Utom 17;1-34
17 Ekem mmọ ẹsan̄a ẹbe ke Amphipolis ye Apollonia ẹnyụn̄ ẹdisịm Thessalonica,+ emi synagogue mme Jew odude.
2 Ntre nte ido+ Paul edide enye odụk etiene mmọ, ndien ke sabbath ita enye ada N̄wed Abasi ọkọk ibuot ye mmọ,+
3 anam an̄wan̄a onyụn̄ okot n̄kpọ ndida nsọn̄ọ nte ke akana Christ okụt ukụt+ onyụn̄ eset ke n̄kpa,+ onyụn̄ ọdọhọ ete: “Emi edi Christ,+ kpa Jesus emi n̄kwọrọde nnọ mbufo.”
4 Ntre ndusụk mmọ ẹkabade ẹdi mme andinịm ke akpanikọ+ ẹnyụn̄ ẹdian idem ye Paul ye Silas,+ akwa udịm mme Greek* emi ẹtuakde ibuot ẹnọ Abasi ye ediwak mme ọwọrọiso iban ẹnyụn̄ ẹnam ntre.
5 Edi mme Jew ẹfịbe ufụp,+ ẹda ndusụk ndiọi mbon ifu an̄waurua ẹdian idem ẹnyụn̄ ẹkọ otu mbon ntịme ẹda ẹsịn ndutịme ke obio.+ Ndien mmọ ẹbụmede ẹdụk ufọk Jason+ ẹnyụn̄ ẹyom ndision̄o mmọ nsọk mbon ntịme.
6 Ke ini mmọ mîkwe mmọ oro, mmọ ẹdụri Jason ye ndusụk nditọete ẹdi ke iso mme andikara obio, ẹnyụn̄ ẹfiori ẹte: “Mmọ emi ẹtịmerede+ isọn̄ ẹmedi mi n̄ko,
7 ndien Jason amatat ubọk adara mmọ. Kpukpru mmọ emi ẹnyụn̄ ẹnam n̄kpọ ẹbiọn̄ọ mme ewụhọ+ Caesar, ẹdọhọ ẹte edidem+ en̄wen odu, kpa Jesus.”
8 Ke akpanikọ, mmọ ẹnam esịt etịmede otuowo ye mme andikara obio ke ini mmọ ẹkopde mme n̄kpọ emi;
9 ndien ke ẹma ẹkebem iso ẹbọ Jason ye mmọ eken ubiọn̄ emi ekemde, mmọ ẹyak mmọ ẹnyọn̄ọ.
10 Ndondo oro eyo okụtde,+ nditọete ẹsio Paul ye Silas ẹdọn̄ ẹka Beroea, ndien ke ini mmọ emi ẹsịmde do, mmọ ẹdụk synagogue mme Jew.
11 Edi mbon Beroea ẹma ẹnyene in̄wan̄-in̄wan̄ esịt ẹkan mbon oro ẹdude ke Thessalonica, koro mmọ ẹkebọde ikọ Abasi ye ata ọkpọsọn̄ udọn̄, ẹnen̄ede ẹdụn̄ọde+ N̄wed Abasi+ ke usen ke usen ẹte ise m̀mê mme n̄kpọ emi ẹdi ntre.+
12 Ke ntre ediwak mmọ ẹkabade ẹdi mme andinịm ke akpanikọ, kpasụk ntre ye ediwak iban Greek emi ẹtịmde ẹkpono+ ye irenowo n̄ko.
13 Edi ke ini mme Jew emi ẹdude ke Thessalonica ẹkopde ẹte Paul ama ọkwọrọ ikọ Abasi ke Beroea n̄ko, mmọ ẹdi do n̄ko ẹdisịn nsọk+ ẹnyụn̄ ẹnam esịt etimede+ otuowo.
14 Ekem kpa idaha oro nditọete ẹnam Paul adaha aka n̄kan̄ inyan̄;+ edi Silas ye Timothy ẹsụhọ do.
15 Edi, mbon oro ẹdade Paul usụn̄ ẹda enye tutu ẹdisịm Athens, ndien ke ẹma ẹkebọ etop ẹte Silas ye Timothy+ ẹsọp nte ẹkekeme ẹbịne imọ, mmọ ẹfiak ẹnyọn̄ọ.
16 Edi ke adan̄aemi Paul ebetde mmọ ke Athens, esịt ayat+ enye ndikụt nte ndem ẹyọhọde obio.
17 Mmọdo enye ọtọn̄ọ ndikọk ibuot ke synagogue ye mme Jew+ ye mmọ efen emi ẹtuakde ibuot ẹnọ Abasi onyụn̄ anam ntre kpukpru usen ke an̄waurua+ ye mbon oro enye okụtde do.
18 Edi ndusụk mme anditiene Epicurus ye mbon akwaifiọk+ Stoic ẹneni eneni ye enye, ndusụk mmọ ẹnyụn̄ ẹdọhọ ẹte: “Nso ke abrak inua emi oyom nditịn̄?”+ Mmọ efen ẹte: “Etie nte enye edi andikwọrọ isen abasi.” Emi edi koro enye akatan̄ade eti mbụk emi aban̄ade Jesus ye ediset ke n̄kpa.+
19 Ntre mmọ ẹmụm enye ẹda ẹka Areopagus, ẹnyụn̄ ẹdọhọ ẹte: “Nte nnyịn imekeme ndifiọk se obufa ukpepn̄kpọ+ emi afo ekpepde edide?
20 Koro afo amada ndusụk n̄kpọ emi ẹtiede esen esen ke utọn̄ nnyịn edi. Ke ntre nnyịn imoyom ndifiọk se mme n̄kpọ emi ẹwọrọde.”+
21 Ke akpanikọ, kpukpru mbon Athens ye isenowo eke ẹdan̄de do idaha ini nduọkodudu mmọ inam n̄kpọ efen ibọhọke nditịn̄ m̀mê ndikop mbufa n̄kpọ.
22 Paul ndien ada ke ufọt Areopagus+ ọdọhọ ete:
“Mbio Athens, mmokụt nte ke kpukpru n̄kpọ, etie nte mbufo ẹmebak mme abasi+ ẹkan nte mbon en̄wen ẹbakde.
23 Ke uwụtn̄kpọ, ke adan̄aemi nsan̄ade mbe nnyụn̄ ntịmde nse mme n̄kpọ eke mbufo ẹkponode, mma n̄kụt n̄ko itieuwa kiet emi ẹwetde ẹte ‘Emi Enyene Abasi Emi Owo Mîfiọkke.’ Ke ntre se mbufo ẹtuakde ibuot ẹnọ ke unana ifiọk, kpa emi ke n̄kwọrọ nnọ mbufo.
24 Abasi emi akanamde ererimbot ye kpukpru n̄kpọ emi ẹdude ke esịt, sia Enye edide Ọbọn̄ enyọn̄ ye isọn̄,+ idụn̄ke ke mme temple eke ẹdade ubọk ẹbọp,+
25 owo inyụn̄ idaha ubọk inam n̄kpọ inọ enye nte n̄kpọ eke enye ananade n̄kpọ,+ koro edi enye ọnọ kpukpru owo uwem+ ye ibifịk+ ye kpukpru n̄kpọ.
26 Ndien enye ama anam kpukpru idụt+ ubonowo ẹwọn̄ọ ẹto owo+ kiet, ẹdidụn̄ ke ofụri iso isọn̄,+ enye ama onyụn̄ enịm edimek ini+ ye adan̄a ebietidụn̄ owo,+
27 man mmọ ẹyom Abasi,+ ẹfiọn̄ọ ubọk ẹyom ẹnyụn̄ ẹkụt enye,+ okposụkedi enye ke akpanikọ mîyomke usụn̄ ikpọn̄ nnyịn owo kiet kiet.
28 Koro ebe ke enye ke nnyịn inyene uwem inyụn̄ isan̄a inyụn̄ idu uwem,+ kpa nte ndusụk mme ewet uto+ ke otu mbufo ẹdọhọde ẹte, ‘Koro nnyịn n̄ko idi nditọ esie.’
29 “Ke ntre, sia nnyịn idide nditọ Abasi,+ nnyịn ikpekereke ite Abasi+ ebiet gold m̀mê silver m̀mê itiat m̀mê n̄kpọ eke ẹdade usọ ye ekikere owo ẹbot.+
30 Ke akpanikọ, Abasi ofụmi utọ ini unana ifiọk oro,+ edi ke emi enye ọdọhọ ubonowo ete kpukpru mmọ ke kpukpru ebiet ẹkabade esịt.+
31 Koro enye emenịm usen eke enye aduakde ndikpe ikpe+ nnọ isọn̄ ke edinen ido ebe ke owo emi enye emekde, ndien enye ọnọ kpukpru owo nsọn̄ọ ke emi enye akanamde owo oro eset ke n̄kpa.”+
32 Edi, ke ini mmọ ẹkopde ẹban̄a ediset mme akpan̄kpa, ndusụk mmọ ẹtọn̄ọ ndisak enye nsahi,+ ke adan̄aemi mmọ eken ẹdọhọde ẹte: “Nnyịn iyokop se afo editịn̄de aban̄a n̄kpọ emi ini en̄wen.”
33 Ntem ke Paul ọwọrọ ke otu mmọ,
34 edi ndusụk owo ẹdian idem ye enye ẹnyụn̄ ẹkabade ẹdi mme andinịm ke akpanikọ, ndien mmọ emi ẹdude ke otu oro ẹdi Dionysius, ebiereikpe esop Areopagus,+ ye n̄wan emi ekerede Damaris, ye mbon efen n̄ko.
Mme Ikọ Idakisọn̄
^ Eyedi emi aban̄a mbon oro ẹkesemde usem Greek, kpa mbon emi mîkedịghe mme Jew.
