Utom 11;1-30
11 Ekem mme apostle ye nditọete emi ẹkedude ke Judea ẹkop ẹte mbon idụt+ n̄ko ẹma ẹbọ ikọ Abasi.
2 Ntre ke ini Peter ọdọkde edi Jerusalem, mme andida nnọ mbobi+ ẹtọn̄ọ ndineni eneni ye enye,
3 ẹdọhọde ẹte enye ama odụk ufọk mbon emi mînaha mbobi onyụn̄ adia n̄kpọ ye mmọ.
4 Edi Peter ọtọn̄ọ ndinam n̄kpọ an̄wan̄a mmọ ke adiana ke adiana, ọdọhọde ete:
5 “N̄kodu ke obio Joppa mbọn̄ akam, ndien ami n̄kụt ke n̄kukụt, nte n̄kpọ osụhọrede nte akwa ubak ọfọn̄ linen eke ẹmụmde ke utịt mbinan̄ ẹyak oto heaven osụhọde, ndien enye edisịm mi.
6 Ke n̄wụkde enyịn nse, ndụn̄ọde nse nnyụn̄ n̄kụt mme edibotn̄kpọ oro ẹnyenede ukot inan̄ emi ẹdude ke isọn̄ ye mme unam ikọt ye n̄kpọ eke ẹnyọnide ye mme inuen enyọn̄.+
7 Mma n̄kop uyo n̄ko ọdọhọde mi ete, ‘Peter, daha ke enyọn̄, wot ta!’+
8 Edi ndọhọ nte, ‘N̄wan̄ansa-o, Ọbọn̄, koro akananam n̄kpọ eke asabarede m̀mê edehede idụkke mi inua.’+
9 Uyo emi otode heaven ọbọrọ ọyọhọ utịm ikaba ete, ‘Tre ndikot n̄kpọ emi Abasi ama akanam asana ndedehe.’+
10 Emi etịbe ọyọhọ utịm ikata, ndien ẹtọn̄ọ ntak ẹkot kpukpru n̄kpọ ẹdọk heaven.+
11 N̄ko, sese! kpa idaha oro owo ita ẹda ke ufọk emi nnyịn ikodude ke esịt, ẹkenyụn̄ ẹsio mmọ ke Caesarea ẹdọn̄ ẹte ẹtiene mi.+
12 Ntre spirit+ ọdọhọ mi ete nsan̄a ye mmọ n̄ka, n̄kûnyene eyịghe. Edi nditọete itiokiet emi ẹsan̄a n̄ko ye ami, ndien nnyịn idụk ufọk owo oro.+
13 “Enye obụk ọnọ nnyịn nte enye okokụtde angel adade ke ufọk esie onyụn̄ ọdọhọde ete, ‘Sio mme owo dọn̄ ẹka Joppa ẹkekot Simon emi udorienyịn̄ esie edide Peter,+
14 ndien enye eyetịn̄ mme n̄kpọ oro ẹdidade ẹnyan̄a fi ye ofụri mbonufọk fo ọnọ fi.’+
15 Edi ke ini ntọn̄ọde nditịn̄ ikọ, edisana spirit odoro mmọ ke idem kpa nte okodorode nnyịn ke editọn̄ọ.+
16 Ndien nti ikọ Ọbọn̄, emi enye ekesidọhọde ete, ‘John ekenịm owo baptism ke mmọn̄,+ edi ẹdinịm mbufo baptism ke edisana spirit.’+
17 Ke ntre, edieke Abasi ọkọnọde mmọ ukem enọ mfọn emi enye n̄ko ọkọnọde nnyịn emi inịmde Ọbọn̄ Jesus Christ ke akpanikọ,+ ami ndi anie eke n̄kpekemede ndibiọn̄ọ Abasi?”+
18 Ndien ke ini mmọ ẹkopde n̄kpọ emi, mmọ ẹdop uyo,+ ẹnyụn̄ ẹnọ Abasi ubọn̄,+ ẹte: “Abasi amayak mbon idụt n̄ko ẹkabade esịt man ẹnyene uwem.”+
19 Mmọdo mbon oro ẹkesuanade+ ke ntak ukụt emi ọkọtọn̄ọde ke ikọ aban̄ade Stephen ẹsan̄a tutu ẹsịm Phoenicia+ ye Cyprus+ ye Antioch, edi ikwọrọke ikọ inọ baba owo kiet ke mîbọhọke mme Jew kpọt.+
20 Edi ndusụk mbon Cyprus ye Cyrene emi ẹkedide Antioch ẹma ẹdu ke otu mmọ ẹnyụn̄ ẹtọn̄ọ nditịn̄ ikọ nnọ mbon emi ẹsemde usem Greek,+ ẹnyụn̄ ẹtan̄a eti mbụk Ọbọn̄ Jesus.+
21 N̄ko-n̄ko, ubọk Jehovah+ ama odu ye mmọ, ndien ediwak owo emi ẹkabarede ẹdi mme andinịm ke akpanikọ ẹwọn̄ọde ẹtiene Ọbọn̄.+
22 Esop oro okodude ke Jerusalem ẹkop etop emi aban̄ade mmọ, ndien mmọ ẹsio Barnabas+ ẹdọn̄ aka Antioch.
23 Ke ini enye esịmde onyụn̄ okụtde mfọnido+ Abasi oro owo mîdotke, enye adara+ onyụn̄ ọtọn̄ọ ndisịn udọn̄ nnọ mmọ kpukpru ete ẹbiere ndisọn̄ọ nyịre ye Ọbọn̄ ke ofụri esịt;+
24 koro enye ekedide eti owo onyụn̄ ọyọhọde ye edisana spirit ye mbuọtidem. Ndien ata ediwak owo ẹdiana ye Ọbọn̄.+
25 Ntre enye adaha aka Tarsus+ man eketịm oyom Saul+
26 ndien, ke ama okokụt enye, enye ada enye edi Antioch. Ntem ke mmọ ẹsop idem ọtọkiet ye mmọ ke esop ke ofụri isua kiet ẹnyụn̄ ẹkpep ata ediwak owo n̄kpọ, ndien edi ke Antioch ke ẹkebem iso ẹkot mme mbet mme Christian+ ke ndausụn̄ Abasi.
27 Edi ke mme usen oro mme prọfet+ ẹto Jerusalem ẹsụhọde ẹdi Antioch.
28 Owo mmọ kiet emi ekerede Agabus+ adaha ke enyọn̄ onyụn̄ etịn̄ ke ndausụn̄ spirit ete ke akwa akan̄ ọmọn̄ odu ke ofụri isọn̄;+ ndien emi ama ada itie ke eyo Claudius.
29 Ndien mme mbet ẹbiere, owo mmọ kiet kiet nte ekemde ye se owo enyenede,+ ndinọ n̄kpọ un̄wam+ ẹsọk nditọete emi ẹdụn̄de ke Judea;
30 ndien mmọ ẹnam ntem, ẹnọ n̄kpọ emi ke ubọk Barnabas ye Saul+ ẹsọk mbiowo.
