Rome 15;1-33
15 Edi nnyịn emi isọn̄de idem ikpobiom mmemidem mbon oro mîsọn̄ke idem,+ ikponyụn̄ inemke idem nnyịn esịt.+
2 Yak owo nnyịn kiet kiet enem mbọhọidụn̄ esie esịt ke ndida se ifọnde mbọp enye nnam ọkọri.+
3 Koro Christ ikenemke idemesie esịt;+ edi kpa nte ẹwetde ẹte: “Esuene mmọ eke ẹsuenede fi omodoro mi ke idem.”+
4 Koro kpukpru n̄kpọ oro ẹkewetde ke ini edem,+ ẹkewet mmọ ndida nteme+ nnyịn, man ikpenyene idotenyịn oto ke nnyịn ndiyọ+ nnyụn̄ mbọ ndọn̄esịt+ oro N̄wed Abasi ọnọde.+
5 Edi Abasi emi anamde nnyịn iyọ inyụn̄ ikop ndọn̄esịt akpakam anam kpukpru mbufo ẹnyene ukem edu ukere n̄kpọ+ Christ Jesus,
6 man mbufo ẹkpeda esịt kiet+ ye inua kiet ẹnọ Abasi ye Ete Ọbọn̄ nnyịn Jesus Christ ubọn̄.
7 Mmọdo ẹdara kiet eken,+ kpa nte Christ n̄ko akadarade nnyịn,+ man ubọn̄ ekpenyene Abasi.
8 Koro ndọhọ nte ke Christ ama akabade edi asan̄autom+ ọnọ mbon oro ẹnade mbobi+ kaban̄a akpanikọ Abasi,+ man ọkpọsọn̄ọ mme un̄wọn̄ọ+ oro Abasi akanamde ọnọ mme ete ete mmọ,
9 n̄ko man mme idụt+ ẹkpenọ Abasi ubọn̄ ẹban̄a mbọm esie.+ Kpa nte ẹwetde ẹte: “Ntak edi oro ami nditorode* fi an̄wan̄wa ke otu mme idụt ndinyụn̄ n̄kwọde edinem ikwọ nnọ enyịn̄ fo.”+
10 Enye afiak ọdọhọ ete: “Mbufo mme idụt, ẹtiene ikọt esie ẹdat esịt.”+
11 Afiak ọdọhọ: “Mbufo kpukpru mme idụt, ẹtoro Jehovah, ẹnyụn̄ ẹyak kpukpru owo ẹtoro enye.”+
12 Isaiah afiak ọdọhọ ete: “Orụn̄ Jesse+ oyodu, owo oyonyụn̄ adaha ada ndikara mme idụt;+ mme idụt ẹyekọn̄ idotenyịn mmọ ke enye.”+
13 Abasi emi ọnọde idotenyịn akpakam anam mbufo ẹyọhọ ye idatesịt ye emem oto ke mbufo ndinịm ke akpanikọ, man mbufo ẹkpeyọhọ ye idotenyịn oto ke odudu edisana spirit.+
14 Edi ami n̄ko mmenịm ke akpanikọ, nditọete mi, nte ke mbufo ẹmeyọhọ n̄ko ye eti ido, kpa nte mbufo ẹyọhọde ye kpukpru ifiọk,+ ye nte ke mbufo ẹmekeme n̄ko ndinọ kiet eken item.+
15 Nte ededi, n̄wet mbufo ata in̄wan̄-in̄wan̄ mban̄a ndusụk n̄kpọ, nte n̄kpọ eke mfiakde nti+ mbufo, ke ntak mfọnido oro owo mîdotke emi Abasi ọkọnọde mi+
16 man ami n̄kpedi asan̄autom Christ Jesus nnọ mme idụt,+ emi nnamde edisana utom eti mbụk+ Abasi, man ẹda mme idụt emi ẹnọ Abasi nte uwa+ emi enye enyịmede ndibọ,+ emi edisana spirit anamde asana.+
17 Ke ntre mmenyene ntak ndidara ke Christ Jesus+ ke mme n̄kpọ emi ẹban̄ade Abasi.+
18 Koro ndidehedei ntịn̄ n̄kpọ ndomokiet ibọhọke mme n̄kpọ oro Christ akadade mi anam+ man mme idụt ẹkpekop item,+ oto ke ikọ+ ye utom mi,
19 oto ke odudu idiọn̄ọ ye mme utịben̄kpọ,+ ye ke odudu edisana spirit; ntre mma ntọn̄ọ ke Jerusalem n̄kwọrọ eti mbụk emi aban̄ade Christ ọyọhọ ọyọhọ tutu n̄kanade n̄kesịm Illyricum.+
20 Ke usụn̄ emi, n̄kaduakke nditan̄a eti mbụk ke ebiet emi ẹma ẹkekokot enyịn̄ Christ, mbak ndibọp ndori ke itiat idakisọn̄ owo en̄wen;+
21 edi, kpa nte ẹwetde ẹte: “Mmọ oro owo mîkọtọtke iban̄a enye ẹyekụt enye, ndien mmọ oro mîkokopke ẹyefiọk.”+
22 Mmọdo ẹma ẹbiọn̄ọ mi n̄ko ediwak ini ndidi ke ọtọ mbufo.+
23 Edi ke emi mmenyeneke aba efakutom eke owo mînamke utom ke ikpehe emi, sia onyụn̄ enen̄erede ọdọn̄ mi ke ndusụk isua idahaemi ndidi ke ọtọ mbufo+
24 ini ekededi eke ndibede n̄ka Spain,+ mmodori enyịn ndiwaha ndise mbufo, mbufo ẹyenyụn̄ ẹda mi ẹkeyak+ ke usụn̄ ke mma n̄kebem iso n̄kop inemesịt ndidu ke otu mbufo.
25 Edi ke emi mmọn̄ ndika Jerusalem man n̄kasan̄a utom nnọ ndisana owo.+
26 Koro mbon oro ẹdude ke Macedonia ye Achaia+ ẹmenem esịt ndibuana se mmọ ẹnyenede ebe ke nditịp n̄kpọ+ nnọ mme ubuene emi ẹdude ke otu ndisana owo ke Jerusalem.
27 Ke akpanikọ, mmọ ẹmenem esịt ndinam ntre, edi mmọ ẹmekama mmọ isọn; koro edieke mme idụt ẹketienede ẹbuana ke mme n̄kpọ eke spirit mmọ,+ obiomo mmọ n̄ko ndida mme n̄kpọ obụkidem nsan̄a utom nnọ mmọ.+
28 Ntem ke mma n̄kokụre ye emi nnyụn̄ nda mfri+ emi nsọk mmọ ke ifụre, nyọkpọn̄ mbufo n̄ka Spain.+
29 Akan oro, mmọfiọk nte ke ini ndidide ke ọtọ mbufo nyasan̄a ye edidiọn̄ Christ ke ọyọhọ udomo ndi.+
30 Edi mmada enyịn̄ Ọbọn̄ nnyịn Jesus Christ ye ima spirit+ n̄kpe mbufo ubọk, nditọete, nte, mbufo ẹtiene mi ẹsịn idem ẹbọn̄ akam ẹnọ Abasi ẹban̄a mi,+
31 man ẹkpenyan̄a mi ẹsio+ ke ubọk mbon emi mînịmke ke akpanikọ ke Judea, man utom mi emi nnamde ke Jerusalem+ ekpenem ndisana owo esịt,+
32 man edieke Abasi enyịmede, ke ini ndide ke ọtọ mbufo ye idatesịt, n̄kpetiene mbufo mbọ nduọkodudu.+
33 Abasi emi ọnọde emem akpakam odu ye kpukpru mbufo.+ Amen.
Mme Ikọ Idakisọn̄
^ M̀mê, “ndinyịmede.”
