaba.
17 Idịghe nte ke nnen̄ede nyom enọ,+ edi nnen̄ede nyom mbufo ẹn̄wụm mfri+ oro edidorode mbufo ediwak udori.
18 Nte ededi, mmenyene kpukpru n̄kpọ oro nyomde uwak uwak. Mmoyụhọ ke emi mma n̄kọbọ Epaphroditus+ mme n̄kpọ emi mbufo ẹkenọde ẹsọk mi, edinem utebe,+ uwa emi ẹnyịmede,+ emi etịmde enem Abasi esịt.
19 Ke n̄kan̄ eken, Abasi mi+ ọyọnọ kpukpru se inanade+ mbufo ọyọhọ ọyọhọ ke udomo oro ekemde ye akwa ubọn̄ inyene+ esie ebe ke Christ Jesus.
20 Ubọn̄ enyene Abasi ye Ete nnyịn ke nsinsi nsinsi.+ Amen.
21 Ẹkọm+ kpukpru ndisana owo eke ẹdude+ ke Christ Jesus. Nditọete emi ẹdude ye ami ẹte n̄kọm mbufo.
22 Kpukpru ndisana owo, akpan akpan mbonufọk Caesar, ẹte n̄kọm mbufo.+
23 Mfọnido Ọbọn̄ Jesus Christ oro owo mîdotke akpakam odu ye edu emi mbufo ẹwụtde.+
