Rome 3;1-31
3 Nso, ndien, ke mme Jew ẹda ẹfọn ẹkan,+ nso inyụn̄ idi ufọn edina mbobi?+
2 Ẹfọn ẹkan ke kpukpru usụn̄. Akpa kan̄a, koro ẹkeyak edisana ikọ Abasi ẹsịn mmọ ke ubọk.+
3 Ọwọrọ nso, ndien? Edieke ndusụk owo mîkenyeneke mbuọtidem,+ ndi unana mbuọtidem mmọ ayanam akpanikọ+ Abasi okpu?+
4 Baba-o! Yak Abasi edi akpanikọ,+ kpukpru owo ẹkpededi mme osu nsu,+ kpa nte ẹwetde ẹte: “Man afo ekpenen ke ikọ fo, okponyụn̄ akan ke ini ẹkpede ikpe fo.”+
5 Nte ededi, edieke ukwan̄ido nnyịn ayararede edinen ido Abasi+ owụt, nso ke ididọhọ? Nte Abasi ọdiọk+ ndinam ke ini enye owụtde iyatesịt esie? (Ntịn̄ nte owo+ etịn̄ ikọ.)
6 Baba-o! Edieke ekpedide ntre, didie ndien ke Abasi edikpe ikpe ọnọ ererimbot?+
7 Edi edieke otode ke ntak nsu mi ẹnam akpanikọ Abasi+ ọwọrọ ada ọnọ enye ubọn̄, nso idi ntak ndien eke ẹkpede ikpe ẹnọ mi nte anamidiọk?+
8 Ndien ntak emi owo mîdọhọke, kpa nte ndusụk owo ẹdoride nnyịn ikọ,+ ẹte nnyịn idọhọ ite: “Ẹyak nnyịn inam idiọkn̄kpọ man nti n̄kpọ ẹkpeto do ẹwọrọ”?+ Ubiomikpe+ oro ẹnọde mbon oro ekem ye unenikpe.+
9 Nso ndien? Nte itie nnyịn ọfọfọn akan?+ Baba-o! Koro nnyịn ima ibem iso idori mme Jew ye mme Greek* ikọ ite ke kpukpru mmọ ẹdu ke idak idiọkn̄kpọ;+
10 kpa nte ẹwetde ẹte: “Baba edinen owo kiet idụhe, baba kiet idụhe;+
11 idụhe owo eke enyenede ikike, idụhe owo eke oyomde Abasi.+
12 Kpukpru owo ẹmewaha ẹkpọn̄ usụn̄, kpukpru mmọ inyeneke ufọn; idụhe owo eke ọfọnde ido, baba owo kiet idụhe.”+
13 “Usụn̄itọn̄ mmọ edi ana-in̄wan̄ udi, mmọ ẹda edeme mmọ ẹbian̄a abian̄a.”+ “Ifọt ibọm odu mmọ ke n̄kpọkinua.”+
14 “Inua mmọ ẹnyụn̄ ẹyọhọ ye isụn̄i ye ndotndot ikọ.”+
15 “Ikpat mmọ ẹsọp ẹka ndiduọk iyịp.”+
16 “Nsobo ye nditaha ẹdu ke usụn̄ mmọ,+
17 ndien mmọ ifiọkke usụn̄ emem.”+
18 “Ndịk Abasi idụhe mmọ ke enyịn.”+
19 Edi nnyịn imọfiọk ite kpukpru n̄kpọ oro Ibet+ etịn̄de, ke etịn̄ ọnọ mbon oro ẹdude ke idak Ibet, man inua okpokụbọ+ kpukpru owo, ofụri ererimbot okponyụn̄ odot+ ndibọ ufen ke iso Abasi.+
20 Ke ntre owo idibatke baba owo kiet ke edinen+ ke iso esie ke ntak utom ibet, koro edi ibet+ anam nnyịn inyene nnennen ifiọk iban̄a idiọkn̄kpọ.+
21 Edi ke emi ẹyarade nte ke edinen idaha ke iso Abasi+ itoho ke edinịm ibet, nte Ibet+ ye mme Prọfet+ ẹtiede ntiense ẹban̄a;+
22 ih, ẹkeme ndinyene edinen idaha ke iso Abasi oto ke edibuọt idem ye Jesus Christ,+ emi edi ntem ọnọ kpukpru mbon oro ẹnyenede mbuọtidem.+ Koro ubahade idụhe.+
23 Koro kpukpru owo ẹnam idiọkn̄kpọ+ ẹnyụn̄ ẹtaba ubọn̄ Abasi,+
24 ndien, edi ke mfọn*+ ke ẹbat mmọ ke edinen ke ntak mfọnido esie oro owo mîdotke+ ke edisio mmọ ke ufụn oto ke ufak+ oro Christ Jesus ekekpede.
25 Abasi okosio enye enịm nte uwa man mme owo ẹnam emem ye Abasi+ ebe ke mmọ ndibuọt idem ke uwa oro enye akawade ke ndiduọk iyịp esie.+ Emi ekedi man ẹwụt edinen ido esie, koro enye ama efen mme idiọkn̄kpọ+ emi ẹkenamde ke ini edem ke adan̄aemi Abasi ekemede ime;+
26 man enye okpowụt edinen ido+ esie ke ini emi, enye okponyụn̄ enen ke ini abatde owo eke enyenede mbuọtidem ke Jesus ke edinen.+
27 Enyenye mbụre?+ Ẹsio enye ẹfep. Oto ke ewe ibet?+ Ndi ke ntak utom?+ Baba, edi oto ke ibet mbuọtidem.+
28 Koro nnyịn ibat ite ke ẹda mbuọtidem ẹbat owo ke edinen, owo idaha utom ibet.+
29 Mîdịghe nte enye edi Abasi mme Jew ikpọn̄?+ Nte enye idịghe eke mbon idụt n̄ko?+ Ih, edi eke mbon idụt n̄ko,+
30 sia Abasi edide kiet+ emi edibatde mbon oro ẹnade mbobi+ ke edinen ke ntak mbuọtidem ye mbon oro mînaha mbobi+ ke edinen oto ke mbuọtidem mmọ.
31 Ndi nnyịn, ndien, imada mbuọtidem nnyịn ibiat ibet ifep?+ Baba-o! Utu ke oro, nnyịn isọsọn̄ọ ibet.+
Mme Ikọ Idakisọn̄
^ Eyedi emi aban̄a mbon oro ẹkesemde usem Greek, kpa mbon emi mîkedịghe mme Jew.
^ M̀mê, “enọ mfọn.”
