Utom 25;1-27
25 Ntre, ke Festus ama akakabade edi+ andikara mbahade obio ukara oro, enye oto Caesarea ọdọk aka Jerusalem ke usen ita ẹma ẹkebe;+
2 ndien mbọn̄ oku ye ikpọ owo mme Jew ẹtịn̄ n̄kpọ+ ẹdian Paul ẹnọ enye. Ntre mmọ ẹtọn̄ọ ndikpe enye ubọk,
3 ẹben̄e ẹte ọfọn mmimọ mfọn ọdọn̄ ẹkeda owo oro ẹdi Jerusalem, sia mmọ ẹkedịbede ẹbet+ ndiwot enye ke usụn̄.
4 Nte ededi, Festus ọbọrọ ete ke Paul enyene ndidu ke idak ukpeme ke Caesarea ye nte ke imọ imọn̄ ika do ke mîbịghike.
5 Enye ọdọhọ ete, “Ntem yak ikpọ owo ke otu mbufo ẹtiene mi ẹsụhọde ẹka do ẹkedori enye ikọ,+ edieke edide owo oro edue n̄kpọ.”
6 Ntre ke enye ama okodu ye mmọ ke n̄kpọ nte usen itiaita m̀mê duop, enye osụhọde aka Caesarea, ndien ke ndan̄nsiere enye osụhọde etie ke itie ikpe+ onyụn̄ ọnọ uyo ete ẹda Paul ẹdi.
7 Ke ini enye edide edisịm, mme Jew emi ẹketode Jerusalem ẹsụhọde ẹdi ẹdida ẹkan enye ẹkụk, ẹdori+ enye ediwak n̄kpọsọn̄ ikọ eke mmọ mîkemeke ndisọn̄ọ.
8 Edi Paul etịn̄ ikọ akan̄ idem ete: “Nnamke idiọkn̄kpọ ndomokiet ndian Ibet mme Jew, nnamke ndian temple,+ nnyụn̄ nnamke ndian Caesar.”+
9 Edi sia Festus oyomde ndikụt mfọn+ ke iso mme Jew, enye ọbọrọ Paul ete: “Nte omoyom ndidọk n̄ka Jerusalem man ẹkekpe ikpe fo do ẹban̄a mme n̄kpọ emi ke iso mi?”+
10 Edi Paul ọbọrọ ete: “Nda ke iso itie ikpe Caesar,+ emi odotde ndikpe ikpe mi. Nnamke mme Jew baba idiọkn̄kpọ kiet,+ nte afo nde etịmde ọfiọk.
11 Edieke ami ndide anamidiọk+ nnyụn̄ nnamde n̄kpọ eke odotde n̄kpa,+ mben̄eke nte n̄kûkpa; edi edieke baba n̄kpọ kiet oro mmọ emi ẹdoride mi mîdịghe akpanikọ, owo ndomokiet ikemeke ndifọn mmọ mfọn nyak mi nnọ mmọ. Mmeben̄e nte ẹda mi ẹsọk Caesar!”+
12 Ekem ke Festus ama ekenyene nneme ye otu mme ọnọitem ama, enye ọbọrọ ete: “Afo emeben̄e ete ẹda fi ẹsọk Caesar; ayaka ebịne Caesar.”
13 Ekem ke ndusụk usen ẹma ẹkebe, Edidem Agrippa ye Bernice ẹdi Caesarea ndikọm Festus.
14 Ntre, ke mmọ ẹma ẹkedu do ediwak usen, Festus emen ikọ aban̄ade Paul enịm edidem ke iso, ete:
“Owo kiet odu emi Felix ọkọkpọn̄de ke n̄kpọkọbi,
15 ndien ke ini n̄kodude ke Jerusalem mbọn̄ oku ye mbiowo mme Jew ẹditịn̄ n̄kpọ+ ẹnọ mi ẹban̄a enye, ẹben̄e ẹte mbiom enye ikpe.
16 Edi mma mbọrọ mmọ nte ke idịghe ido mbon Rome ndifọn mfọn nyak owo ekededi eke ẹdoride ikọ nnọ mbemiso enye osobode iso ye iso ye mme andidori+ enye ikọ onyụn̄ enyenede ifet nditịn̄ ikọ n̄kan̄ idem ke ikọ emi ẹdoride enye.
17 Ntre ke ini mmọ ẹsan̄ade kiet ẹdi mi, nnamke ubịghi, edi nsụhọde ntetie ke itie ikpe ke ndan̄nsiere nnyụn̄ nnọ uyo nte ẹda owo oro ẹdụk ẹdi.
18 Mme andidori enye ikọ ẹdaha ẹda, edi itịn̄ke idiọkn̄kpọ ndomokiet idian+ enye nte n̄kekerede.
19 Mmọ ẹkekam ẹneni ye enye ẹban̄a nte mmọ ẹtuakde ibuot+ ẹnọ abasi, ẹnyụn̄ ẹneni ẹban̄a owo kiet emi ẹkotde Jesus emi ama akakpa, edi emi Paul ọsọn̄ọde ọdọhọ ete enye ke odu uwem.+
20 Ntre, sia mmentịmke mfiọk mme n̄kpọ emi mmọ ẹnenide mi, mma mbụp m̀mê enye akpama ndika Jerusalem man ẹkekpe ikpe esie do ẹban̄a mme n̄kpọ emi.+
21 Edi ke ini Paul eben̄ede+ ete ẹnịm imọ ẹbet ubiere Akwa Edidem, mma nnọ uyo nte ẹkpeme enye tutu nnọ enye ẹsọk Caesar.”
22 Ekem Agrippa ọdọhọ Festus ete: “Ami n̄kpama n̄ko ndikop nto owo emi.”+ Enye ọdọhọ ete, “N̄kpọn̄ afo oyokop oto enye.”
23 Ntre, ke ndan̄nsiere, Agrippa ye Bernice ẹsan̄a ubọn̄ ubọn̄+ ẹdụk ufọk ikpe ye mme etubom ekọn̄ ọkọrọ ye mme ọwọrọiso owo ke obio, ndien ke ini Festus ọnọde uyo, ẹda Paul ẹdụk ẹdi.
24 Ndien Festus ọdọhọ ete: “Edidem Agrippa ye kpukpru mbufo emi ẹdude mi ye nnyịn, mbufo ẹmekụt owo emi ofụri udịm mme Jew emi ẹdude ke Jerusalem ye ke edem emi ẹkekpede mi ubọk ẹban̄a, ẹfioride ẹte enye idotke aba ndidu uwem.+
25 Edi n̄kụt nte enye inamke baba n̄kpọ kiet eke odotde n̄kpa.+ Ntre ke ini owo emi eben̄ede+ ete ẹnọ imọ ẹsọk Akwa Edidem, mma mbiere ndinọ enye aka.
26 Edi nnyeneke akpan n̄kpọ ndiwet nnọ Ọbọn̄ mi mban̄a enye. Ntre ke nda enye nnịm ke iso mbufo, akpan akpan ke iso fo, Edidem Agrippa, man, ke ama okodụn̄ọde ikpe esie,+ n̄kpenyene n̄kpọ ndiwet.
27 Koro etie mi nte iwụtke eti ibuot ndinọ owo–n̄kpọkọbi aka ndien n̄wụtke n̄ko ikọ emi ẹdoride enye.”
