Ruth 1;1-22
1 Edikem akan̄+ odu ke isọn̄ ke eyo oro mme ebiereikpe+ ẹkekarade, ndien eren kiet asan̄a ye n̄wan esie ye nditọiren esie iba oto Bethlehem+ emi odude ke Judah okodụn̄ nte esenowo ke obio Moab.+
2 Ndien eren oro ekekere Elimelech, n̄wan esie okonyụn̄ ekere Naomi, ndien nditọiren esie iba ẹkere Mahlon ye Chilion, kpa mbon Ephrath+ emi ẹtode Bethlehem emi odude ke Judah. Ekem mmọ ẹdi ẹdidụn̄ ke obio Moab.
3 Nte ini akade, Elimelech ebe Naomi akpa ọkpọn̄ Naomi ye nditọiren esie iba.
4 Ekem, iren emi ẹdọ iban Moab.+ Kiet ekere Orpah, enye eken onyụn̄ ekere Ruth.+ Ndien mmọ ẹdụn̄ do ke n̄kpọ nte isua duop.
5 Ekem mmọ mbiba, Mahlon ye Chilion, ẹkpan̄a n̄ko, ndien n̄wan oro osụhọ ikpọn̄, anana nditọ esie mbiba ye ebe esie n̄ko.
6 Ndien enye asan̄a ye iban nditọ esie oto obio Moab ete inyọn̄, koro enye etiede ke obio Moab okop ke Jehovah ama ọwọn̄ọde ntịn̄enyịn esie ọnọ ikọt+ esie ke ndinọ mmọ udia.+
7 Ndien enye oto ke ebiet emi enye okodude+ asan̄a ye iban nditọ esie mbiba, ndien mmọ ẹsan̄a ke usụn̄ ẹte inyọn̄ ika isọn̄ Judah.
8 Ekem Naomi ọdọhọ iban nditọ esie mbiba ete: “Mbufo ẹnyọn̄ọ ufọk mme eka mbufo. Jehovah akpakam owụt mbufo ima-mfọnido,+ kpa nte mbufo ẹkewụtde mme ebe mbufo oro ẹkekpan̄ade ẹnyụn̄ ẹwụtde mi n̄ko.+
9 Jehovah akpakam ọnọ mbufo enọ,+ mbufo ẹkpekam ẹkụt ebiet nduọkodudu+ ke ufọk mme ebe mbufo.” Ntre enye etịm mmọ inua,+ mmọ ẹnyụn̄ ẹmenede uyo ẹtua eyet.
10 Ndien mmọ ẹdọhọ enye ẹte: “Ihih, nnyịn idisan̄a ye afo inyọn̄ itiene orụk fo.”+
11 Edi Naomi ọdọhọ ete: “Nditọ mi, ẹnyọn̄ọ. Nso inam mbufo ẹyomde nditiene mi? Ndi nditọ ke ẹsụk ẹdodu mi ke idịbi, emi ẹkpekabarede ẹdi mme ebe mbufo?+
12 Nditọ mi, ẹkam ẹnyọn̄ọ, koro mmọsọn̄ n̄kaha ndinyene ebe. Idem edieke n̄kpọdọhọde ke mmodori enyịn ndinyene ebe okoneyo emi nnyụn̄ mman nditọ,+
13 nte mbufo ẹkpesụk ẹtie ẹbet tutu mmọ ẹkponi? Ndi mbufo ẹkpesụk ẹtie ẹbet mmọ ẹnyụn̄ ẹtre ndidọ ebe? Ihih, nditọ mi, koro uwem mi enen̄ede odoro aban̄a se iwọrọde mbufo, koro ubọk Jehovah omodoro mi ke idem.”+
14 Ntem mmọ ẹfiak ẹmenede uyo ẹtua eyet, ndien Orpah etịm eka ebe esie inua. Edi Ruth ọsọn̄ọ eyịre ye enye.+
15 Ndien enye ọdọhọ ete: “Sese! n̄wan eyeneka uberi ọnyọn̄ etiene orụk esie ye mme abasi esie.+ Tiene n̄wan eyeneka uberi nyọn̄.”+
16 Edi Ruth ọdọhọ ete: “Kûkpe mi ubọk ete n̄kpọn̄ fi, n̄kûnyụn̄ ntiene fi; koro nyaka ebiet eke afo edikade, nyonyụn̄ ndan̄ ke ebiet eke afo edidan̄de.+ Orụk fo eyedi orụk mi,+ Abasi fo oyonyụn̄ edi Abasi mi.+
17 Nyakpa ke ebiet eke afo edikpade,+ ẹyenyụn̄ ẹbụk mi do. Yak Jehovah anam ntem ye ami, onyụn̄ ọdọdiọn̄ anam ntre,+ ke mîdịghe n̄kpa kpọt edidian̄ade mi ye afo.”
18 Ke ini enye okụtde ete ke enye ọsọn̄ọ eyịre nditiene imọ,+ enye osion̄o idem ọkpọn̄ enye.
19 Ndien mmọ mbiba ẹsan̄a tutu ẹdisịm Bethlehem.+ Edikem ke ini mmọ ẹdide ẹdisịm Bethlehem, ofụri obio etịmede ke ntak mmọ,+ ndien iban ẹbụp ẹte: “Ndi Naomi+ edi emi?”
20 Edi enye ọbọrọ iban oro ete: “Ẹkûkot mi Naomi. Ẹkot mi Mara, koro Ata Ọkpọsọn̄+ amanam uwem mi enen̄ede odoro.+
21 N̄kọwọrọ mi ye ọyọhọ ubọk,+ edi Jehovah amanam mi nnyọn̄ ubọk ubọk.+ Nso inam mbufo ẹkotde mi Naomi, ke emi edide Jehovah esuene mi,+ Ata Ọkpọsọn̄ omonyụn̄ ada afanikọn̄ etiene mi?”+
22 Ntem ke Naomi asan̄a ye Ruth, owo Moab, kpa n̄wan eyen esie, oto obio Moab+ ọnyọn̄ edi, ndien mmọ ẹdisịm Bethlehem+ ke ntọn̄ọ ini ukpen̄e barley.+
