Rome 8;1-39
8 Ke ntre mbon oro ẹbuanade n̄kpọ ye Christ Jesus inyeneke ubiomikpe.+
2 Koro ibet+ eke spirit+ emi ọnọde uwem+ ke Christ Jesus ama anam fi ọbọhọ+ ibet idiọkn̄kpọ ye n̄kpa.+
3 Se Ibet mîkekemeke ndinam,+ sia enye ememde+ ke obụkidem, Abasi ama anam, ebe ke ndisio Eyen+ esie ndọn̄ edi ke mbiet obụkidem idiọkn̄kpọ+ man emen idiọkn̄kpọ efep,+ ke ntem obiomde idiọkn̄kpọ ikpe ke obụkidem,
4 man nnyịn, emi mîsan̄ake ke obụkidem, edi isan̄ade ke spirit,+ ikpanam edinen n̄kpọ oro Ibet oyomde+ ọyọhọ ọyọhọ.
5 Koro mmọ eke ẹsan̄ade ke obụkidem ẹwụk ekikere mmọ ke mme n̄kpọ obụkidem,+ edi mmọ eke ẹsan̄ade ke spirit ẹwụk ekikere ke mme n̄kpọ spirit.+
6 Koro edikere n̄kpọ obụkidem ọwọrọ n̄kpa,+ edi edikere n̄kpọ spirit+ ọwọrọ uwem ye emem;
7 koro edikere n̄kpọ obụkidem ọwọrọ edidi asua+ ye Abasi, koro obụkidem mîsụkke ibuot+ inọ ibet Abasi, inyụn̄ ikemeke-keme ndisụk ibuot.
8 Ntre mmọ eke ẹsan̄ade ke obụkidem+ ikemeke ndinem Abasi esịt.
9 Mbufo isan̄ake ke obụkidem, edi ẹsan̄a ke spirit,+ edieke spirit Abasi odụn̄de mbufo ke idem.+ Edi edieke owo ekededi mînyeneke spirit Christ,+ enye idịghe owo esie.
10 Ndien edieke Christ abuanade n̄kpọ ye mbufo,+ ikpọkidem amakpa ke ntak idiọkn̄kpọ, edi spirit ọnọ uwem+ ke ntak edinen ido.
11 Edieke spirit owo emi akanamde Jesus eset ke n̄kpa odụn̄de mbufo ke idem, enye emi akanamde Christ Jesus eset ke n̄kpa+ ayanam ikpọkidem mbufo emi ekemede ndikpa odu uwem+ ebe ke spirit esie oro odụn̄de mbufo ke idem.
12 Ntre, ndien, nditọete, owo inyịkke-nyịk nnyịn ndisan̄a ke obụkidem nnyụn̄ nnam se idọn̄de obụkidem;+
13 koro edieke mbufo ẹsan̄ade ke obụkidem mbufo iditreke ndikpa;+ edi edieke ẹdade spirit ẹwot mme edinam ikpọkidem,+ mbufo ẹyedu uwem.
14 Koro kpukpru mbon oro spirit Abasi adade usụn̄ ẹdi nditọ Abasi.+
15 Koro mbufo ikọbọhọ spirit ufụn oro anamde ẹfiak ẹkop ndịk,+ edi mbufo ẹkebọ spirit+ emi anamde ẹda nnyịn ẹnyene+ nte nditọ, onyụn̄ oto ke spirit emi nnyịn ifiori ite: “Abba,+ Ete!”
16 Spirit Abasi+ etiene spirit nnyịn+ etie ntiense+ ete nnyịn idi nditọ Abasi.+
17 Ndien, edieke nnyịn idide nditọ, nnyịn n̄ko idi mme ada udeme nnyene: imenyene udeme oro Abasi ọnọde, imetiene Christ inyene udeme,+ ama akam edi nnyịn imetiene enye ikụt ndutụhọ,+ iyonyụn̄ ida ubọn̄ ye enye.+
18 Mmọdo mbat nte ke ndutụhọ+ oro odude ke emi idịghe n̄kpọ ndomokiet ke ẹmende ẹdomo ye ubọn̄+ oro ẹdiyararede ke idem nnyịn.
19 Koro mme n̄kpọ oro ẹbotde*+ ẹtiede ye ọkpọsọn̄ udọn̄+ ẹbet ini eke ẹdiyararede nditọ Abasi.+
20 Koro ẹkenam mme n̄kpọ oro ẹbotde ẹsụk idem ẹnọ ikpîkpu n̄kpọ,+ itoho ke uduak mmọ edi oto ke enye oro akanamde mmọ ẹsụk idem, edi ọnọde idotenyịn+
21 nte ke ẹyenam mme n̄kpọ oro ẹbotde+ ẹbọhọ ufụn+ itie mbiara ẹnyụn̄ ẹnyene ubọn̄ ubọn̄ ifụre nditọ Abasi.
22 Koro nnyịn imọfiọk ite ke kpukpru n̄kpọ oro ẹbotde ke ẹmụm mmụm ọtọkiet ẹnyụn̄ ẹdu ke ubiak ọtọkiet tutu esịm emi.
23 Ikụreke ke oro, edi nnyịn ke idem nnyịn n̄ko emi inyenede akpa mbun̄wụm,+ oro edi, spirit, ih, nnyịn ke idem nnyịn imụm mmụm+ ke esịt nnyịn, ke adan̄aemi nnyịn itiede ye ọkpọsọn̄ udọn̄ ibet ini eke ẹdidade nnyịn ẹnyene nte nditọ,+ kpa ini eke ẹdidade ufak ẹsio nnyịn ẹfep ke ikpọkidem nnyịn.
24 Koro ẹkenyan̄a nnyịn ye idotenyịn emi ke ekikere;+ edi edieke ẹkụtde se ẹkedoride enyịn, owo idorike enyịn aba, koro owo ekeme didie ndidori enyịn ke se enye okụtde?
25 Edi edieke nnyịn idoride enyịn+ ke se nnyịn mîkwe,+ nnyịn ika iso ibet enye ke ime.+
26 Ke ukem usụn̄ oro spirit+ n̄ko an̄wam ke mmemidem nnyịn;+ koro nnyịn imenyene mfịna edifiọk se ikpọbọn̄de akam iben̄e,+ edi spirit+ ke idemesie anam n̄kpeubọk ọnọ nnyịn ke mmụm oro nnyịn mîsioroke uyo.
27 Edi enye emi odụn̄ọrede esịt+ ọfiọk se ekikere spirit+ edide, koro enye anamde n̄kpeubọk ọnọ ndisana owo nte ekemde ye uduak Abasi.+
28 Edi nnyịn imọfiọk ite ke Abasi anam kpukpru utom esie+ ẹdiana kiet ẹnam ufọn ẹnọ mbon oro ẹmade Abasi, mmọ emi ẹkotde nte ekemde ye uduak esie;+
29 koro mbon oro enye ekebemde iso ọnọ ntịn̄enyịn,+ enye n̄ko ama ebem iso emek enịm+ ete ẹbiet+ Eyen imọ, man enye ekpedi akpan+ ke otu ediwak nditọete esie.+
30 Akan oro, mmọ oro enye ekebemde iso emek enịm+ ẹdi mbon oro enye n̄ko okokotde,+ ndien mmọ oro enye okokotde ẹdi mbon oro enye n̄ko akabatde ke edinen.+ Ke akpatre mmọ oro enye akabatde ke edinen ẹdi mbon oro enye n̄ko ọkọnọde ubọn̄.+
31 Nso, ndien, ke ididọhọ iban̄a mme n̄kpọ emi? Edieke Abasi adade ye nnyịn, anie edibiọn̄ọ nnyịn?+
32 Enye emi mîkemen̄eke ndinọ Eyen esie,+ edi ayakde enye ọnọ ke ibuot kpukpru nnyịn,+ ntak emi enye n̄ko ke mfọnido mîdinọhọ nnyịn kpukpru n̄kpọ eken idian ye enye?+
33 Anie edidori ndimek ikọt Abasi ikọ?+ Abasi edi enye emi abatde mmọ ke edinen.+
34 Anie edibiom mmọ ikpe? Christ Jesus ama akpa, ih, kpa enye emi ekesetde ke n̄kpa, emi odude ke ubọk nnasia+ Abasi, emi n̄ko anamde n̄kpeubọk ọnọ nnyịn.+
35 Anie edidian̄ade nnyịn ke ima Christ?+ Ndi ukụt edidian̄ade m̀mê nnanenyịn m̀mê ukọbọ m̀mê biọn̄ m̀mê iferi m̀mê n̄kpọndịk m̀mê akan̄kan̄?+
36 Kpa nte ẹwetde ẹte: “Ẹwot nnyịn ofụri usen ke ntak fo, ẹbat nnyịn nte erọn̄ eke ẹdade ẹka ndiwot.”+
37 Edi, ke kpukpru n̄kpọ emi nnyịn imakan+ ofụri ofụri oto ke enye emi akamade nnyịn.
38 Koro mmetịm mfiọk nte ke n̄kpa m̀mê uwem+ m̀mê mme angel+ m̀mê mme ukara+ m̀mê mme n̄kpọ eke ẹdude ke emi m̀mê mme n̄kpọ eke ẹdidide m̀mê mme odudu+
39 m̀mê uniọn̄ m̀mê utụn̄ọ m̀mê edibotn̄kpọ efen ekededi idikemeke ndidian̄ade nnyịn ke ima Abasi oro odude ke Christ Jesus Ọbọn̄ nnyịn.+
Mme Ikọ Idakisọn̄
^ Enen̄ede aban̄a mme owo.
