Rome 6;1-23
6 Mmọdo, nso ke nnyịn ididọhọ? Nte nnyịn ikpaka iso ke idiọkn̄kpọ, man mfọnido oro owo mîdotke akpawak?+
2 N̄wan̄ansa-o! Sia nnyịn ima ikakpan̄a iwọn̄ọ ikpọn̄ idiọkn̄kpọ,+ nnyịn ikpasan̄a didie ika iso idu uwem ke enye?+
3 M̀mê nte mbufo ifiọkke ite ke kpukpru nnyịn emi ikanade baptism idụk ke Christ Jesus+ ikana baptism idụk ke n̄kpa esie?+
4 Ke ntre nnyịn ikobụhọ+ ye enye ebe ke baptism oro ikanade idụk ke n̄kpa esie, man, kpa nte ẹkedade ubọn̄ Ete ẹnam Christ eset ke n̄kpa,+ nnyịn n̄ko ikpodu obufa uwem kpasụk ntre.+
5 Koro edieke nnyịn idianade kiet ye enye ke se ibietde n̄kpa esie,+ ke akpanikọ nnyịn iyadiana n̄ko ye enye ke se ibietde ediset ke n̄kpa esie;+
6 koro nnyịn imọfiọk ite ke ẹma ẹkọn̄ akani owo emi nnyịn ikedide ẹdian ye enye ke eto,+ man ikpọkidem idiọkn̄kpọ nnyịn okûnyene odudu aba,+ man nnyịn ikûka iso idi ifịn inọ idiọkn̄kpọ.+
7 Koro ikpe idiọkn̄kpọ etebe owo emi ama akakpa.+
8 Akan oro, edieke nnyịn ikpade ye Christ, nnyịn imenịm ke akpanikọ ite ke nnyịn n̄ko iyodu uwem ye enye.+
9 Koro nnyịn imọfiọk ite ke Christ ikpaha aba,+ ke emi ẹma ẹkenam enye eset ke n̄kpa;+ n̄kpa inyụn̄ ikarake enye aba.
10 Koro n̄kpa emi enye akakpade, enye akakpa ini kiet kpọt aban̄a idiọkn̄kpọ;+ edi uwem emi enye odude, enye odu ọnọ Abasi.+
11 Kpasụk ntre n̄ko mbufo: ẹbat ẹte ke mmimọ ima ikpan̄a+ kaban̄a idiọkn̄kpọ edi idu uwem+ inọ Abasi oto ke Christ Jesus.
12 Ke ntre, ẹkûyak idiọkn̄kpọ aka iso akara nte edidem+ ke ikpọkidem mbufo emi ẹdikpade mbak mbufo ẹdisụk ibuot ẹnọ mme udọn̄ esie.+
13 Ẹkûnyụn̄ ẹka iso ẹyak ndido idem mbufo ẹnọ idiọkn̄kpọ+ nte n̄kpọekọn̄ ukwan̄ido,+ edi ẹyak idem mbufo ẹnọ Abasi nte mmọ oro ẹtode ke n̄kpa ẹdidu uwem,+ ẹyak mme ndido idem mbufo ẹnọ Abasi n̄ko nte n̄kpọekọn̄+ edinen ido.
14 Koro inaha idiọkn̄kpọ akara mbufo, sia mbufo mîdụhe ke idak ibet+ edi ẹdude ke idak mfọnido oro owo mîdotke.+
15 Nso ndien ke ididọhọ? Nte nnyịn ikpenyene ndinam idiọkn̄kpọ sia nnyịn mîdụhe ke idak ibet+ edi idude ke idak mfọnido oro owo mîdotke?+ N̄wan̄ansa-o!
16 Nte mbufo ifiọkke ite ke edieke mbufo ẹkade iso ndiyak idem mbufo nnọ owo ekededi nte ifịn man ẹkop uyo ẹnọ enye, mbufo ẹdi ifịn esie sia mbufo ẹkopde uyo ẹnọ enye,+ edide eke idiọkn̄kpọ+ emi edisụn̄ọde ke n̄kpa+ m̀mê eke n̄kopuyo+ emi edisụn̄ọde ke edinen ido?+
17 Edi ekọm enyene Abasi koro mbufo ẹkedide ifịn idiọkn̄kpọ edi ẹmekabade ẹkop item ke ofụri esịt ẹnọ orụk ukpepn̄kpọ oro ẹkeyakde mbufo ẹnọ.+
18 Ih, sia ẹma ẹkenam mbufo ẹbọhọ+ idiọkn̄kpọ, mbufo ẹma ẹkabade ẹdi ifịn+ edinen ido.+
19 Ntịn̄ nte owo ke ntak mmeme obụkidem mbufo:+ koro kpa nte mbufo ẹkeyakde ndido idem+ mbufo ẹnọ nte ifịn mbubiam ido+ ye ubiatibet emi osụn̄ọde ke ubiatibet, ntre ẹyak ndido idem mbufo ke emi ẹnọ nte ifịn edinen ido emi edisụn̄ọde ke edisana idaha.+
20 Koro ke ini mbufo ẹkedide ifịn idiọkn̄kpọ,+ mbufo ikodụkke ufụn inọ edinen ido.
21 Nso, ndien, ekedi mfri+ oro mbufo ẹken̄wụmde adan̄aoro? Kpa mme n̄kpọ+ oro ẹnamde mbufo ẹkop bụt ke emi. Koro utịt mme n̄kpọ oro edide n̄kpa.+
22 Edi, ke emi, sia ẹma ẹkenam mbufo ẹwọrọ ufụn idiọkn̄kpọ ẹnyụn̄ ẹkabade ẹdi ifịn Abasi,+ mbufo ẹmen̄wụm mfri+ mbufo ke usụn̄ edisana ido, ndien utịt edi nsinsi uwem.+
23 Koro n̄kpọ eyenutom idiọkn̄kpọ edi n̄kpa,+ edi enọ+ oro Abasi ọnọde edi nsinsi uwem+ ke Christ Jesus Ọbọn̄ nnyịn.+
